Login

Tala o Faamasinoga

ausage@samoanews.com
SN file photo

DANNY MASE

O le aso 26 Ianuari 2012 ua faatulaga e fofogaina ai le fa’asalaga a le Faamasinoga Maualuga, fa’asaga ia Danny Mase, lea ua ta’usala i le moliaga o le fa’ao’olima i le tulaga lua, o se solitulafono e mafai ona loka ai seisi i le lima tausaga, po o se salatupe e $5,000 po o fa’asalaga e lua.

Na molia Mase i le tulafono ina ua na togia se ta’avale i se fagu pia ma manu’a ai foliga o se ‘alu’alutoto e lua tausaga.

I se vaega o le maliliega ua sainia e Mase ma le malo, ua ta’utino ai Mase i lona faia o gaioiga e pei ona molia ai o ia.

Sa ta’utino Mase i luma o le fa’amasinoga, e na te le’i faia lenei tulaga ma se fa’amoemoega e manu’a ai se tasi.

Ua malilie loia a itu e lua o le a faatali le tuuina atu o ni a laua faafinauga mo se faasalaga e ono tuuina atu mo Mase, se’i maea ona laua faitauina se ripoti mai le Ofisa Faanofovaavaaia e uiga i lenei mataupu, peitai ua malamalama Mase ma iloa, tusa lava pe talosaga loia i le faamasinoga mo se faasalaga mama mo ia, e pule le faamasinoga pe talia pe teena ia fautuaga.

Ina ua talia e le faamasinoga le maliliega a Mase ma le malo, na talosaga ai loa le malo ina ia solofua isi moliaga uma o loo totoe ai faasaga i le ua molia, lea foi na talia e le faamasinoga.

ASOTASI MAIAVA

O le alii talavou e 20 tausaga lea na to’atolu i ai alii na osofaia le faleoloa o Mu i Ottoville, ua ia ta’utino i luma o le Fa’amasinoga Maualuga i le vaiaso na te’a nei, e fa’amaonia lona fesoasoani i isi tagata i le solia o le tulafono o le faomea faamalosi, ina ua latou ulufale ma ni alii se toalua e laiti i lalo o le tulafono i totonu o le faleoloa, ma latou gaoia ni oloa sa i totonu.

O le alii o Asotasi Maiava na uluai tu’ua’ia e le malo i moli’aga mamafa e aofia ai le faomea i le tulaga muamua, taupulepule e fa’atino le solitulafono o le faomea, atoa ai ma le faaaoga faasolitulafono o se a’upega.

Ae i lalo o le maliliega sa ia sainia ma le malo, lea foi na talia e le faamasinoga i le vaiaso na tea nei, ua tausalaina ai o ia i le moliaga o le taupulepule ma nisi e faatino le solitulafono o le talepe fale, ae solofua ai e le faamasinoga isi moliaga o loo totoe ai.

I le tali ioe ai o Maiava i le solitulafono e pei ona tausalaina ai o ia sa ia taua ai e faapea, sa latou taupulepule ma ni alii laiti se toalua, e 14 tausaga ma le 17 tausaga le matutua, ina ia latou osofaia le faleoloa o Mu i Ottoville, i le taimi sa faia ai sa latou inugapia.

Na fa’amaonia e Maiava lona avatua o se fana pepelo ma latou ulufale fa’amalosi ai i totonu o le faleoloa, ma latou ave faamalosi ai ni oloa e pei o pepe faitelefoni, pepa sikaleti, ma se vaega tupe laititi mai totonu o le faleoloa.

Ua malamalama Maiava i vaega uma o le latou maliliega ma le malo lea ua talia e le faamasinoga, e aofia ai le pule o le faamasinoga pe talia ni fautuaga o le a tuuina atu e loia mo se faasalaga mo ia.

Ua ia malamalama foi, e le mafai ona toe suia lana tali ioe ua tuuina atu pe afai e tuuina mai se faasalaga a le faamasinoga ae le tusa ai ma lona manao.

O lo o taofia pea i le toese le alii o Maiava e faatali ai le aso 26 Ianuari 2012 lea ua faamoemoe e lau ai lona faasalaga.

SOPI SENIO

Na te’ena e Sopi Senio tu’uaiga o le fa’ao’olima i le tulaga muamua ma le fa’atupu vevesi i nofoaga faitele, ina ua tulai i luma o le Faamasinoga Maualuga i le vaiaso na tea nei. I lona te’ena ai o tuuaiga a le malo, ua faatulaga ai loa e le faamasinoga lana uluai iloiloga e faia lea i le aso 23 Ianuari 2012.

O le moliaga mamafa o lo o tu’ua’ia ai Senio, na afua mai i se fa’alavelave na tulai mai i le amataga o le masina nei i Leone, ina ua ia so’aina se isi alii i lana taavale, e mafua mai i se feeseeseaiga tau i fanua.

Ua tatala i tua Senio mai i le falepuipui, i lalo o ni poloa’iga mai i le fa’amasinoga, ina ua mae’a ona ia totogia le $25,000 e pei ona sa fa’atulaga e le fa’amasinoga.

PIO FAGAAUTAU

O le alii talavou lea o lo o tu’uaia i lona ulufale faamalosi lea i totonu o le fale a se tasi o lona au aiga i Amaluia, ma ia gaoia ai ni meaaoga mai totonu o le fale, ua faatulaga e le faamasinoga maualuga le aso 13 Ianuari 2012 e faia ai le ulua’i iloiloga o lana mataupu.

Na te’ena e le alii o Pio Fagaautau moliaga o le talepe fale i le tulaga muamua ma le gaoi ina ua tulai i luma o le faamasinoga maualuga i le aso Faraile na tea nei, ma o lana loia o Leslie Cardin na faaleoina lana tali tetee faasaga i tuuaiga a le malo.

I fa’amaumauga a le fa’amasinoga o lo o taua ai, pe tusa o le itula e 5:00 i le vaveao o le aso 8 Tesema, o lo o tu’ua’ia ai e le malo na ulufale faamalosi ai Fagaautau i totonu o le fale o se tasi o lona auaiga i Amaluia, ma ia gaoia ai se telefoni, seevae atoa ai ma se tinoitupe.

O lo o taofia pea i le toese i Tafuna le ua molia ina ua le mafai ona ia totogia le $15,000 lea ua faatulaga e tatala ai o ia i tua.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.