Login

Tala ‘oto’oto mai Samoa

TU’UA’IA STEPHEN BACHOP I LE FA’AO’OLIMA

O se ali’i lauiloa i le fa’agatama o le Lakapi, lea fo’i na ta’alo i le ‘au a le Manu Samoa, o Stephen Bachop, lea ua molia i le fa’ao’olima i lana uo teine, ma sa pu’eina lea gaioiga i mea pu’eata a le CCTV, i luma tonu lava o le ofisa leoleo tutotonu i Ueligitone.

Ua tu’ua’ia e le ofisa a leoleo ia Bachop i le fa’ao’olima, ina ua na toso fa’amalosi lana uo teine aga’i i se tama’i ta’avale.

Ua i a’ao nei o le loia a Bachop ia se kopi o le ata na pu’eina e le CCTV.

O le aso 24 o Oketopa lea o lo o ta’ua na tula’i mai ai lenei fa’alavelave, i luma o le ofisa leoleo, ina ua fa’ato’a mae’a fa’afiafiaga mo le sami o le malo a le All Blacks, i le latou sa’iliga siamupini ma Falani mo le Ipu o le Lalolagi.

E le gata i le molia o Bachop i le fa’ao’olima i se tama’ita’i, ae fa’apea fo’i seisi ali’i, atoa ai ma lona tete’e i taumafaiga a leoleo e fa’atino o latou tiute, o lona umia o ni tulaga e fa’aaogaina ai fuala’au fa’asaina, atoa ai ma lona umia o ni fuala’au fa’asaina.

E tusa ai ma le ata na mafai ona pu’e e le CCTV lea o lo o i luma o le ofisa leoleo, na fa’aalia ai le taumafai o Bachop e toso le lima o lana uo teine, aga’i i se ta’avale la’upasese, ae feosofi mai ni tagata se to’alua e fesoasoani i le tama’ita’i.

E le’i maua i le masini pu’e ata ia le tete’e o Bachop a’o taumafai leoleo e fa’atino o latou tiute.  Ae o fuala’au fa’asaina, o lo o masalomia, na maua ina ua su’esu’eina e leoleo le tino o lenei ali’i.

Ua mae’a ona tula’i le ua molia i luma o le Fa’amasinoga Fa’aitumalo i Ueligitone ma ua mae’a ona ia tete’e i ona moliaga, ma o le masina o Fepuari ua fa’atulaga e amata ai ona iloiloga.

Na fa’amaonia e leoleo i luma o le fa’amasinoga, le taumafai o Bachop e fai sa latou maliliega ma le ofisa a leoleo, e na te ioe ai i ona tu’ua’iga ae o le a faia e Bachop ni galuega aua le lelei o le atunu’u, ae o le a molia o ia i le tulafono.  Ae peita’i, na te’ena lea tulaga e le fa’amasinoga.

O Bachop na ta’alo i le ‘au a le Manu Samoa i le Ta’amilosaga mo le Ipu o le Laloalgi i le 1991.  Ae na amata ona ta’alo mo le All Blacks a Niu Sila i le 1992.

LEVAOPOLO:  LE TUSA MA LE TULAFONO LE FA’ATE’A O AIONO

Na fa’aalia e se tasi o ali’i Faipule, le susuga Levaopolo Talatonu, e fa’apea, le le alagatatau ma tulaga o le tulafono, ia le fa’ate’a o Aiono Aleni Sofara mai i lana galuega i le EPC.  Na ta’ua e Levaopolo, ua avea lenei fa’ai’uga ma tulaga, ua ave’esea ai aia tatau o Aiono, e maua ai ana penefiti faigaluega.

Ua talosagaina e Levaopolo ia le malo, ina ia fa’alauiloa fa’alaua’itele mai le fa’ai’uga o su’esu’ega a le Ofisa Su’etusi lea sa fa’atonuina e le Kapeneta, ina ia fa’amanino ai lenei mata’upu.

O le vaiaso ua mavae na maua ai e Aiono lana tusi fa’ate’a mai i le EPC, e fa’amuta ai ona tiute mai i le aso 25 o Novema, 2011.  Ma ua sailia nei e Aiono se fautuaga fa’aletulafono, e fa’asagai le EPC.

O le fa’amalolo o Aiono mai i lana galuega, o se fa’ai’uga na faia ona o se su’esu’ega sa fa’atonuina e le Kapeneta i le masina o Iulai, lea na a’afia ai ma Lesaisaea Reupena Matafeo, os e tasi fo’i na faigaluega i le EPC.

Na ta’ua e Aiono e fa’apea, na fa’atonuina e le kapeneta le faia o nei su’esu’ega (Overall Performance Audit) ona o ni masalosaloga ma le tu’ua’ia o ia, i le fa’aaoga sese o tupe a le malo.  Na fa’aalia e Aiono e fa’apea, sa mafai ona fa’amaonia i lea su’esu’ega le fa’aaoga sese o tupe ma ni isi o soligatulafono i le fa’atinoga o galuega i totonu o le EPC.  Ae e leai se so’otaga o le fa’amalolo o ia mai i lana galuega ma nei soligatulafono.

Na fa’aalia fo’i e Aiono e fa’apea, e le’i o’o atu lava se ripoti o nei su’esu’ega ia te ia, ma ua i ai sona talitonuga, e leai se vaega i totonu o nei ripoti o lo o fa’amaonia ai lona solia o se tulafono.  Ma o lo o fia malamalama Aiono pe ua alagatatau le fa’amalolo o ia mai i lana galuega, ma tulaga o le tulafono.

Na ta’ua e Levaopolo, o lenei fa’ai’uga ua faia, e le o gatasi ma tulafono fa’atasia a le EPC, lea na pasia e le Minisita o Galuega, le susuga Manu’alesagalala Enokati Posala, ia Iulai 2011.   Na ia fa’aalia fo’i e fa’apea, afai e mafai ona fa’amaonia i nei su’esu’ega le solia e lenei ta’ita’i o se tulafono, ua alagatatau le fa’amalolo mai i a latou galuega, ae liliu le EPC i auala o le tulafono.  Ae afai e leai, ua tatau ona toe fa’afo’i i latou nei i a latou galuega.

Aumai: Samoa Observer;  fa’aliliu; A. Tuna



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.