Login

Tala o le Vaifanua

ausage@samoanews.com

GUGULU LE TO’ATELE I SUIGA FOU I LE LBJ

E o atu e fai talavai i le falema’i, ae fai mai e totogi le 10% o le pili tuai o lo o ta’atia i le ofisa o le falema’i. 

Na fa’aalia e ni isi o le atunu’u i le Samoa News le fa’ateia o i latou ina ua agai atu i le falemai i le fa’aiuga o le vaiaso na te’a nei, ae tapa mai e le vaega o lo o totogi ai tupe a le falema’i, le le mafai ona faia talavai pe aumai i fafo vaila’au, se’ia vagana ua totogi le 10% o a latou pili tuai.

O se tina o lo o i ai sana pili tuai e $542 i le falema’i, na aga’i atu ma sona alo e fia va’ai le foma’i, ae tali le tama’ita’i kesia, e le mafai ona maua fuala’au se’i vagana ua totogi le 10% o lana pili tuai.

E fa’apena fo’i le fa’ate’ia o se tama mai i Tafuna, le susuga Peniamina, ona o lenei suiga ua faia, e aunoa ma le logoina muamua o le atunu’u, e ala i se fa’aaliga po o se fa’asalalauga.

“E leai se tupe e mafai ona ou totogi ai le 10% o le aitalafu tuai a lo’u aiga o lo o i ai i le falemai, ae o lea lava e totogi lemu atu pe afai ae lava le faasoa,” o le saunoaga lea a Peniamina ina ua talanoa ma le Samoa News.

“E le talafeagai lea tulaga mo le atunuu pe afai o se gasegase tigaina e manaomia ni fualaau po o se togafitiga, ae ua le mafai ona faia ona o le le totogiina o le pili,” o le faasea lea Peniamina.

Fai mai le tomumu a le isi olomatua sa i ai i le falemai, ua avea le le pasia o siitaga a le falemai ma itu latou saili ai se isi auala e tu’u mai ai le avega i le atunu’u.

Na taua e se sui sinia o le falemai i Fagaalu e lei finagalo e faailoa lona suafa, e sa’o o lea ua amata fa’amamalu se tasi o aiaiga fou a le falemai, i le aoina o aitalafu mai tagata e lei totogia, mo tautua ua uma ona faia mo i latou.

Na taua foi e se tamaitai fomai e lei finagalo e fa’ailoa lona suafa, e tatau lava ona totogi e le atunuu a latou pili tuai ina nei avea ma faafitauli mo nisi o le atunuu o loo manaomia ni togafitiga mo lo latou soifua maloloina.

Na faailoa e le pulesili o le LBJ ia Mike Gerstenberger i se iloiloga faalauaitele sa faia ma le atunuu ao lumanai le kerisimasi na tea nei, mai le aofai e $2.8 miliona sa tatau ona maua mai e le falemai mai tautua ua uma ona ofoina atu i le atunuu i le 2011, e na o le 22% o lea tupe ua maea ona totogi, ae o le 88% o lo o tulituli pea.

Na taua e le alii pule, o se tasi lenei o fa’afitauli ua mafua ai foi tulaga fa’aletonu i le itu tau tupe, o le tuai ona totogi e le atunuu o a latou pili i le falemai.

A’AFIA LE LAFOGA PE A LE TOTOGI SALA FA’AMASINOGA

Ua tuana’i atu aso fiafia, o le Kerisimasi ma le fa’afeiloaiga o le Tausaga Fou, ae ua amata nei ona tulimata’i e tagata faigaluega o le atunu’u ia le vaitaimi e faila ai lafoga, i leisi lua masina o loma nei.

Ae peita’i, ua lapata’i mai e le ali’i fa’amasino o Fa’amasinoga Fa’aitumalo, o John L. Ward, e ono tuai ona maua lafoga a ni isi o le atunu’u, e le i totogia ni a latou sala i le fale fa’amasino, ona o solitulagafono i luga o le alatele (traffic fines).

Na fa’aalia e Ward, o tausaga uma lava, e sauni ai e le aufaigaluega a le fa’amasinoga ia se lisi o suafa o i latou, e le’i totogia ni a latou sala i le fa’amasinoga, atoa ai ma le aofa’iga o le tupe e tatau ona totogi.

O lea lisi, e fa’ao’o atu i Ofisa o Tupe ma le Ofisa o Lafoga i le ulua’i vaiaso o Ianuari, ma ua mae’a ona tu’uina atu le pule i le Tausitupe o le Malo, e na te to’esea mai ai, i lafoga a nei tagata, ia le aofa’iga o le tupe, o lo o nofo sala ai i le fa’amasinoga.

Na fa’amanino mai e Ward e fa’apea, o nei sala, e mo solitulafono mama, ma e aoina e le Fa’amasinoga ona teu lea i totonu o le Teugatupe Lautele a le malo. 

Na fa’aalia mai fo’i e Ward e fa’apea, o lenei tausaga, o le a fa’ao’o atu fo’i lenei lisi, i le Ofisa o le Loia Sili ma le Ofisa o Femalagaaiga.  Ona i lalo o le tulafono a le malo o Amerika Samoa, o sala a i latou e le o ni tagatanu’u moni po o tagata mai fafo, e pa’u i luga o a latou ‘sponsors’ e totogia nei tupe.

Ua u’una’ia e Ward ia le mamalu o le atunu’u, i latou o lo o silafia o lo o i ai ni a latou sala i le fa’amasinoga e le’i totogia, ina ia o’o atu ma totogia loa, ina ia aua ne’i a’afia ai a latou lafoga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.