Login

Tala o Faamasinoga

ausage@samoanews.com

GAFATASI TAVEUVEU & LOGO FAAMAUSILI

O alii talavou e toalua ia o lo o tu’ua’ia i lo la fa’ao’o o ni manu’a i se isi alii i le nu’u o Se’etaga, e ala i lo la fa’aaogaina o se fagupia ma o la lima, ua fa’atulaga e le Fa’amasinoga Maualuga le aso 4 Iulai 2012 e faia ai le la fa’amasinoga autu, e ui o lo o fa’aauau pea talanoaga a itu e lua mo se maliliega.

O Gafatasi Taveuveu ma Logo Faamausili, o lo o tu’ua’ia e le malo i le moliaga mamafa e tasi o le faaoolima i le tulaga lua, ma le moliaga mama o le faatupu vevesi i nofoaga faitele.

O ia moliaga na afua mai se faalavelave na tulai mai i le vaiaso muamua o le masina o Novema i Seetaga, lea na manu’a tigaina ai se alii, ina ua fasi e Gafatasi ma Logo, e pei ona tu’ua’ia ai i la’ua e le malo.

O le vaiaso nei na faatulaga e faia ai le uluai iloiloga o lenei mataupu, peitai na faailoa e tamaitai loia fautua o loo tulai mo Gafatasi ma Logo ia Ruth Risch-Fuatagavi ma Leslie Cardin, o loo faaauau pea talanoaga mo se maliliega i lenei mataupu, faapea ai ma le manaomia o se isi taimi faaopoopo mo nisi suesuega, ona o nisi o faamatalaga fou ua mafai ona maua mai e le malo e uiga i lenei mataupu.

O le aso 9 o Ianuari 2012 lea ua toe tolopo i ai le uluai iloiloga o lenei mataupu ma le tuutuuga, afai e oo atu i le aso lea e lei maua lava se maliliega, o le a faataunuuina loa le faamasinoga autu i le masina o Iuni.

O loo tumau pea poloaiga a le faamasinoga o loo tatala ai Gafatasi ma Logo i tua mai le toese i Tafuna.

SAUNI LE TAMA FAI E TALI IOE I ONA MOLIAGA

O le Tama Fai lea o lo o tuuaia i lona faia o ni amioga mataga i lona afafine fai, ua i ai le faamoemoe o le Aso Tofi o le vaiaso nei lea o le a tuu aloaia atu ai lana tali ioe i moliaga ia ua manatu le malo na te ioeina, i lalo o se maliliega ua maea ona sainia ma ua tuuina atu foi i le faamasinoga maualuga.

O le vaiaso nei na faailoa ai e loia i le alii faamasino sili lagolago ia Lyle L. Richmond, ua maea ona sainia e le ua molia ma le malo se maliliega e faamuta ai lenei mataupu, ma ua uma foi ona tuuina atu i luma o le faamasinoga.

Ae talu ai e lei lava se taimi e iloilo ma faitau ai e alii faamasino le maliliega ua maea ona sainia, o le mafuaaga lea ua toe tolopo ai lenei mataupu i le aso Tofi o le vaiaso nei, e fofoga aloaia ai loa le tali ioe a le ua molia, lea o loo taofia pea i le toese i Tafuna i le taimi nei e aunoa ma se tupe na faatulaga e tatala ai o ia, ona o le tulaga matuia o moliaga o loo tuuaia ai o ia.

O le step father e 49 tausaga  le matua o loo tuuaia i le faiaiga faamalosi, faia o amioga mataga, faiaiga i se tagata e aiga i ai, atoa ai ma lona faia o ni gaioiga e ono lamatia ai le soifua maloloina o se fanau laititi.

MARIAIVA MAALONA

O le tamaita’i mai Pago Pago lea na taofia i le falema’i i le masina na te’a nei, ina ua manu’a i se vevesi na tulai mai i le va o ia ma le isi foi tamaitai, na tulai i luma o le faamasinoga i le taeao ananafi, mo le tuuina atu o lana tali e tusa ai o moliaga ua faia e le malo faasaga ia te ia.

O moliaga ua faila e le malo faasaga ia Mariaiva Maalona e aofia ai le faaoolima i le tulaga tolu, ma le faatupu vevesi i nofoaga faitele.

O se faalavelave na tulai mai i le aso 19 Novema i Pago Pago, ina ua fufusu le ua molia ma le isi foi tamaitai lea foi o loo tuuaia e le malo i le mataupu lava lenei, na faai’u ai ina ua u e le isi tamaitai le taliga o le ua molia ma taofia ai loa o ia i le falemai mo le faia o ni togafitiga i lona manu’a.

Na faatali le malo sei malosi mai Mariaiva ona faatoa faila lea o moliaga faasaga ia te ia, ma o le vaiaso nei na tulai ai loa o ia i luma o le faamasinoga, ma ia teena ai moliaga a le malo.

O le aso 22 Tesema lea ua faatulaga e toe fofogaina ai lana mataupu, ma ua poloaina o ia e le faamasinoga e aua nei ona toe taumafai e faafesootai le tamaitai lea na la vevesi, pe na te toe soliina foi se tulafono a le malo, a ia auai i ona faamasinoga uma ma fesootai vavalalata ma lana loia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.