Login

Lita Marie Timoteo - ‘Faia’oga o le Tausaga AS’

frostlehualani@yahoo.com

Ua mae’a ona fa’ae’e i le tama’ita’i faia’oga o Lita Marie Timoteo, e 26 tausaga le matua ma o se faia’oga i Tafuna Elementary School i le Level 6 le fa’ailoga fa’apitoa o le “Faia’oga o le 2011-2012 i Amerika Samoa,” peita’i o lo tatou sui lava fo’i lea mo le tauvaga aoao i totonu o Amerika 'atoa ma ona teritori,. i le vasega lava o faia’oga e 'amata mai le ECE, Elementary & A’oga Maualuluga.

“E leai lava se faigofie o ala o sa'iliga o lenei fa’ailoga, e maua ane lava, ua matua lagona fo’i le tele o gaoioiga ma tapenaga e ao ina fa’ao’o i totonu a’o le’i tapunia le faitoto’a ona o le taimi atofa.”

 O si ana tala ata mai lea, ae ua moni lava, “E le toe lagona nei o’otiaga pe a o’o ina maua sa’o mai le tali, ua e mauaina le fa’ailoga fa’apitoa na tausinio i ai.” E to’aono lava faia’oga e ao ina tauva i tausaga ta’itasi uma. E aofia ai Sasa’e, Sisifo, Sisifo Ogatotonu, Ogatotonu, ECE ma Manu’a. I lenei tausaga, ua le maua se Faia’oga mo Sisifo, ona ua tuai ona fa’aulu mai so latou sui, ma ua totoe ai na’o le lima itumalo sa tauva ma ua fa’amanuiaina ai le tama’ita’i faia’oga ua tula’i nei. O i latou na tauva:

Sisifo Ogatotonu: Lita Marie Timoteo mai Tafuna Elementary.

Ogatotonu: Brenda Aisoli mai Samoana High School

Sasa’e: Larry Gutu mai Masefau Elementary

Manu'a: Donna Mataese mai Manu'a High School

ECE: Faia’oga o le tausaga : Luisa Satoa mai Lupelele ECE.

O Lita Marie o se alo tama’ita’i e fa’asino ia Vui Kapelu [ua maliu], mai Lano Savai'i ma le Tina o Tina Sofa’i Timoteo mai Pago Pago, Amerika Samoa. Na soifua mai o ia ia Mati 21, 1985. Na 'amata ana a’oa’oga i le Manulele Tausala Elementary School ma fa’asolo atu ai i le Manulele Jr High School ae fa’ato’a a’oga maualuga ai i le Laumua o le Toa, Tafuna High School ma fa’au’u ai ia Iuni 2002.

Na soso’o a’oa’oga maualuga i le Kolisi Tu’ufa’atasi o Amerika Samoa e afua ia Setema 2002 se’ia o’o ina fa’au’u ia Tesema 2004. Ua umia mai ona fa’ailoga e 2 o le ‘AA Education’ ma le ‘AA Liberal Arts.’

Na maua le avanoa e faia’oga ai ma na fa’ailoga se’ia o’o ina 'amatalia ana a’oa’oga mo le fa’ailoga maualuga BEd i le Iunivesite o Hawaii i Manoa ia Ianuari 2006 se’ia o’o ia Me 2008 ma fa’au’u mai ma lea fa’ailoga. Na soso’o lava a’oa’oga mo le toe fia maua o le fa’ailoga Masters of Education e afua mai ia Ianuari 2009 se’ia o’o ia Novema 2011 ma ua fa’amanuiaina fo’i ma lea fa’ailoga.

I lona olaga faia’oga, sa 'amatalia lea i le a’oga Manulele Tausala Junior High i le tausaga a’oga Ianuari 2005 se’ia o’o ia Me 2006 ma sa faia’oga ai i le vasega 6 mo le Reading, Math, Science, Social Studies, Physical Education, Health, Music ma le Art. Ina ua mae’a umia ona fa’ailoga maualuluga mai le Iunivesite o Hawaii sa toe avea fo’i o ia ma faia’oga i le level 5, level 4 i nisi tausaga, ma le level 2 i Lupelele Elementary i le 2008, ma toe fo’i i le Level 4 se’ia o’o i leLevel 6 lea  e i ai i le tausaga nei i Tafuna Elementary. Ua i ai le isi fa’asiliga o galuega e tautua ai mo Tafuna Elementary ina ua 'avea o ia ma Failautusi o le Komiti e Fuafuaina le aga’i i luma o le A’oga Tafuna Elementary.

O lenei tama’ita’i e tele fo’i ana tautua i le atunu’u lautele e ala i le tautua i le Ekalesia o lo o 'avea o ia ma latou totino. O le Ekalesia Aiga Pa’ia , Katoliko Roma i Tafuna i le Pule’aga Samoa Pago Pago sa soifua ane ai o ia, ma ua tautua ai pea o ia fa’atasi ma ona matua ma le aiga.

Sa i ai se vaitaimi o lana lea tautua sa 'avea ai o ia ma faia’oga o le A’oga Sa ma o se tasi fo’i lea lesona aoga tele ia te ia, e feso’ota’i atili ai ma le fanauiti. I lana Ekalesia lava o ia o se sui o le 'Aufaipese, ma e i ai fo’i sina vaega o lana tautua lea sa 'avea ai o ia ma failautusi toe teutupe a le 'aufaipese.

I le vaitaimi o ana tautua o se faia’oga, sa taumafai ai o ia mo se matati’a maualuga ina ia sa'ilia pe na te mafaia ona fesoasoani i le Fanau e i ai mana’oga fa’apitoa. O se tasi lea o lu’i sili ona taua ma a’oa’oina ai lona tama’ita’i talavou faia’oga.

Na ia sa'ili mo se isi fesoasoai e fa’aa'uupegaina ai o ia mo le tomai fa’apitoa, ma sa ia fa’afetaia ai le fesoasoani a le CFIDD i le tausaga e 2008. Sa galue o ia e a'oa'oina se tasi e tauaso, o se mea e faigata tele mo so o se tasi o lo o pupula ona e fuafua toto’a se tasi o lo o pogisa ia te ia le lalolagi. O le fesoasoani mai a le CFIDD na mafai ai ona fa’afaigofie ia te ia ma le sui ona folau i lagima i a’oa’oga sa ia mo’omia.

“O se tasi lea o taimi e sili atu ona tele ai se lesona aoga na ou mauaina ma a’oa’oina faapitoa ai a’u, nai lo le o lo o fia a’oa’oina.” O sana tala fiafia lea.

Ona o le tofia ai o oe e 'avea ma faia’oga, e i ai lava i latou sa pito i sili ona 'avea ma una’iga malosi mo oe, i lenei faia’oga, sa ia manatua ai lana vasega, Level 6 Tafuna Elementary 2011.

“O i latou nei o ni fa’atupu lagona ia te a’u. O latou uiga, ae maise o latou mana’oga fa’atamaitiiti e taumafai e sa'ili le atamai, e u’una’ia malosi lou naunauta’iga e te a’ea mauga ma sopoia vanu o tiute fa’afaia’oga, ina ia mautinoa ua e fa’atumuina o latou mana’oga tau sa'ili le atamai fa’aneionapo. Ou te alofa tele ia i latou uma lava!”

I le aiga o Lita Marie, e to’aono ona uso ma ona tuagane e aofia ai: Kosetatino Timoteo, Miriama Timoteo, Susana Timoteo, Falanika Timoteo, Tagaloa Timoteo ma Koreti Timoteo.

E i ai le aiga tele a le Ofisa o le TTY ma le fa’auluuluga fo’i o le Matagaluega o A’oga e fa’atautaia mo le tama’ita’i ua fa’amanuiaina lana taumafaiga i lenei tausaga, Lita Marie Timoteo, fa’atasi ai ma i latou uma na tauva mo lenei tausaga, ma o le a fa’ailoa mulimuli mai le aso tonu o lenei tausaga mo lea fa’amoemoe. Peita’i, e malaga Lita Marie i Amerika mo le tauvaga a faia’oga uma o le Iunaite Setete o Amerika, ma o le a ia o’o fo’i e feiloa’i ma le afioga le Peretene o Amerika Barrack Obama ma le faletua i le falepa’epa’e.

“Toe avatu lava le fa’amalo ma fa’amanuiaga a lenei nusipepa i la tatou Faia’oga Filifilia o lenei tausaga 2011-2012.”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.