Login

TOGIOLA: Toe saunoaga i luma o le Fono

ausage@samoanews.com
Le afioga i le Kovana Sili ia Togiola Tulafono ma le Fofoga Fetalai o le Maota o Sui ia Savali Talavou Ale ina ua tatala aloaia le tauaofiaga lona 3 o le Nofoaiga lona 32 a le Fono Faitulafono i le taeao ananafi. [ata AF]

O le saunoaga a le afioga i le kovana sili ia Togiola Tulafono ina ua tatala aloaia le tauaofiaga lona tolu o le Nofoaiga lona 32 a le Fono Faitulafono i le taeao ananafi, sa ia faalauiloa ai e faapea, o lana saunoaga lea, o lana toe saunoaga lea i luma o le Fono Faitulafono talu ona avea o ia ma Kovana Sili o le malo o Amerika Samoa.

O se saunoaga sa tumu i le agaga o le faafetai ma le faamalo i taitai o le atunuu, taitai o le malo, taitai o pisinisi, taitai o ekalesia faapea ai pisinisi ma le atunuu atoa, ona o talosaga ma le tapuaiga a’o alofaiva le malo e faatino ona tiute tauave i le taitaiina ma le faafoeina o le malo i le tele o tausaga, atoa ai ma le tausaga na tea nei.

Na faatumulia le Fale Samoa a le Fono Faitulafono i taitai o le atunuu mo le molimauina o lenei sauniga faapitoa.

E le gata o le Kovana ma lana Kapeneta, o taitai o le Fono Faitulafono ma afioga i Senatoa faapea ai Faipule, ae sa faapea foi ona afio ai le afioga i le Faamasino sili e fai ma sui o le Faamasinoga Maualuga, aemaise ai foi le sui aoao i Uosigitone lea foi sa faatasi ai i le aso ananafi, le tofa Falemavaega Eni.

O viiga o le Atua na lagiina lea e le aufaipese a le ekalesia EFKAS mai Amanave, ina ua maea se upu faamalosi na  taitaia e le alii faifeau ia Rev. Anetere’a Misioka mai lea lava ekalesia.

I lana saunoaga faalaeiau na faamamafa ai e le susuga Rev. Misioka le taua o le tautua ma le alofa  atoa ai ma le fai o le amiotonu ina ia fiafia mai ai le Atua.

Na tomua le saunoaga a le alii kovana i lona valaauina lea o le mamalu na aofia ina ia o latou manatua nisi o soifua o tamalii o le atunuu sa avea ma taitai, lea ua fai i lagi le folauga ona o le valaau paia a le Atua, e aofia ai le afioga ia Tufele Li’amatua sa avea ma Failautusi o le Ofisa o Mataupu Tau Samoa, o le afioga i le Senatoa ia Amituanai Eteuati ma le afioga ia Tauiliili P. Tervola lea sa avea ma Faatonusili o le matagaluega o Oloa a le malo.

I lana saunoaga autu na faalauiloa ai e le alii kovana nisi o galuega ua mafai ona ausia e le malo talu mai le tausaga na tea nei, lea ua mafai ai ona tulaga feololo mai le tamaoaiga e ui o loo feagai pea ma faafitauli i le itu tau tupe.

Na faafetaia e Togiola fesoasoani tau tupe e tele mai le malo feterale, lea ua mafai ai ona fesoasoani i se vaega tele o le tamaoaiga o le atunuu.

Saunoa Togiola, o le tausaga 2011 sa malaga mai ai le atunuu ma le tele o faafitauli, o ni faafitauli na afua mai ina ua tulaga pagatia le tamaoaiga o le lalolagi i tausaga  i tua atu, sosoo mai ai loa ma siitaga e tolu o totogi amata ma i’u ina tapunia ai le kamupani i’a o le Samoa Packing, ma mafua ai loa  ona aapa atu le malo i le Fono mo le pasiaina o nisi o pili tupe e tau fesoasoani ai i lea faafitauli, peitai e ui e lei pasia uma e le fono nei pili tupe, ae sa mafai lava ona pasia na o se vaega.

Sa aofia i lana saunoga nisi o faaiuga na faia e le malo e tau faasao mai ai nisi o tupe, e pei o le faaitiitia o itula faigaluega a tagata, taofia o le toe totogiina atu o nisi o aitalafu, ma mafai ai loa ona maua sina vaega tupe feololo mo le malo i lenei tausaga.

Na faafetaia e Togiola le Fono mo le latou sao i le tau foiaina o lea faafitauli, sa ia faafetaia foi le feterale i le tele o fesoasoani tupe sa tuuina mai na mafai ai ona maua se isi fesoasoani mo le atunuu, e pei o le polokalame a le ARRA, nonogatupe sa faatautaia e le Faletupe o Atinae, atoa ai ma le vaega tupe sa tuuina mai e faatupe ai polokalame ina ua tuanai le galulolo.

O nisi o atinae tumau o loo taumafai i ai le malo e pei ona saunoa Togiola, e le gata o taumafaiga a le kamupani telefoni o le BlueSky, ae e oo foi i galuega faatino a le ASTCA e pei ona i ai le uaea o fesootaiga i lalo o le sami lea o loo faaauau ai pea galuega i le taimi nei.

Sa ia taua foi le toe faafoi mai i le malo o le Vaega Tosovaa ma le faamoemoe o le a mafai ona fesoasoani i se vaega tele o le atina’e, aemaise ai o fuafuaga mo le faaleleia o aoaoga e le gata o fanau aoga, ae o le toe aoaoina o fanau aoga.

Saunoa Togiola, o le faaiva ai lenei ona tulai i luma o le Fono Faitulafono, talu ona avea o ia ma Kovana. Na amata mai i le nofoaiga lona 28 seia oo mai i le nofoaiga lona 32 lenei.

I le faaiuga o lana saunoaga sa ia talosagaina ai taitai o le fono, ina ia faaauau pea le galulue faatasi ma le malo, ina ia manuia ai fuafuaga uma o loo taumafai i ai mo le atunuu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.