Login

Tala o Faamasinoga

ausage@samoanews.com

O le ali’i lea na ulufale fa’amalosi i totonu o se fale a se tasi o lona aiga i Amaluia ma ave fa’agaoi ni mea aoga, ua tu’ua’ia nei e le malo i moli’aga mamafa e lua, o le talepe fale i le tulaga muamua ma le gaoi.

I fa’amaumauga a le fa’amasinoga o lo o ta’ua ai e fa’apea, i le vaveao o le aso 8 Tesema na tea nei pe tusa o le itula e 5:00, na ulufale faamalosi ai le alii o Pio Fagaautau i totonu o se fale ma ia gaoia ni mea aoga e aofia ai ni telefoni feaveai, seevae ma se tinoitupe.

O lo o tu’uaia e le malo e fa’apea, na te’i le tagata e ana ia le fale ina ua ala a’e i luga o lo o i ai Fagaautau i totonu o lona fale.

E $15,000 le vaega tupe lea ua faatulaga e le fa’amasinoga e totogi, ona fa’atoa mafai lea ona tatala Fagaautau i tua mai le toese. Afai ae mafai ona tatala o ia i tua, ua poloaina e le faamasinoga o ia e aua nei toe alu i le fale o lona aiga lea na tulai mai ai le faalavelave, pe taumafai foi i soo se auala e faafesootai i latou.

Ua faasa ona ia toe tagofia le ava malosi, pe toe soli se isi tulafono a le malo, a ia tuuina atu ona pepa malaga e taofi e le malo, ma ia aua nei taumafai foi e sola ese ma le atunuu.

O le uluai iloiloga o lenei mataupu ua faatulaga lea i le taeao o le aso Tofi o le vaiaso nei, lea o le a iloilo ai e le faamasinoga mau a le malo, pe faamaonia sa soli se tulafono, ae o Fagaautau foi lea o loo tuuaia i le soliina o le tulafono.

Afai ae faamaonia e le faamasinoga mau o le a tuuina atu e le malo e uiga i lenei mataupu, ona tuuina atu loa lea o le mataupu a Fagaautau i luma o le faamasinoga maualuga, e faataunuu ai sona faamasinoga autu, pe o le faia foi lea o se maliliega ma le malo e faamuta ai lenei mataupu.

FASIA FETUAO

O le vaiaso na te’a nei na toe loka ai e leoleo le alii o Fasia Fetuao, ona o tuuaiga i lona tagofia lea o le ava malosi i nofoaga faasaina, o se fale faatali pasi lea i Fagatogo, atoa ai ma lona faia o ni gaioiga e ono save’uina ai le nonofo filemu o tagata lautele.

Na teena e Fetuao tuuaiga o le faatupu vevesi ma le inupia i nofoaga faitele ina ua tulai i luma o le faamasinoga faaitumalo i le aso Faraile na tea nei, ma ua faatulaga ai loa le isi ana  iloiloga e faia  lea i le aso Faraile o le vaiaso nei, lea o le a iloilo ai e le faamasinoga faamaumauga a le Ofisa Faanofovaavaaia, pe ua soli e Fetuao poloaiga o lana faanofovaavaaia, lea e aofia ai le aua lea ne’i ona toe soliina se tulafono, atoa ai ma le faasa ona ia toe tagofia le ava malosi.

E $300 le tupe lea ua faatulaga e le faamasinoga e totogi ona faatoa mafai lea ona tatala i tua Fetuao.

SOPI SENIO

O le tama lea o loo tuuaia e le malo i lona so’aina lea o se isi tama i lana taavale, e mafua mai ona o ni feeseeseaiga tau i fanua, ua faatulaga e le faamasinoga faaitumalo lana uluai iloiloga, e faia lea i le taeao o le aso Tofi o le vaiaso nei, ina ua maea ona faila e le malo moliaga faaopoopo faasaga ia te ia i le aso Faraile na tea nei.

E ese mai i le uluai moliaga o le faatupu vevesi sa tuuaia ai Sopi Senio, ua faaopoopo atu nei i ai ma le moliaga mamafa o le faaoolima i le tulaga muamua, o se solitulafono e mafai ona faasala ai se tasi i le toese mo le olaga atoa, pe faasala foi i le 10 e oo atu i le 30 tausaga i le falepuipui, atoa ai ma le isi moliaga o le faaleaga meatotino.

I faamaumauga a le faamasinoga, o loo tuuaia ai Senio i lona taumafai lea e faaoo ni manu’a tuga i le alii na aafia, e ala i lona so’aina lea o ia i lana taavale.

Ua poloaina e le faamasinoga Senio e aua nei toe taumafai e faafesootai le alii na aafia i lenei mataupu, ae ia tuuina atu ona pepa malaga e taofi e le malo, ma ia aua foi nei taumafai e sola ese ma le atunuu.

Ua lapataia o ia e aua nei ona toe soliina se isi tulafono a le malo, a ia fesootai ma lana loia i soo se taimi valaauina ai lana mataupu.

E ui sa talosaga lana loia o Mike White ina ia faaitiitia le tupe e tatala ai o ia i tua, peita:i na lagolagoina e le faamasinoga le faafinauga a le malo ina ia faatumauina pea le tupe tatala i le $25,000, ona o le matuia o tuuaiga o loo faia faasaga  i lenei tama.

O loo taofia pea Senio i le toese sei vagana ua totogi le tupe ona tatala ai loa lea o ia i tua, e faatali ai le isi ana iloiloga lea ua faatulaga e le faamasinoga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.