Login

Velega: Manu’a finagalo o le atunu’u ona o ponesi a le ASPA

ausage@samoanews.com
Afioga i le alii Senatoa, tofa Velega Savali Jr. [ata: AF]

Na faailoa e le afioga i le alii Senatoa ia Velega Savali Jr i le Pulega a le ASPA i se iloiloga sa faia i le taeao ananafi, o a latou Ponesi ia sa totogi atu i nisi o ana tagata faigaluega, o se gaioiga lea ua faamanu’alia ai (insult) finagalo o le atunuu. O se tasi lenei o mataupu na fesiligia e le taitaifono o le komiti o le ASPA/TEO a le Senate i le taimi o le iloiloga ma le ASPA i le taeao ananafi.

Saunoa Velega, e ui ua fai si umi talu ona maea le totogiina atu e le ASPA o ponesi nei i nisi o ana tagata faigaluega, peitai o loo toatele pea lava tagata o lona itumalo ma le atunuu o loo latou fesiligia le atamai na faia ai lea faaiuga, ae o loo silafia lelei lava e le ASPA le feagai ai o le atunuu ma le tulaga pagatia i le itu tau tupe, aemaise ai foi o lea o loo tau saili e le ASPA ni tupe e fesoasoani ai i lana tautua, ae o lea ua toe faaalu isi nei tupe i tagata faigaluega, ae ua le sefe e tali atu ai i isi manaoga o loo tulai mai.

Ina ua fesiligia e Velega le tulaga i Ponesi, na faamanino ai e Susana Faiivae, o ia lea o loo vaaia le itu tau Tupe a le ASPA le aofai o tagata na faamanuiaina i ponesi, atoa ai ma le tupe sa faaalu ai e le ASPA.

Mai le silia i le toa 400 tagata faigaluega a le ASPA o loo i ai, e toa 66 i latou na faamanuiaina i faamanuiaga o ponesi, lea sa totogi atu i le masina o Oketopa na tea nei, ma o ponesi nei e pei ona talitonu le ASPA, o loo i totonu o le latou paketi ua maea ona pasia atu e le Fono, lea e tusa ma le $53,8000 na faaalu ai.

Na taua foi e le ASPA, o ponesi nei sa totogi mai lava i le tausaga e 2008, 2009 ona taofia lea i le 2010 ona o tulaga pagatia sa i ai le itu tau tupe a le faalapotopotoga, e mafua mai i le tele o vaega sa faaleagaina i le galulolo, ae o lea ua toe faaauau mai i le tausaga lenei.

Na lagolagoina e Velega le tatau lea ona totogi atu ponesi i tagata faigaluega, atoa ai ma lona lagolagoina o le mau a le ASPA, o ponesi nei o loo i totonu o le latou paketi, peitai o le itu o loo tetee i ai le alii Senatoa, o le taimi lea ua totogi atu ai e le ASPA ponesi i ana tagata faigaluega, e le o se taimi talafeagai, ma o le mafuaaga foi lena o le faamanu’alia o finagalo o nisi o le atunuu, ona o lea ua faaalu e le ASPA tupe mo ponesi ae o loo pologa le atunuu e totogi a latou pili ia ua toe sii mai.

Na faamanino e le taitaifono o le komiti faafoe a le ASPA o Asaua Fuimaono i luma o le komiti, o ponesi a tagata faigaluega, o se taui lea ua tuuina atu e tusa ai o le tautua faamaoni ma le galulue malosi o tagata faigaluega, talu mai taimi pagatia sa i ai le atunuu i le galulolo, lea sa maitauina ai le galulue ova taimi o tagata faigaluega, aemaise ai foi i latou sa tipi a latou totogi ina ua manaomia e le ASPA le faasaoina mai o nisi o ana vaega tupe

“O le mafuaaga lena na faamaonia ai loa e le Komiti Faafoe le totogiina atu o ponesi i tagata faigaluega nei, ina ia faafetaia ai le tautua sa latou tuuina mai, ma saga unaia ai i latou ina ia faamalolosi pea e fai galuega lelei e tautua ai le atunuu,” o le saunoaga lea a Asaua na le fiafia ai Velega.

Na taua e Velega ia Asaua, o le mafuaaga tonu lava lea o loo tupu ai le faaletonu, ona o loo faavae faaiuga a le ASPA ma mea fai i luga o lona talitonuga.

“Fai pea lou talitonuga lena aua o oe o loo e taitai i le ASPA, ae ou te tautino atu ia te oe Asaua, e oo mai lo’u oti, e tumau lava lo’u talitonuga, o le gaioiga lea ua outou faia, o se mea ua faamanu’alia ai finagalo o le atunuu”, o le saunoaga lea a Velega.

“Fai pea tou ponesi ae tuu ai pea le atunuu e oi ma pologa,” o le isi lea saunoaga a Velega.

Saunoa Velega, e le tau totogiina i ni tupe le tagata faamaoni, ae taui mai lava i le lagi, ma o le mafuaaga foi lea sa ia manatu ai, e ui lava o ponesi o vaega tupe ua pasia ma o se mea e tatau ona totogi atu i tagata faigaluega, ae sa tatau lava ona fetuunai le tofa ma le utaga i le komiti faafoe ma le pulega a le ASPA, i le tulaga pagatia o loo i ai le itu tau tupe i le taimi nei.

Na lagolagoina e le afioga i le tamaitai Senatoa ia Fonoti Aufata le finagalo o Velega e uiga i ponesi, ma ia taua ai, e le sao le taimi na faatinoina ai lea fuafuaga, e le gata i lea, e le o tagata faigaluega uma na maua lea faamanuiaga, ma e ono tulai mai ai foi le tomumu i isi tagata faigaluega, i le leai lea o ni a latou ponesi.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.