Login

Tu’umalo afioga Senatoa Amituana’i Eteuati

ausage@samoanews.com

O le po o le Aso Faraile na te’a nei na ufitia ai paia o aiganalua i le ao pogisa, ina ua tu’ua le malo e le afioga i le ali’i Senatoa ia Amituana’i Eteuati Vailoata, i le maota gasegase o le LBJ i Fagaalu, ina ua 78 tausaga o lona soifua.

O se tala na fa’aalia ai e se tasi o ona alo, le afioga i le ali’i faipule ia Vailoata Amituana’i Eteuati le fa’ateia ai o le aiga, ona e le’i manatu se tasi o se taimi lenei o le a motusia ai le mafutaga ma le tama o le aiga, o ia fo’i o se ta’ita’i o le atunu’u i le Fono Faitulafono.

E silia laititi lava ma le lua vaiaso o fa’ataotolia le afioga i le ali’i Senatoa i le falema’i i Fagaalu ona o le gasegase o le limonia.

“O se tala e lagona ai le fa’anoanoa ina ua motusia fa’afuase’i le matou mafutaga ma si o matou tama pele, e ui matou te le’i manatu o se taimi lenei o le a matou valavala ai, peita’i matou te talitonu ua valaau le Atua ia te ia,” o le saunoaga lea a le afioga i le ali’i faipule ia Vailoata.

Saunoa Vailoata, sa i ai lona finagalo o le a latou fai aiga fiafia ma si ona tua’a i le Aso Fa’afetai, peita’i e le failoto se tasi i le finagalo tutasi o le Atua.

Sa ia taua, o lona tuaa o se tama e loto alofa, agamalu ma fiafia i so’o se tasi o lona aiga, aemaise lava i lana fanau.

“O se tama e pele ia te ia lona aiga, e loto maualalo, e fiafia fo’i e kuka ma o se tama fo’i e agamalie ona uiga,” o nisi ia o uiga na mafai ona toe manatua e le ali’i faipule e uiga isi ona tuaa ua tu’umalo.

O le afioga ia Amituana’i na soifua mai i le aso 24 Aperila, 1933 i le afioaga o Fagatogo. Sa galue o ia mo le silia i le 30 tausaga i le faleaiga a le falema’i o le LBJ, amata mai lava i Utulei seia si’itia atu i Fagaalu e pei ona i ai i le taimi nei, e pei ona fa’amaonia mai e le afioga i le ali’i faipule ia Vailoata.

Sa tofia fo’i o ia e galue i le tofi Fa’alupega mo le itumalo, a’o le’i filifilia e fai ma Senatoa mo le nofoaiga 32 e pei ona nofoia i le taimi nei.

O le afioga ia Amituana’i, o lo’o umia le tulaga o le sui ta’ita’ifono a le EFKAS i Fagaalu.

Ua i ai le fa’amoemoe o le aiga e pei ona saunoa le ali’i faipule, o le a mafai ona toe fa’ailoa mai se isi polokalama mo toe sauniga o le ali’i Senatoa, pe afai e mae’a se feiloaiga a lona aiga i se taimi o i luma.

O lo’o soifua mai pea lava i le taimi nei le faletua o le afioga i le ali’i Senatoa ia Mokamarie Vailoata , ona alo e to’afitu atoa ai ma fanau a lana fanau.

Ia fa’amaise le Agaga Paia o le Atua i le tina ma le aiga fa’avauvau, ona o le valaau paia a le Atua i le tama o le aiga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.