Pasia Faipule Dr. Jacinta Galea’i avea ma Faatonu o Aoga

Dr. Jacinta Galea’i [ata: AF]

Na pasia e Faipule i le taeao ananafi, i se palota 16-0, ia le tofiga o Dr. Jacinta Galea’i e avea ma Fa’atonusili o le Matagaluega o A’oga, ina ua mae’a se iloiloga a le Komiti o A’oga.

Na talosagaina e Faipule i le latou iloiloga, ia Dr. Galea’i, ina ia fa’ata’oto sana fuafuaga mo le isi lima tausaga, aemaise ai auala e fo’ia ai ni isi o fa’afitauli, o lo o maitauina o lo o tutupu mai i totonu o le matagaluega, potu a’oga fa’apea le le lava o faiaoga.

Na laga ai fo’i i le iloiloga e le ali’i Faipule ia Maneafaiga Faoa, ia tupe o lo o totogi ai pili a le ofisa o a’oga, lea na saunoa Dr. Galea’i, o lo o totogi ai pili i le ASPA.

Na fa’aalia e Maneafaiga le tele o teugatupe o lo o fa’aaoga e le Ofisa o Aoga ma sa ia fesiliga po o fea tonu le teugatupe o lo o aga’i i ai tupe o lo o ao e le Ofisa o Aoga mai i tupe o lo o totogi e fanau a’oga ona o tusi aoga leiloloa, lea e ova atu i le tai $100 le tau o isi tusi.

Na le’i mautonu le tama’ita’i fa’atonu ona e le’i taga’i i se ripoti i lea mataupu, ae na saunoa Maneafaiga, e tatau i le fa’atonu ona sauni i so’o se taimi, e fa’amanino tulaga fa’apea.

Na fa’atuina loa e Maneafaiga se mau, ina ua mae’a le palota a le komiti, ina ia tu’uina atu loa le suafa o le tama’ita’i fa’atonu i le maota mo le palotaina.

Na fautuaina e le ali’i Faipule ia Tu’umolimoli Saena Moliga ia Dr. Galea’i, ina ia fa’ailo atu i le Fono ia ta’ita’i o vaega ese’ese i totonu o le Ofisa o A’oga, ina ia fa’afaigofie ai i le Fono, ona fa’afeso’ota’i sa’o i latou pe afai e i ai ni mata’upu e mana’omia ona fa’amanino i faipule.

O le vaiaso fou lea ua fa’amoemoe e fa’ataunu ai le iloiloga o le komiti a le Senate, i lalo o le ta’ita’iga a le afioga Alo Dr. Paul Stevenson.

I se tusi a kovana Togiola Tulafonfo i taitai o le fono i le aso 10 o Ianuari, na ia ta’ua ai e fa’apea, o Dr. Jacinta o se sui sinia o le aufaigaluega a le kovana, lea sa galue o se faatonusili mo le Matagaluega o Fesootaiga.

Sa fesoasoani malosi o ia i galuega fa’atino a le ofisa o le kovana, atoa ai ma le tulaga lelei sa i ai lana faufautua i le tele o faiga tausisia tau pulega mo polokalama a le ofisa, lea na mafai ai ona ausia e le ofisa tulaga maualuluga.

Saunoa Togiola, o le tele o le soifuaga tautua ma le galue o Dr.Jacinta o le matata fa’afaiaoga, ma le puleaina o tulaga tau aoaoga, e le  gata sa  avea ma faiaoga i aoga maualuluga ma kolisi, ae sa avea foi ma pule aoga mo tausaga e 7 i le polokalama a tamaitai aoga, le GEAR UP.

O Dr. Jacinta o lo o ia umia le tikeri o le fomai, Masters ma le BA i le  gagana Peretania. O ia o se tusitala fa’amanuiaina ua molia nisi o ana tusi, ma o le tulaga maualuga o lona olaga aoaoina ua mafua ai ona tofia o ia e avea ma faatonusili o le matagaluega o Aoga.