Login

Saili Laulauatofi mo le 4 Tausaga - FFAS

frostlehualani@yahoo.com

Ua mae’a le gasea o le Asosi Soka a le tatou malo Football Federation of American Samoa [FFAS] lea na sailia i le afiafi o le aso Lulu ma ua fa’ailoa fo’i e ala i le palota a lea Asosi lo latou agaga sapaia o latou sui ua filifilia e avea ma Laulauatofi mo le isi fa tausaga o le a savalia nei e afua ia Mati, 2012.

O i latou ua filifilia mo tofiga o le laulauatofi e aofia ai:

Peresetene o le Asosi Soka - Toe filifilia le tofa Iuli Alexander Godinet.

Sui Peresetene o le Asosi Soka - Toe filifilia fo’i le tama’ita’i Sandra Fruean - Herrera.

Ao isi sui iloga o lea Komiti Fa’afoe e to’atolu e aofia ai le Susuga Rev. Evagelia, Saili Ott ma Mitch Shimasaki. Mai le Komiti fa’afoe sa galulue mai i le fa tausaga ua te’a, e to’atasi lava lea ua le toe tula’i mai, o le susuga Silasila Samuelu mai Pago Pago.

Ina ua fesiliga le tofa Iuli Godinet i sona lagona fa’aalia, sa ia fa’apea mai, “O le avanoa e au’auna ai ma fai se galuega lelei mo le fanau i lea fo’i fa’agatama, o se fa’afetai muamua lea ia i latou ua latou toe filifilia fo’i lo’u sui fa’atauva’a i lenei tofiga mo le isi 4 tausaga.”

I le fa’atautaiga o le Asosi Soka, ua ia saunoa ai, “O le faiga lava lea ua taumafai i ai le matou Komiti Fa’afoe e tata’i aga’i i ai le Asosi atoa lenei, o le taumafai mai kalapu soka uma lava e fa’aalia mai o latou manatu.”

 “A fesiligia loa la le komiti fa’afoe, e ao lava ina malamalama mea uma, o i’ina lava e fa’aosofia ai tagata uma ia fiafia e auai ma fa’aaoga le avanoa e fa’aleleia atili ai taleni ta’a’alo a le fanau i lea fo’i fa’agatama.”

O nisi o matati’a ua mafai ona ‘ausia ilenei 4 tausaga ua mae’a nei:

Muamua lava, ua fa’afetai ua ausia e Amerika Samoa ona ulufale i le ta’amilosaga e mafai ai ona tauva i se Ipu fa’avaomalo. O le ta’amilosaga lea sa auai atu i ai i latou i Samoa, lea na fetaui ai ma Samoa, Atu Kuki ma Tonga, ua ausia ai lea matati’a. O le i’uga o le taumafaiga na manumalo ai Amerika Samoa ia Tonga, ae tutusa ma le Atu Kuki, ae toe te’i ai ma Samoa, aua na toetoe lava uma le ta’aloga e le’i maua se sikoa a Samoa e malo ai.

O le lona tolu o Matati’a, o le fa’ato’a o’o mai ai lea o se asiasiga a le Fa’auluuluga a le FIFA i Amerika Samoa, na masi’i mai lava i le latou lava va’alele mai Zurich ma asia i tatou iinei. Fa’afetai ua maua lea tulaga, ua aloa’ia mai Amerika Samoa e le FIFA lea e fa’atupeina lea ta’aloga mo tatou fanau.

O le isi matati’a, ona ua mafai ona talosaga atu i le Soka a Amerika, ma auina mai ai se faia’oga soka e saunia le tatou au ta’a’alo mo le ta’amilosaga i Samoa lea ua tatou maua ai le avanoa mo ta’amilosaga fa’avaomalo. O le a taumafai pea lava e toe faia lea tulaga mo taimi uma, ae o le a fa’aumiumi atili taimi o lea faia’oga mo le a’otauina o tatou fanau ta’a’alo soka.

I le taimi nei, e 17 Kalapu Soka o lo’o ua i ai, ae ta’itolu ‘au soka i le kalapu e tasi, ma o le aofaiga lea o au soka e fili mai ai ‘ai fa’avaomalo a Amerika Samoa. O le aufili fo’i, ua mae’a fa’atulagaina, le fanau talavou o lo’o i a’oga maualuluga, e fili mai ai sui mo ta’aloga fa’avaomalo, ae maise o i latou ua mataituina le lelei o latou tomai i le ta’aloga soka.

Ua ofi nei fo’i Amerika Samoa i le Oceania Football Confederation, ma au avea ai Amerika Samoa o le sui totino lona valu i lea lava asosi.

Ua i ai le fa’amoemoe maualuga o le susuga le Peresetene ma lana Komiti Fa’afoe, o le a taumafai pea e fa’aauau le auaunaga, ae ia lagolago mai Kalapu Soka ta’itasi ina ia fa’aalia manatu e soalaupule ai ni fa’ai’uga lelei mo le ta’aloga soka ma le lumana’i o fanau o lo’o ta’a’alo fiafia ai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.