Login

Fa’aupuga “Leaga le Fa’atauatama”- Tupu Zulu Aferika

Ua vevesi nei le malo o Aferika i Saute ona o le fa’aupuga a lo latou tupu Zulu Goodwill Zwelithini, ua ia fa’aalia ai lona le fiafia e sapaia ni faiga ‘fa’atauatane’ i sana lauga sa faia.

Ua a’afia ai tele lagona o le Sosaiete e sapaia aia tatau a tagata soifua o lea malo, ma ua latou toe fesiligia sa’o ai lava le afioga le Tupu, po ’o le a tonu lava le uiga o lana saunoaga ua mae’a faia e fa’atatau ia i latou o lo ’o faia le “Fa’atauatane” ma le “fa’atauateine” po ’o le fa’afafine ma le fa’afatama.

Ua i’u lava ina matua sa'ilia lava e le Sosaiete e Sapaia Aia Tatau a tagatanu’u o Aferika i Saute ni kopi o le lauga a le afioga a le Tupu, o Zulu lea. Peita’i, o lo ’o te’ena mai e le 'aufaigaluega a le Maota o le Tupu lo latou fa’afofogaina o se fa’a'upuga fa’apea a le afioga le Tupu, ma ua latou fa’apea mai, “O fa’aliliuga le mautu ma tau fa’asese, ua ava ma sasi o le malelega a le tupu sa faia fa’alaua’itele.”

Peita’i, ua fa’ailoa mai e le Nusipepa a le South Africa Times, o i latou ia sa mua’i aumaia le tala e tusa ai o le lauga a le tupu, “Matou te tu lava i la matou mau, e moni lava le fa’aliliuga sa matou mua’i lomia e fa’ailo ai manatu na fa’aalia e le tupu!”

I le fa’avae o le Malo o Aferika i Saute, ua mae’a matamata tetele ai le aiaiga ina ia le fa’ailoga lanu se tasi, pe fa’ailoga fa’aleituaiga se tasi, peita’i e tele lava taimi ua fa’asea mai ai sui totino o le atunu’u e fa’atauatane ma fa’atauateine, o lo ’o faisa'o lava i latou ma so’ona fai pe fa’amaina ona o latou ia uiga.

Ua fa’aalia ni manatu o ni isi o sui o le Malo o Aferika mai Johannesburg, Pumza Fihlani, “O le afioga le Tupu o se tasi e sili ona fa’aaloalogia e lo matou malo, e ta’ita’ia fo’i e ia le to’atele o tagatanu’u moni o Aferika i Saute, peita’i, o lana saunoaga, e ala lava ona manino a’ia’i lana tala tonu na faia, aua e fa’aaloalo tele tagata e to’atele ia te ia.”

Ua fa’ailoa fo’i e le HRC o le a latou faia se tusi aloa'ia i le tupu, ina ia fa’aalia sa’o mai e ia lona finagalo e tusa o lana fa’a'upuga na lafo, ma lona talitonu moni lava e tusa o le fa’atauatane ma le fa’atauateine.

O lea lauga sa faia e Goddwill i se tasi o nofoaga maotua o le atunu’u i se fa’amanatuga tele o le Taua i Islandwana - o le taua lea i le senituri 19 na manumalo a’ia’i ai tagata Aferika i fitafita Peretania.

saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.