Login

Umusa le Fale: Mapusaga mo Aiga

Aiga A’afia i Mafutaga Motusia, Fa’alavelave Fa’afuase’i ma Aiga ua Fa’asauaina!
frostlehualani@yahoo.com
O se va’aiga i le faletua Maryann Tulafono ua o’otia le lipine e tatala aloaia ai faitoto’a o le tautua a le Maota o Mapusaga o le matagaluega o Tina ma Talavou a le Malo fa’atasi ai ma le Charity & Hope Ministry. [ata: Leua Aiono Frost]

O le aso ananafi na tatalaina ai faitoto’a o le Maota fou o le Auaunaga a le Malo i ona tagatanu’u ua fa’asauaina ma ua le saogalemu ai le soifua o Tina ma fanau, po’o nisi ua mu o latou fale ma ua leai se nofoaga e tau ina mapu i ai ae saili se fale e fa’amautu i ai, ae maise fo’i aiga ua a’afia i tete’aga matua, ma ua le saogalemu fo’i le ola o se tasi o matua ma le fanau.

I so’o se ituaiga a’afiaga fita e a’afia ai matua ma fanau, fa’afesili mo se fesoasoani a le Matagaluega o Tina ma Talavou, po’o le Charity & Hope Ministries lea ua latou va’ava’alua mo le fa’aaogaina lea maota, ia tautuaina ai i latou ua a’afia o latou lotoifale i puapuaga fa’afuase’i po’o sauaga ma le tulaga o mafutaga tete’a ma ua iloga mai o le a fa’aletonu ai ma le soifua o le fanauiti. O le nofoaga lenei, e tau lava ina mapu ane i ai, ae saili se nofoaga mau mo aiga!

O le galuega na fa’atinoina lea mo le sefulu lava vaiaso, ae o lea ua umusaina. O se galuega na fa’atautaia lava e le aufaigaluega a le Matagaluega a Tina ma Talavou, fa’atasi ai ma le fesoasoani malosi a le aufaigaluega a le Administrative Services. O le ata na tusia ma toe pasia fo’i le fausaga, e le Matagaluega o Galuega Lautele a le tatou malo.

Ua fa’ailoa mai o le tinoitupe na fa’atino ai lea galuega na talosagaina mai lava i le Housing Division a le Malo tele, ma e tusa ua lima tausaga o fa’ao’o mai pea lea ta’i $40,000. ae faigata ona fa’aaoga aua e le mae’a ai se poloketi.

O le tu’ufa’atasia o lea vaega tupe itiiti mai nei tausaga e lima ua maua ai le aofa’iga e fa’atino ai loa e le Matagaluega o Tina ma Talavou le Maota ua tutula’i nei i le Lua Street i le Paka Liona i Tafuna. O le sui lava sa gafa ma lea galuega mai lona amata se’ia o’o i lona fa’ai’uga, o le susuga Pa’u Roy Ausage ma o se tala fiafia lava, ona o lo’o ua mautu mea uma, e o’o i le sapalai o mea’ai, fa’atasi ai ma le fa’ameafaleina o le Maota atoa e tusa ma le 4 potumoe, umukuka ma faleta’ele e lua ua i ai, ae sili fo’i ona matagofie lona Umukuka ma le potu malolo.

O se auaunaga ua au, aua sa le mafai ona matu’u mai lea seleni mo le fa’amoemoe se’iloga ua mae’a usita’ia e tatau lava ona i ai se sosaiete tumaoti, e le o se vaega o le Malo, ma e le o galulue fo’i e saili ai so latou lava tamaoaiga tausi. O lea itu, na filifilia ai loa le Charity & Hope Ministries lea e ta’ita’ia ana galuega uma e le faletua o Aomalo Aumoeualogo.

“Ou te fa’afetai tele i le avanoa o le a matou tautuaina ai le mamalu lautele e ala i le fa’aaogaina o lenei fale. E mautinoa lava, e tonu le fa’amatalaga a le Kovana e tusa ai o sui o le a o mai ma fa’aaogaina le maota lenei, “O i latou ia o lo’o a’afia tele o latou lagona, ia onosa’i ma ave pea ia i latou se isi lagona fou e fa’afou ai o latou olaga ma ia toe tamau le fa’amoemoe, ia fa’amausali aiga.”

Mai le Charity & Hope Ministries, o lo’o faia lava latou galuega e saili seleni ina ia la’uina mai so’o se ituaiga oloa e saili e tagata o aiga ta’itasi e tausia ai i latou e aofia ai lavalava, mea’ai, o mea e fa’aaoga i totonu o aiga,  atoa ai ma le tausiga lelei o fanau.

O latou pusa oloa tetele sa aumaia mai Amerika, lea ua faia ai a latou Faleoloa mo le fa’atau atu ai o oloa na uta mai, ma ua iloga le taugofie mo oloa matagofie ma le anagata. Va’ai sou avanoa e fa’atau ai i le latou fale’ie, ma e fa’atuina lava i le latou Ofisa autu i Malaeimi.

O le faletua o Aomalo Aumoeualogo, sa auai fo’i i le sauniga e tatala aloaia ai lenei tautua ina ia amatalia.

Ua fa’ailoa mai e Pa’u Roy Ausage, O le a alofaiva atu le matagaluega ma le Charity & Hope Ministry ina ia a’oa’oina muamua le aufaigaluega i tomai e mo’omia mo nei ituaiga o galuega, o le faufautua ma le aoaoina o matua ma fanau i uiga e ao ina faia e maua ai le nofo lelei o Aiga Samoa.

“Mo le i si lua masina, o le a faia ai nei a’oa’oga a le aufaigaluega, ma o le a tapena ai mo le tatalaga aloaia o le Maota o Mapusaga mo le auaunaga sa fausia fa’apitoa ai.” O se fa’amatalaga lea a Ausage. “O le tau o le fale lava latou fa’atasi ai ma le totogia o le aufaigaluega kamuta na fa’aalu ai le $120,000. Peita’i, o isi mea e aofia ai le fa’ameaafale o lea fale, ma le fa’atauga o le sapalai mo le tausiga fa’apitoa o tagata e aoga i ai le Maota, ua mae’a tapena fo’i ma le fa’ameafaleina o le ofisa autu e fa’atino ai fa’amaumauga ma isi tautua e feso’ota’i lelei ma le Maota lea ma lona ‘auga, ua atoa ai lava le tupe na fa’amatu’u mai.”

O se saunoaga a le afioga le Kovana Sili i le tatalaga o lea maota, sa ia fa’ailoa ai, “Ua iloga nei, ua tonu lelei le tu’uina o le seleni lea i le Matagaluega o Tina ma Talavou, aua o lea ua tino se mea lelei ma le aoga mai se vaega tupe ititi, sa le mafai ona fa’aaogaina e isi matagaluega, ona e le lava ai se mea! Lea ua tula’i mai ma ua aoga tonu lava lea tupe i le fausaga o le fale e pei ona fa’atulaga mai ai e le HUD. E i ai nisi vaega tupe iti sa fa’amatu’u mai isi alagatupe, na fesoasoasni tele ia mae’a lelei lea poloketi mo aiga mafatia ma ua leai se fale e sulufa’i atu e fa’amautu i ai mo sina taimi.

O le poloketi lea, au fa’aalu lava le vaega tele mo le poloketi, ae ua le fa’atele i le itu a le aufaigaluega. O lona uiga, e mo’omia lava i latou e ofo mai a latou tautua mo le fa’agasologa aga’i i luma o le tatou auaunaga lenei.

O se ‘aiga mamafa ma le felanulanua’i sa taua’aoina e le fa’atino fa’atonu o le matagaluega, Leiatauasa Leuga Turner ma le aufaigaluega mo le mamalu na aofia potopoto i lea fa’amoemoe, ae muliga ai, fa’agasolo mai le fa’afiafiaga e fa’anofo filemu ai le aofia, ae ‘auga lava fa’atinoga i mafuaga e ala ai ona o’o atu se aiga i le Nofoaga o Mapusaga! O le fa’atinoga muamua, o le aiga ua le usita’i tamaiti ona ua popoto ma ua tele atu mea ua latou maua i o latou olaga, nai lo latou matua. Ona o lea, ua latou le maua ai le ava i matua! Va’ai le tulafono 5. O le fa’atinoga lona lua o le Tauga Apu i Niu Sila, e mafua ai ona malepelepe ma pisa aiga!

O le fofoga lava le tofa Pa’u Roy Ausage sa faia ma sui e saunoa mo le pa’ia o le aso, ae o le susuga le Faife’au Henry Roberts o le Word of Life sa avea ma sui e tatalaina le polokalama i le tatalo ma toe fa’ai’u fo’i le fa’amoemoe i le tatalo. O fa’aaloaloga fa’ale-atunu’u sa faia fo’i e le afioga le Fa’atonu talimalo Lei’atauasa Leuga ma le matagaluega i le mamalu na sasao i maota ae a le fa’amoemoe lea.

O se va’aiga i tina e to’alua, o le a tele ina fa’aaogaina e la’ua matagaluega le maota o Mapusaga, ona o tautua o lo’o la’ua galulue ai. Leilua Stevenson mo le fa’atonu o le DHSS & Aomalo Aumoeualogo. [ata: Leua Aiono Frost]


THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.