Login

Vavau a Samoa

Ao i ai Leutogi i le motu tu'ufua, sa masani ona fai ana umu e fai ai ana mea'ai, peita'i o le fa'afitauli e leai ni lau la'au e taufi ai lana umu, o lea sa ia fa'aaogaina ai iliili o le sami e fai ma tau o lana umu, ma o i'ina lea e mafua ai le suafa o Tauiliili, e fa'amanatu ai iliili sa fa'aaoga e le tama'ita'i e fai ma tau o lana umu. E tele isi mea taua na maua mai i lenei tala, e pei ona maua ai suafa o le Tonumaipe'a, Tauiliili ma le Tilomai, lea na sau ma le tama o Fa'asega le tama a Leutogi ina ua usu i ai le Tui Uea po o le tupu o le motu o Uea. Ma o suafa nei na auina mai e Fa'asega ma 'ave ia Lafai le tuagane o Leutogi, ma o Lafai lava le ulua'i Tonumaipe'a ia Samoa.Vavau o Samoa

FAU INA O LE FALE O NAFANUA

O le nu'u o Falealupo lea o lo o i ai le nofoaga e ta'ua o le Ina'ilau, lea e mafua ai le muagagana fa'aalaga'upu e faapea, "e au le Ina'ilau a tina". Fai mai le tala tu'u a Samoa, o le Ina'ilau lenei po o se fale fo'i i se isi fa'aupuga fa'afaigofie, sa mana'o le tama'ita'i o Nafanua ina ia fau mo ia, e nofo ai ma tapena ai mo le taimi o le taua i aso anamua. Fai mai le tala na manana'o ali'i latou te faia le fale ma fausia ina ia mae'a lelei mo Nafanua, peita'i sa finau mai fo'i tama'ita'i latou ma fai atu ia Nafanua, e mafai fo'i ona latou fausiaina le fale e pei ona faia e ali'i, ma latou fausia ina ia mae'a.

Na iloa e le tama'ita'i ua le maua se tonu i le va o ali'i ma tama'ita'i po o ai e fauina le fale, ona ia manatu loa lea, o le a tofu vaega ta'itasi ma le 'afa o le fale latou te galulue ai, ua tofi e Nafanua ali'i latou te faia le isi itu o le fale, ae o tama'ita'i i le isi itu, ma ua amata loa le galuega. O le mea e malie ai, ona fai mai le tala sa fai atu lava le galuega a tama'ita'i mae'a lelei ae fai le galuega a ali'i, e lei mae'a, ma e o'o mai lava i onapo nei, o lo o tu ai lava le Ina'ilau e le'i mae'a ona fausia le itu na fau e ali'i. O le taimi nei pe afai e te toe asia le nofoaga o lo o i ai le Ina'ilau, ua liupapa atoa le tino o le fale e o'o lava i le pito i luga, peita'i o lo o iloa gofie lava le vaega o le fale na fausia e tama'ita'i, o lo o mae'a lelei e ui ua liua e 'avea ma papa, ae o le itu na fau e ali'i, o lo o va'aia pea le pu atoa o le isi itu o le tala o le fale e lei mae'a ona ato. Ma o i'ina lea na mafua ai loa le alaga'upu fa'amuagagana a le atunu'u e fa'apea, "E au le Ina'ilau a tama'ita'i po o tina fo'i." O lona uiga pe afai e fa'amatalaina, e mafai fo'i e tama'ita'i latou ona fai galuega o lo o faia e ali'i.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.