Login

U’una’ia Togiola le galulue fa’atasi o tagata ma leoleo

ausage@samoanews.com

TOGIOLA:  Mumusu tagata e fa’ailoa mea sese o lo o fai

I le tele ai o fa’asea mai ni isi o le atunu’u i le le lelei o le fa’amalosia e le Ofisa o Leoleo o tulafono ia ua mae’a ona pasia e le Fono ma sainia e le Kovana, na saunoa ai le alii kovana e fa’apea, e mana’omia le galulue fa’atasi o tagata uma e fa’amalosi ma puipui le tulafono, aua e le mafai e le to’atele o Leoleo o lo o i ai i le taimi nei ona fa’atino lea tiute.

Na ta’ua e se to’oto’o i luga o le polokalame a le alii kovana i le fa’ai’uga o le vaiaso na te’a nei, ua tele tulafono ua pasia e le fono ma saini e le kovana, peitai e foliga mai e le o lelei ona fa’amalosi e le Ofisa o Leoleo.

“Ua matua leai lava se faamalosiga o le tulafono e faasa ai le ulaula tapa’a, e oo i le tulafono e faasa ai le faalapisi ma le faaaogaina o laau faleotele leo i totonu o taavale, e le o ia i lava se galuega o fai i ai e leoleo, o le matou nuu e matua ki faaleo tele lava laau o taavale a tagata e leai ma se usitai i le tulafono,” o le faasea lea a lea tootoo i luga o le polokalame.

Na ta’ua e le to’oto’o, o ni isi o tagata a fai atu i ai i le ulaula i nofoaga o lo o fa’asa e pei o le  falema’i ma tafatafa o Ofisa o le malo, ae feita ma fa’asea ma lafo upu le fiafia ma fai mai, “e leai se feau a se isi e pule lava latou.”

O le fautuaga a le to’oto’o i le kovana, e tatau ona fa’amalosia e le malo ia leoleo, ina ia silasila toto’a i fa’afitauli o lo o tula’i mai ina ia mautinoa o lo o fa’amalosia tulafono ua uma ona pasia mo le atunu’u.

Saunoa kovana Togiola Tulafono, e le mafai ona fa’atino e leoleo a le malo le galuega o le o i tua i nu’u ma itumalo, i minute uma o le aso, ma aso uma o le vaiaso, e va’ai ma tilotilo po o ai o solitulafono, sei vagana ua galulue fa’atasi le atunu’u e ripoti ma fa’ailoa fa’afitauli ia i leoleo.

Na lagolagoina e Togiola le fa’asea a le to’oto’o lea, o lo o vaivai le faamalosia o tulafono e leoleo, peitai o le fa’afitauli ua masani ai le atunu’u o lo o tulai mai, o le ufiuifi o le mea sese o lo o fai, e musu e fa’ailoa.

“O isi tagata e fiafia tele e vala’au mai ma fa’ailoa mai mea sese o lo o tupu, ae musu e fa’ailoa lona igoa fai mai e le mana’o e iloa atu ai fua ma ia ma lona aiga, o le faafitauli la lena o loo tulai mai, o le fiafia e ufiufi, faaopoopo atu ai ma le fia lelei ma le le fia aafia i se mea, ua atili ai ona faigata i leoleo ona faatino a latou galuega o le faamalosiina lea o le tulafono,” o le saunoaga lea a le alii kovana.

“E le mafai e leoleo ona faamalosi le tulafono i minute uma ma itumalo o le aso, ae mafai ona faatino pe afai e fesoasoani mai le atunuu,” o le isi lea saunoaga a Togiola.

Saunoa Togiola, e mafua ona tele solitulafono, e aofia ai ma le totoina o fuala’au fa’asaina, ona o lo o ufiufi e tagata e le mananao e ta’u ma faailoa, e mumusu e faailoa ne’i aafia atu ai o latou igoa ma ta’u leagaina ai i latou i le nuu.

“Ua outou silafia lelei le atunuu, o le tele o solitulafono e le mafai ona iloa e leoleo sei vagana ua outou fesoasoani e faailoa mai ona faatoa mafai lea ona agai atu leoleo e faatino o latou tiute.”

Na avea le toe lagaina mai o lea mata’upu ma itu na toe fautuaina ai e le kovana tagata faigaluega a le malo, ina ia nofouta i fa’asea o lo o aumai e le atunu’u. Na ta’ua e le alii kovana, e  faamaoni fa’asea i nisi o tagata faigaluega o lo o ulaula i totonu o Ofisa, o nisi e tatala fa’amalama ona tu’u lea o le ulu i fafo ma ula le tapa’a, ona fai mai lea o lea ua alu le asu o le tapa’a i fafo.

Na fa’ailoa foi e le alii kovana e fa’apea, ua maea ona tu’uina atu sana fa’atonuga e fa’asa ai ona toe ulaula se tasi i tafatafa o so’o se fale faigaluega a le malo.

“Le atunuu e, e manaomia le tatou galulue faatasi, soia le fiafia e ufiufi solitulafono, afai e i ai ni solitulafono, faailoa mai ona matou fesoasoani atu foi lea i ai.”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.