Login

Tala o Faamasinoga

ausage@samoanews.com

MAUA MARIUANA I TOTONU O SE CONTAINER

O mariuana ia o lo o tu’ua’ia e le malo sa maua e alii Ofisa o Tiute i totonu o se container i le vaiaso na tea nei, ua mafua ai ona taofia i le to’ese i Tafuna se alii papalagi e 34 tausaga mai San Diego talu mai le Aso Sa na tea nei, e fa’atali le tusi saisai lea o lo o galulue ai le Ofisa o le Loia Sili e uiga i lenei mataupu.

E tusa ai ma fa’amaumauga a le fa’amasinoga o lo o ta’ua ai e fa’apea, o fuala’au fa’asaina o  lo o tu’ua’ia na maua i totonu o le container, na mafai ona maua e ta’ifau fa’apitoa a le Ofisa o Tiute a’o su’esu’eina ‘containers’ e taunuu mai i le atunu’u i luga o le uafu tele i Fagatogo.

Ao faia lea asiasiga, sa mafai ona fa’ailoa atu e ta’ifau i alii Ofisa fa’ailoilo, le i ai o fuala’au fa’asaina i totonu o le ‘container’, ma fa’aauau ai le sa’iliga se’ia o’o ina maua ai i totonu o le container se fagu (medium size jam jar).

Sa tatala e leoleo le fagu lea ma maua ai i totonu isi tama’i container se tolu o loo i ai vaega o fualaau faasaina o le mariuana.

O le taeao nei lea ua faamoemoe e tatau ona tulai ai lenei alii i luma o le faamasinoga faaitumalo.

SAUNI TALI IOE SUSUNUINA PUSA LAVALAVA LONA TOALUA

O le alii lea na tuuaia i lona amataina lea o se afi e ala i lona susunuina lea o le pusa lavalava a lona toalua, na mafua ai loa ona alu atu le asu ma aafia ai le soifua maloloina o nisi o tagata latou te tuaoi, ua sauni e tali ioe i lea moliaga i lalo o se maliliega ua latou sainia ma le malo.

O le aso Gafua na tea nei na sainia ai e le ua molia ma le malo lea maliliega peitai e le’i failaina i le faamasinoga, ma o le mafuaaga lea ua toe tolopo ai loa le fofogaina o lea maliliega i le aso Tofi o le vaiaso nei.

E tusa ai ma faamaumauga o lenei mataupu o loo taua ai e faapea, o se feeseeseaiga na tulai mai i le va o le alii na aafia ma lona toalua, ina ua fai atu le fafine o ia o le a alu e nofo i lona tina i Pava’ia’i, ona ua le lava le pisa soo o le la aiga, ae na avea ai ma itu na alu ai le ua molia ma inupia, fo’i mai ai loa i le fale ma ave i fafo le pusa lavalava a le fafine ma susunu ai.

O aiga tuai na valaauina leoleo mo se fesoasoani ona o le malosi tele o le asu mai le pusa lavalava lea o loo susunu e le ua molia, ma agai atu ai loa leoleo ma tape le afi, ae auina atu le ua molia i le ofisa mo suesuega, ma taofia ai loa o ia i le toese i le masina na tea nei.

O loo tatalaina pea itua le ua molia i lalo o poloaiga a le faamasinoga e faatali ai le isi ana iloiloga lea ua faatulaga i le aso Tofi.

SOPI SENIO

O le alii lea o loo tuuaia i lona so’aina lea o se isi alii i lana taavale, ua toe tolopo lana iloiloga e faia lea i le masina fou, ina ua talia e le faamasinoga maualuga se talosaga na faaulu e lana loia o Mike White, e toe tolopo ai le uluai iloiloga lea na faatulaga i le taeao ananafi, ona o lea faatoa maua e le itu tetee faamaumauga o lenei mataupu mai le malo.

Na talia e le faamasinoga le talosaga a le itu tetee ma toe faaauau ai loa lenei mataupu i le masina fou o Fepuari.

O loo tumau pea tuutuuga o loo tatala ai Sopi Senio i tua mai le toese i Tafuna, ina ua ia totogiina le $25,000 sa faatulaga e le faamasinoga e tatala ai o ia.

I faamaumauga a le faamasinoga o loo taua ai, o se feeseeseaiga na tulai mai i le va o le ua molia ma le alii na afia i tulaga o fanua, na mafua ai ona tupu le faalavelave e pei ona tuuaia ai le so’aina lea e le ua molia o le alii na aafia i lana taavale.

O loo teena malosi e Senio tuuaiga a le malo faasaga ia te ia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.