Login

Tala o Faamasinoga

ausage@samoanews.com

ANDRE VILLAR

O le Aso Faraile o le vaiaso nei lea ua fa’amoemoe e o’o atu i ai, ua mautu le maliliega lea ua fa’amoemoe le malo latou te sainia ma le alii o Andre Villar, e pei ona fa’aalia e lana loia, o Leslie Cardin, i luma o le Fa’amasinoga Maualuga, ina ua vala’au lenei mata’upu.

E le i fa’ailoa e Cardin tu’utu’uga o lea maliliega.

O Villar o lo o tu’ua’ia e le malo i moli’aga mamafa e tolu e aofia ai le talepe fale i le tulaga  muamua, lua moli’aga o le gaoi, atoa ai ma le moli’aga mama o le fa’aleaga meatotino i le tulaga tolu, ona o se fa’alavelave na tulai mai i le masina o Oketopa 2011, lea o lo o tu’ua’ia ai o ia i lona ulufale fa’amalosi i totonu o le lotoa a le Falemai i Tafuna, ma ia fa’aleagaina ni vaega o ona ofisa e aofia ai ma lona ave fa’agaoi o ni ta’avale se lua a le falemai.

O lo o taofia pea Villar i le to’ese i Tafuna ina ua le mafai ona ia totogia le vaega tupe lea sa fa’atulaga e le fa’amasinoga e tatala ai o ia i tua.

FAILA MOLIAGA MAMAFA FAASAGA I LE AU TALEPE FALE

O le taeao ananafi na fa’atoa faila ai e le malo moliaga mamafa fa’aopoopo, e fa’asaga i alii laiti e ta’i 15 tausaga le matutua, lea ua tu’ua’ia i lo la osofaia o se faleoloa i Satala i le fa’ai’uga o le vaiaso na te’a nei.

E ta’i tolu moliaga mamafa ua tu’ua’ia ai i laua nei, lea e aofia ai moliaga ta’ilua o le talepe fale i le tulaga muamua, fa’apea ai ma le moliaga e tasi o le gaoi.

I fa’amaumauga a le fa’amasinoga o lo o taua ai, o le po o le aso 5 o Ianuari, na osofaia ai e i laua nei se faleoloa i Satala, ma la gaoia ai ni oloa, ae o le po o le Aso Faraile na soso’o ai, na o la toe taumafai e osofa’i lea faleoloa, ae maua ai loa i la’ua.

Ua talia e le fa’amasinoga le talosaga a le loia fautua mo le malo ia Terri Bullinger ina ia tatala i tua i laua e fa’atali ai le toe vala’auina o le la mataupu, ina ia maua ai le avanoa e faaauau ai a laua aoaoga.

Ua fa’atonuina nei ali’i ina ia o la le toe tu’ua o la aiga, i le va o le 6 i le afiafi ma le 6 i le taeao, sei vagana ua latou malaga faatasi ma nisi o laua matua.

Ua fa’asa ona o la toe o’o i le faleoloa na la osofa’ia pe toe tia’i a’oga.

O le aso 25 Ianuari ua fa’atulaga e toe fofogaina ai le la mataupu.

IOE FANAU LAITI I MOLIAGA O LE INUPIA AE LEI ATOA 21 TAUSAGA

E toalua ni fanau talavou ua ioeina, i le taeao ananafi, moliaga sa tu’ua’ia ai i laua e le malo i le masina na te’a nei, i le tagofia o le ava malosi ae lei atoa le tai 21 tausaga le matutua.

O le tamaitai e 17 tausaga sa molia i lona tagofia o le ava malosi ae lei atoa le 21 tausaga i le aso 15 Tesema, ae o le alii e 16 tausaga sa ia ioeina moliaga o le inupia ae lei atoa le 21 tausaga faapea ai ma le faatupu vevesi i nofoaga faitele, ona o se faalavelave lea na mafua na tulai mai i Pago Pago i le aso 17 o Tesema.

Na faailoa e i laua uma nei i le faamasinoga, o pati sa faia a i laua ma nisi o a laua uo sa maua ai le avanoa la te tagofia ai le ava malosi.

Ua faatali se faaiuga a le faamasinoga mo i laua nei i se ripoti o le a saunia e le Ofisa Faanofovaavaaia, ina ia mafai ai ona vaavaai le faamasinoga i se ituaiga faasalaga talafeagai e fetaui mo i laua nei, e le gata e fautuaina ai i laua mo le agai i luma, ae foia ai foi le toe tulai mai o nisi solitulafono i le lumanai, e pei ona saunoa le alii faamasino ia John Ward II.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.