Login

Maua Peresetene Argentina - Kanesa

O le tama’ita’i Peresetene o Argentina, Cristina Fernandez de Kirchner, ua i ai nei i le falema’i mo ona togafitiga ma lona ta’otoga fo’i ona ua fa’amaonia ua maua o ia i le Kanesa o le Tairoi. Ua fa’ailoa mai o le a faia lona taotoga i le aso 4 Ianuari, 2012.

I le taimi nei, ua tu’ua e ia le nofoa o le Peresetene o le Malo mo sina taimi, ae soloa’i ane le sui peresetene e avea ma Peresetene le tumau i le taimi nei, e ta’ita’ia le malo, se’i mae’a fo’i le taotoga o le tama’ita’i peresetene o le atunu’u lea.

Ua fa’ailoa mai,  e laki lava le tama’ita’i peresetene, aua e le o foliga mai o sosolo lea kanesa i lona ua ma ona taga faua, ae o lo’o faigofie i le taimi nei pe afai o le a faia loa le taotoga, ma ua manatu ai loa le tama’ita’i peresetene o le a le toe fa’atali loa lava lona taotoga.

O lo ua atoa nei le 58 tausaga o le tama’ita’i peresetene, ma o lea fo’i fa’ato’a amatalia lana nofoa’iga lona lua i le faigamalo a Argentina, aua o le fa’ai’uga o le faigapalota lona lua lea, ua iloga mai ai, le malo a’ia’i o le tama’ita’i lea i lo isi sui sa latou tauva.

O livi o lo ua tu’ua ai e ia le nofoa o le peresetene ua amatalia lea ia Tesema se’ia o’o ia Ianuari 24, 2012, ma ua tula’i mai nei le susuga Amado Boudou e tauavea lea tofi. Ua fa’ailoa mai o lea ma’i sa fa’ato’a maua ane lava ia Tesema 22, 2011ma e a’afia ai taga faua o lona tairoi, ae o le lelei e le’i a’afia ai ona lymph nodes [liminoti]. O se fa’ailo mai le su’esu’ega ma ona togafitiga o le a faia, e tulaga lelei mai.

O le tala mai fo’i, e fa’ate’ia lava si ona malo, Argentina i lea tala ua aumaia, aua o Cristina lava latou e matua malosi i taimi uma, e le’i va’aia sona uiga fa’ama’ima’i, aua o le tele lava o tulafono e aiaia ma puipuia ai le faigamalo na pasia i le fa’aiuga o le tausaga.

E afua mai ia Oketopa o lenei tausaga se’ia o’o mai nei ina malolo i ona livi ma’i, e leai se fete’ena’i o i ai i le va o le Peresetene tama’ita’i ma lona malo aemaise o ona tagata nu’u uma lava. I lana nofoa’iga muamua, sa iloga ona ia tula’i mai e puipuia le folauga a lona malo i vaitaimi o le leaga o le tamaoaiga o le lalolagi, fa’atasi ai ma le tele o tulafono na ia fa’aulu ma pasia e puipuia ai le va fealoa’i o ona tagata ma le faigamalo, ae maise tulafono e fesoasoani ai le malo i tagata e maulalo le tamaoa’iga e tausia ai latou aiga.

O le to’esea fo’i o lona to’alua i le malaga fa’afuase’i a le maliu ma le oti ona o lona fatu, na atili ai ona alolofa tagatanu’u o lona malo i le tama’ita’i peresetene, ma ua fa’ailoa lea tulaga i le fa’aiuga o le faigapalota ia Oketopa, 2011.

Ole tama’ita’i peresetene o le isi lea ta’ita’i o malo a Amerika Latina ua a’afia ma fa’ataotolia i le ma’i leaga o le Kanesa. Pres. Hugo Chavez o Venezuela, le ali’i peresetene o Paraguay - Fernando Lugo, ma le ali’i peresetene ua te’a o Brazil o Luiz Inacio Lula da Silva, na faia uma lava latou taotoga i le kanesa i le tausaga ua tuana’i 2010.

Aumai: AP; saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.