Login

Ta’utino Kovana le mafai malo ona totogi nisi o ana aitalafu

ausage@samoanews.com

Na manino i le saunoaga faataitai o le malo mai le Kovana Sili ina ua tatala aloaia le Tauaofiaga lona 3 o le Nofoaiga lona 32 a le Fono Faitulafono i le vaiaso nei, ua silia nei ma le $7 miliona le tupe ua aitalafu ai le malo mo le eletise ma le suavai i le ASPA, ae o loo i ai foi nisi o ana aitalafu i pisinisi ma kamupani tua ua le mafai lava ona totogi i le taimi nei ona o le tulaga pagatia o loo i ai tupe maua a le malo.

Ua mafua lea tulaga e pei ona saunoa Togiola Tulafono, ina ua le mafai ona ausia e le malo seleni maua e totogi ai ana aitalafu, ma faaletonu ai loa foi ma le totogiina atu o tupe faaletulafono  i nisi o ona lala tumaoti e aofia ai le Falemai i Fagaalu ma le Kolisi Tuufaatasi.

I le tau sailia ai o nisi vaega tupe faaopoopo mo le malo ina ia mafai ona totogi ai ana aitalafu, na toe faamanatu ai e le alii kovana i le Fono nisi o pili tupe o loo taoto ai pea e lei faia i ai sa latou faaiuga, ina ia pasia ma tuuina atu mo lona faamaonia, ina ia mafai ai e le malo ona totogi ana aitalafu.

O pili na taua e Togiola o lo o taoto pea i le Fono e aofia ai le pili e sii ai laisene mo totogi o pisinisi, lafoga mo le ava malosi, pia ma le sikaleti, atoa ai ma le toe faamautuina o le lafoga e 2% lea na pasia e le fono i le tausaga na tea nei, lea ua maea lona aoga.

Sa ia faafetaia le Fono Faitulafono i lo latou pasiaina o le lafoga e 2% i le tausaga na tea nei, lea na mafai ai e le malo ona aoina mai le tupe e silia i le $1 miliona e fesoasoani ai i ana faagaioiga, e ui o lea ua faamutaina lea lafoga i le taimi nei.

“Afai o le a talia e le Fono nei fuafuaga, o le a faapena loa ona faigofie i lem alo ona totogi ana aitalafu, ae a le mafai ona pasia nei tulafono, ua le mafai foi e le malo ona totogi ana aitalafu, ona faaauau lea o le tupu pea i luga o aitalafu ma selesele ai e le faigamalo i le lumanai le mamafa o lenei avega,” o le saunoaga lea a le alii kovana i taitai o le fono.

Sa ia taua foi, e le tatau ona i ai ni aitalafu e maua i le vaitau lenei ona faaauau pea i le isi augatupulaga, ae tatau lava ona totogi uma i le taimi nei, ae le tatau ona faatietie fua i luga o le isi faigamalo ma isi tupulaga o loo agai mai.

I le mataupu e uiga i le falemai ma le tulaga pagatia o loo tulai mai ai i le itu tau tupe, na faailoa ai e le alii kovana i taitai o le fono e faapea, afai ae maua se $7 miliona e tuu atu i le falemai, o le a mafai ai e le falemai ona faatino nisi o manaoga ma mafai ai foi ona auina atu gasegase i fafo mo togafitiga, atoa ai ma le mafai lea e le falemai ona faafetaui tupe mai fafo ina ia fesoasoani ai pea i nisi o ana auaunaga.

E le gata o loo taumafai le malo ina ia faaleleia pea le tulaga o Falemai Talavai i Manu’a ma nuu i tua i le atunuu, ae o loo taumafai foi ina ia mafai ona i ai se auala faigofie e pasia ai suega a fomai o loo ulufale mai i le atunuu.

Saunoa Togiola, o le taua o suega nei, ina ia talitonu atoatoa ai le atunuu o fomai o loo agai mai i le teritori, o loo i ai ma lava lo latou tomai ma le agavaa e tautua ai le soifua maloloina o tagata Amerika Samoa.

I le faaiuga o lana saunoaga sa ia toe talosagaina ai taitai o le fono ina ia toe silasila totoa lava i pili tupe ia o loo totoe e lei faia i ai sa latou faaiuga, ina ia faanatinati ona galulue i ai ma tuuina atu mo le faamaoniaina, ina ia vave maua ai se fesoasoani i tulaga pagatia o loo tulai mai i le atunuu, ma mafai ai e le malo ona totogi ana aitalafu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.