Login

LOKA SE TAMAITIITI A'OGA INA UA IA GAOIA SE PEPA SIKALETI

ausage@samoanews.com

O le ali'i a'oga mai se tasi o A'oga Maualuga i le atunu'u na maua o ia gaoia se pepa sikaleti i se tasi o fale'oloa i le itu i Sisifo o le atunu'u, o lo o taofia pea i le to'ese i Tafuna i le taimi nei ma le fa'amoemoe o le aso Gafua o le a toe fofogaina ai lana mata'upu i luma o ali'i fa'amasino o le Fa'amasinoga Fa'aitumalo, ma iloilo ai le tulaga tonu e tatau ona ta'oto i ai lana mata'upu.

O le itula e 2:00 i le aso Tofi na te'a nei na maua ai e se sui o le fale'oloa lea ali'i o ia fa'atinoina lea solitulafono, ao ia laeiina le togiga o lana a'oga, ma le pepa sikaleti sa ia gaoia.

Na te'ena e le ali'i lea le moliaga mama o le gaoi lea ua tu'uaia ai o ia e le malo, ina ua tula'i i luma o le fa'amasinoga fa'aitumalo ananafi.

O le vaiaso na te'a nei na loka ai fo'i e leoleo le ali'i lava lea ma tu'uaia i le tagofia o le 'ava malosi a'o le'i atoa lona 21 tausaga le matua, atoa ai ma le fa'atupu vevsi i nofoaga faitele, ma toe tatala ai i tua i lalo o poloa'iga a le fa'amasinoga e ao ona ia usita'i i ai.

O se tasi o ia poloa'iga na tu'u atu i le ula lea na te usita'ia, e aofia ai le fa'asa lea ona ia toe soli se tulafono, ae atagia mai i le gaoioiga lea ua toe tu'uaia ai o ia e le malo, ua ia toe soli fo'i le tulafono.

E leai i ai se tasi o matua o lenei ali'i na auai i le taimi na fofogaina ai lana mata'upu, ma o se tasi lea o mafua'aga na ala ai ona toe tolopo lona iloiloga e toe fa'aauau i le vaiaso fou, ina ia mafai ai ona maua se sui o lona aiga e o'o atu i le fa'amasinoga i le taimi e toe tula'i ai le ua molia.

Na ta'ua e le loia a le malo, o le solitulafono lea ua tu'uaia ai lenei ali'i pe afai ae fa'amaonia e le fa'amasinoga, e ono mafai ona taofia ai o ia i le to'ese mo le  umi e tasi le tausaga, pe fa'asala fo'i i le salatupe e le silia ma le $1,000, ae o le 'oloa lea o lo o tu'uaia o ia na ia gaoia e na o le $3.95 lona tau.

E tu'uaia le ula lea i le solitulafono lea e le'i faia le fa'ai'uga a le fa'amasinoga i le ulua'i solitulafono lea na mua'i tu'uaia ai o ia i le vaiaso na te'a nei.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.