Login

Tala o Faamasinoga

ausage@samoanews.com
ata: Samoa News

SOLOFUA MOLIAGA NA TUUAIA AI NI TAMAITAI SE TOAFA

Ua solofua e le Fa’amasinoga Fa’aitumalo moli’aga sa tu’ua’ia ai e le malo ni tama’ita’i se to’afa mai Fatumafuti, ona o le fa’alavelave lea na tula’i mai i le Aso Fa’afetai na te’a nei, i lo latou fa’ao’olima i se tamaitai na ta’ele ma ni isi o lona aiga i Fatumafuti lava.

O i latou e to’afa e aofia ai Serrah Mauga, Evelyn Mauga, Le’alai Mauga ma Simaima Mila na tuuaia uma i le fa’ao’olima i le tulaga muamua, atoa ai ma le fa’atupu vevesi i nofoaga faitele, peita’i ina ua mae’a ona iloilo e loia a i latou nei e toafa faamaumauga uma e uiga i lenei mataupu, atoa ai ma se ata video na mafai ona pu’eina e se tagata i le taimi na tulai mai ai lenei faalavelave, na tu’uina atu ai loa se talosaga i luma o le fa’amasinoga ina ia solofua ai moliaga fa’asaga ia te i latou nei.

Na taua e le tamaitai loia fautua o Leslie Cardin lea na tulai mo le isi o i latou sa tuuaia, o se tasi o mafuaaga ua ala ai ona solofua moliaga mamafa nei, ua fai lava si mamafa o moliaga na  faia faasaga ia i latou nei.

MIKAELE AULAUMEA

O le alii e 20 tausaga le matua lea na ta’usala e le fa’amasinoga i le moli’aga o le gaoi, na tatala i tua i le vaiaso na te’a nei ina ua manatu le fa’amasinoga maualuga, o le a taofi lona tuliga o le 28 masina i le to’ese, o se tasi lea o tu’utu’uga o lana fa’anofova’ava’aia e 7 tausaga, ae ua lava masina e 9 lea ua maea ona ia tuli e fai ma ona fa’asalaga.

O le alii o Mikaele Aulaumea na tu’ua’ia e le malo i moli’aga e fa e aofia ai moliaga e lua o le gaoi, atoa ai ma moliaga e lua o le talepe fale, ae i se maliliega sa ia sainia ma le malo i le aso 16 Novema, na ia tali ioe ai i le moliaga e tasi o le gaoi ae solofua e le malo isi moliaga e tolu na totoe ai.

Na fa’ato’ese Aulaumea i le faamasinoga, ma ia talosagaina se avanoa e toe foi atu ai i lona aiga e mafuta ma ona matua. Sa ia faatoese foi i aiga e ana ia faleoloa e lua ia sa latou osofaia i Leone, ina ia faamagalo o ia.

Na malilie loia e lua ina ia aua nei toe tuuina atu e le faamasinoga se isi faasalaga faafalepuipui ia Aulaumea, ae ua lava le 9 masina lea ua maea ona ia tuliina e fai ma ona faasalaga i lenei mataupu.

Na taua e le loia a lenei alii o Ruth Risch-Fuatagavi, afai e toe  tuu atu e le faamasinoga se isi faasalaga faafalepuipui i lenei alii talavou, o le a atili ai ona avea o ia ma tagata solitulafono, ae afai e tuuina atu o ia e faanofovaavaaia, o le a mafai ona ia aoaoina nisi lesona taua mo lona olaga.

Saunoa le alii faamasino sili lagolago ia Lyle L. Richmond, o se tasi o itu o loo tuu fesili ai le faamasinoga, pe aisea na le molia ai e le malo alii laiti e toalua ia na mafua ai le solitulafono ua molia ai Aulaumea.

Na faamatala e le ua molia i le faamasinoga e faapea, o ia sa ‘ona i le po na tupu ai le faalavelave, ae na te’i ina ua o atu ni alii laiti se toalua ma tauanau o ia latou te o e talepe le fale falaoa o Pritchard’s Bakery ma le faleoloa o Christopher.

Na tautino Aulaumea o ia na talepeina le faitotoa o le fale falaoa o Pritchard ma ia gaoia mai ai ni oloa i totonu e aofia ai pepa sikaleti, ofu ma pia lea e silia ma le $100 le tau aofai, ae o alii laiti e toalua na latou o na talepeina le faleoloa o Christopher, ae o ia sa tu i fafo e vaai ni tagata e o atu.

Ao faanofovaavaaia ai Aulaumea, ua faasa e le faamasinoga ona ia toe tagofia le ava malosi, pe na te toe soliina foi se tulafono, a ia auai i ni aoaoga faa faufautua e fesoasoani ai i le faafitauli o le tagofia o le ava malosi, o le a mafai foi ona suesueina e le ofisa faanofovaavaaia poo ni leoleo lona tino ma ana mea totino, ina ia iloa ai na te le o toe tagofia le ava malosi ma fualaau oona.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.