Login

Loka i le 5 tausaga i le gaoi

ausage@samoanews.com

O le alii e 19 tausaga lea na o latou osofaia ma nisi le faleoloa o le SamoaOne.com i Tafuna, ua fa’asala e le Fa’amasinoga Maualuga i le to’ese i Tafuna mo le umi e 5 tausaga, o se tasi lea o tuutuuga o lana faanofovaavaaia e 15 tausaga.

E ui e tusa ma le $10,000 le tau aofai o meatotino sa gaoia i lenei osofaiga, peitai e lei poloaina e le faamasinoga le toe totogiina atu lea e le alii o Fotu Aokusitino i le kamupani na aafia, ae ua fautuaina e le faamasinoga le malo, o loo i ai le avanoa e mafai ai ona faila e le kamupani na aafia sana tagi i le Faamasinoga faasaga i le ua molia, mo le toe totogiina atu lea o meatotino uma sa faaleagaina ma gaoia.

Ao lei tuuina mai le fa’asalaga a le fa’amasinoga fa’asaga ia Aokusitino, na saunoa le alii fa’amasino sili ia Michael Kruse, mai tausaga e tele talu ona avea o ia ma faamasino, o se tasi lenei o mata’upu ua ia maitauina le tula’i so’o mai, o le a’afia o nisi o pisinisi i gaioiga fa’asolitulafono  ma fa’aletonu ai le tamaoaiga o ia pisinisi, e pei o le fa’alavelave lea ua ta’usalaina ai Aokusitino.

O se  pisinisi na mafai ona fa’ailoa mai e Kruse sa a’afia i faiga faasolitulafono nei e aofia ai le Swiss Jewelry, lea sa ola ma manuia taumafaiga peitai ua afaina le itu tau tupe ona o faiga nei.

Saunoa Kruse, o ituaiga amioga nei, e le gata ua a’afia ai le tulaga ola lelei o pisinisi, ae ua a’afia ai ma le tamaoaiga o le atunu’u ma aiga, ina ua pe le pisinisi ma le toe maua ai galuega sa galulue ai tagata e fesoasoani ai i le tausiga o latou aiga.

Na talosaga le ua molia i le faamasinoga mo se isi avanoa mo ia, ina ua maea ona ia faatoese e tusa ai o le solitulafono sa ia faia. Na taua e Aokusitino, e le o se taimi muamua lenei ua tulai ai i luma o le faamasinoga ona o solitulafono tau i le talepe fale ma le gaoi.

Sa ia faatoese foi i ona matua e tusa ai i lona le usitai ma lona le faalogo, lea ua mafua ai ona saisaitia lona olaga i le toese.

Na talosaga le loia a Aokusitino o Leslie Cardin i le fa’amasinoga ina ia fa’anofova’ava’aia le ua molia, ma ia tu’uina atu i ai nisi o polokalama e fesoasoani ai i lona olaga. Na taua e Cardin i le fa’amasinoga, e ui o lea ua ta’utino le ua molia e le o se taimi muamua lea ua tulai ai i luma o le faamasinoga ona o solitulafono faapea, peitai e i ai lona talitonuga e manaomia lava se fesoasoani mo ia.

E ui e lei tetee le loia a le malo e faanofovaavaaia le ua molia, peitai sa ia finauina se faasalaga faafalepuipui e tuuina atu ia te ia.

Na taua e le tamaitai loia o Mitzie Folau i le faamasinoga, e le o se taimi muamua  lenei ua tausala ai le ua molia i ituaiga solitulafono nei.

Na fesili Kruse ia Folau pe o le a le taimi mulimuli na asiasi ai i le toese i Tafuna, na tali Folau pe a ma le lua masina talu ai, ae na saunoa Kruse, o vaiaso uma lava e asiasi ai le Ofisa Faanofovaavaaia i le toese i Tafuna, ma o iina lea o loo maua mai ai e le faamasinoga nisi o faamatalaga e faatatau i le toese, ma faafitauli o loo tulai mai ai, e le gata i le toatele o pagota o loo taofia ai, ae foliga mai foi o le faatele ma le umi e taofia ai se tagata i totonu, o le faateteleina foi lena o le leaga o lona olaga.

O Aokusitino na uluai tuuaia e le malo i moliaga o le talepe fale i le tulaga muamau, gaoi atoa ai ma lona taliaina o ni oloa sa ave faagaoi, ae i lalo o le maliliega sa ia sainia ma le malo lea foi na talia e le faamasinoga, sa ia tali ioe ai i le moliaga o le talepe fale, ae solofua isi moliaga e lua o loo totoe ai.

I faamaumauga a le faamasinoga, o loo taua ai le faatonu e Aokusitino o ni alii laiti se toatolu latou te talepe ma osofai le faleoloa na aafia, lea na ia aveina ai loa nisi o oloa sa gaoia mai i lenei osofaiga.

E 15 tausaga na manatu le faamasinoga e faasala ai le ua molia i le toese, peitai ua faamalumalu lona tuliina o lea faasalaga, ae o le a faanofovaavaaia ai o ia mo le umi lea  i lalo o poloaiga a le faamasinoga.

O nisi o poloaiga e aofia ai lona tuliina o tausaga e 5 i le toese, faasa ona ia toe tagofia le ava malosi poo ni fualaau faasaina, faasa foi ona ia toe soliina se isi tulafono a le malo.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.