Le Lali

TETE’E JOSEPH IAKOPO I TUUAIGA A LE MALO
 
O le masina fou lea ua faatulaga e toe fofogaina ai le mataupu a Joseph Iakopo i luma o le Faamasinoga Maualuga ina ua ia teena moliaga o le talepe fale ma le gaoi i le taeao ananafi.  O nei moliaga na afua mai i se faalavelave o lo o tuuaia ai Iakopo i lona ulufale faamalosi i totonu o se faleoloa i Malaeimi ma gaoia pepa faitelefoni ma sikaleti, atoa ai ma se tino i tupe e tusa ma le $800.
 

LOLO: Ua fai outou ma sulufaiga o le atunuu i taimi faigata o le olaga
 
Na faatumulia le malumalu EFKAS i Fagaalu i le aoauli o le Aso Sa na se’i mavae atu, i ta’ita’i o le malo, uo ma aiga faapea ai sui o le Vaega o Tama’ita’i Tausi Ma’i, ina ua tatala aloaia le vaiaso faapitoa mo Tama’ita’i Tausi Ma’i i se sauniga lotu sa taitaia e le susuga Rev. Lalomauga Paau.
 

E na o le 10 vaiaso lea ua tuu atu e le afioga i le kovana sili ia Lolo Matalasi Moliga i Faatonusili o Matagaluega ma Ofisa uma o le malo, e faatino ai le fausiaina o atina’e ma ofisa o le malo i totonu o le itumalo o Manu’a a’o le’i tatalaina.  O lea fuafuaga o lo o aofia ai ma le tatalaina o le Ofisa o le kovana sili i Ta’u, Manu’a.
 

Vaega: 51
 
Malo le soifua, malo fo’i le onosa’i i faiva ma tiute o lo’o feagai ai ma le mamalu o le atunu’u i lenei aso, ae maise ai o le maleifua mai i fanuga lelei i le tausiga alofa a lo tatou Matai i le lagi. E i ai pea le fa’amoemoe, o lo’o aoina pea le masina i le soifua manuia o le atunu’u i lenei aso, ae alo maia, o la toe fa’aauau atu la tatou tala e pei ona masani ai.