Login

ULUA’I SAMOA NFL - FA’ASUAFA MATAI ALI’I

frostlehualani@yahoo.com
Le alo o Samoa - Faleniu, Falelima ma Lepea sa avea ma Full Back o le Arizona Bengals lea ua mae’a fa’aeaina e aiga i Falelima i le suafa “Tuioti” ua avea ai o ia ma afioga le Alo Tamalelagi.[tala tusia i totonu] [ata: Leua Aiono Frost]

Le afioga le Alo o Tamalelagi Tuioti Reagan Maui’a - Falelima, Lepea ma Faleniu

“Ou te iloa o se fa’aeaga a le pa’ia maualuga o Aiga, peita’i e maulalo le loto e talia ma le agaga fa’afetai lea fa’aeaga, ma ou fa’afetai ai i le tapua’iga i aiga i ona itu tetele ma ona itu taulagi, ae maise le nofo tapua’i a le aiga o si o’u Tama - Pili Maui’a i Faleniu Amerika Samoa, fa’afetai i le Atua ua ausia e lo outou atali’i lenei aso e fa’ao’o ai se fa’afetai i le Atua i lana fa’asoa mamana, i so’o se mea ua toina mai mo a’u, ia vi’ia ai le Atua ae le o le tagata.”

“E loloto ma sousou le moana, ae ua iloga ala o i’a, e ui lava fo’i i le lavelave o le tupu’aga o le tagata, ae iloga lava e fa’amanuiaina i o latou ala saili, taumafai ma tauivi i fita ina ia tu matila se taumafaiga e ta’ua ai le igoa pele o Samoa na lua!”

O se agaga lea i le afioga le Alo o Tamalelagi, Tuioti Reagan Maui’a, sa ta’alo mo le 3 tausaga i le Arizona Bengals. O ia sa soifua ane i Faleniu, a’oa’oina i le A’oga Tulagalua a Pava’ia’i, masi’i atoa ai le latou aiga i Sacramento Kalefonia, lea ua taunu’u ai le taumafaiga i ‘ai o evaga sa tatalia a’o a’oa’oina tama fanau - ua atoa fo’i le tino o va’atausili, lele ua lima tausaga i le malae o sailiga matati’a i le ta’aloga Lakapi Fa’a-Amerika - ae ua toe tatalia fo’i se isi ataata o taulelei, pe tua ma ni a le isi soso’oga o le taumafaiga, atonu e suia se isi ‘au e ta’alo ai, pe leai, o le a toe filifili o ia e tumau pea i le Bengals lana ta’alo i le 2012.

Ina ua fesiligia sona lagona e fa’aalia mo nai ona uso i le tatou nei lotoifale, ae na ia fa’aalia, “Aua le fa’amatu’u esea lou fa’amoemoe e tafea, pi’iama i ai, ma ia mautu lou fa’atuatua e alofa mai le Atua fa’ataunu’u ou fa’amoemoega e te fia auai e ta’alo mo so’o se ‘au football i le NFL, e le taitai ona e fa’apea mai e le mafai! E mafai! Pau lava lau mea e fai, o le Koleni ma alo ese i mea e fa’aletonu ai lou olaga, ma o’o ai oe i nisi a’afiaga e le mo’omia i lenei olaga!”

E ui ina sa o’o le a’oa’oga a Tuioti Reagan i Kalefoni, ae sa toe taliu mai ta’alo mo UH Manoa i le ‘au a le Toa a’o a’oa’oina ai fo’i o ia. Na mua’i filifilia o ia e le Miami Dolphins i le tausaga e 2007 ae na latou ta’a’alo fa’atasi ma Peko ma Fanene i le Bengals lea e fa’ato’a mae’a ai lana Konekarate mo le 3 tausaga talu ai.

O matua o lana afioga le Alo o Tamalelagi o Pili Maui’a mai Faleniu le tama, ae o si ona tina, o le faia’oga o ia, Tagiifo Maui’a mai Lepea ma Falelima i Savaii, lea na fa’apaleina o i le suafa “Tuioti” ia Tesema 30, 2011.

Sa ta’alo mai o ia i le Arizona Bengals i le tulaga o le Fulupeki, ma ua i ai lona fa’amoemoe, e fia maua e ia se ‘au e ta’alo ai, e talafeagai ma ana fuafuaga o lona aiga. Ua i ai lona atali’i o Reagan ll Maui’a, ma ua amatalia fo’i e ia lana pisinisi i Arizona e fa’aigoaina lea o le “Kava Kreations -from the Islands.”

I sona taofi fa’aalia, e tusa ai o le umi ma le fita sa fa’afeagai ma ia i ana taumafaiga mai, sa ia fa’aalia ai, “E leai se mea e le mafai ona aumaia e le Atua ia te oe, pe afai e te fa’amaoni i au taumafaiga, ou te iloa, e le’i faigofie ia te a’u fo’i latou la’u sailiga, ae ua fa’asino e le Atua le ala, ua mata’u fo’i le tagata e saili ai, ma ua tali fo’i le Atua e fa’ao’o mai fa’amanuiaga ma taunu’uga sa e mana’o i ai!  O lea e muamua ai fa’afo’i ai le vi’iga i le Atua.”

Ua fa’aalia e ia, “E tulivae ona matua ma lona aiga atoa i so’o se taimi i talosaga mo lana taumafaiga, ma e le mama fo’i ia te ia lea tulaga. E le misia i si ou tama sa’u ta’aloga e tasi, ae o Mama, ia o lo’o tausaili lava lona tofi Faifeau i a’oa’oga fa’afaifeau, ua toe lua lava ana kosi, mae’a loa lea!”

O Tuioti Reagan o le lona fa lea o le fanau e to’afitu, e to’a fa ona uso, ae to’alua ona tuafafine. O i latou uma lava o tama, e tasi lava le ala o lo’o latou tauva ai, o le ta’aloga Football ma a’oa’oina lava i Kolisi ma Iunivesite, ae o tama’ita’i o le aiga, e to’atasi, le tuafafine matua, ua a’oa’oina fa’apitoa nei mo se Tama’ita’i Fusu Fa’apolofesa!”

“O ia lava lea e masani ona fusu mo a’u, pe a o’o ina tau pa’ia mai si o’u tino ile a’oga, lea ua o’o lana taumafaiga i le fusu fa’apolofesa lea e koleni fa’apitoa nei i ai!” O si ana tala ata lea, ae o lona fa’amoemoe, ia manuia i latou uma lava ma a latou taumafaiga, e ta’ua ai le atunu’u pele o Samoa!

I lana saunoaga, afai ae toe maua se avanoa e asiasi mai ai, e le mafai ona misia le “Matai” i le isi malaga lea o le a soso’o mai, e pei o le malaga tele lea sa sau ia Iuni 2011 - Troy Polamalu Team! I le matau atu a le tusitala, ua lava tapena lea aloali’i mo lona tofi Matai o aiga, aua ua mae’a tapena lana atovailiili i pa’ia o lona afio’aga i Falelima i le Mea afio ai le Ta’auso, afio mai ai fo’i le Tonumaipe’a ma le Tafa’i, afio ai le Alo o Tamalelagi, tainane le afio mai o le Ma’opu o le Tuia’ana. Susu mai Gafa, susu mai Tanuvasamanaia ma lou Falefia, susu mai ai fo’i Alaalamatuatala ma le Ma’opu, afio mai le To’alepaiali’i, maliu mai le fofoga o Papa i lau fetalaiga Folasa. Alala maia Tamafaiga ma upu ia te oe le Alataua.

O pa’ia na o lo o puipuia i le maota i Tautaisau ma le malaefono o Si’uvave.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.