Login

Leai se laisene avepasi na lavea ai le pasi

ausage@samoanews.com
Le alii ave pasi o le Pa i Fualaga lea na lavea i Laulii i le aso Lulu na tea nei ia Opetaia Farani. [ata AF]

Na te’ena e le ave pasi o le pasi a le Pa i Fualaga lea na lavea i tala atu o Lauli’i i le Aso Lulu na te’a nei, tu’uaiga a le malo fa’asaga ia te ia, ina ua tula’i i luma o le Fa’amasinoga Fa’aitumalo i le taeao ananafi.

Ua faatulaga ai loa le isi ana iloiloga mo le Aso Lua, Fepuari 7, 2012.

O le mae’a ai ona tulai mai o le faalavelave i le aso lea, na taofia ai loa Farani i le toese i Tafuna ma tula’i ai i luma o le faamasinoga i le taeao ananafi.

O lo o molia Farani i le fa’afoeina o se ta’avale la’u pasese i se auala fa’atautala, ma i’u ina tula’i mai ai se fa’alavelave.  O se solitulafono e mafai ona nofosala ai se tasi i le to’ese i le tausaga, po o le sala tupe e le silia ma le $1,000 po o fa’asalaga uma e lua.

Ae le gata i lea, o lo o molia fo’i o ia i le fa’afoeina o se ta’avale la’u pasese e aunoa ma sona pemita ma le ave ta’avale, e leai sona laisene aveta’avale.

Talu ai e le o i ai se fuafuaga a le malo e toe faila ni moli’aga fa’aopoopo fa’asaga ia Farani, na faia ai loa le fa’ai’uga a le fa’amasinoga e tatala i tua mai le toese e aunoa ma se tupe e totogi, i lalo o poloaiga e ao ona ia usitai i ai.

O nisi o ia poloaiga e aofia ai le fa’asa ona ia toe fa’afoea se ta’avale i le teritori, sei vagana ua i ai sona laisene, ua faasa ona ia taumafai e sola ese ma le atunuu, a ia tu’uina atu ona pepa malaga e taofi e le malo sei mae’a  lana mataupu.

Na molimauina e le Samoa News le leai o ni manu’a i le tino o le alii ave pasi ina ua tulai i luma o le fa’amasinoga i le aso ananafi.

Na taua e se molimau fa’atuatuaina i le Samoa News e fa’apea, na manunu’a uma le pasese a le pasi ina ua lavea i le Aso Lulu na te’a nei, ma auina uma atu ai loa i latou i le falemai i Fagaalu i le afiafi lava lea mo togafitiga.

O le to’atele o le pasese na toe te’a uma lava i tua i le po na tupu ai le faalavelave, sei vagana ai se toatolu sa manaomia le faia i ai o nisi togafitiga i o latou tino ona o manu’aga tuga sa aafia ai, e pei ona faamaonia mai e se molimau i le Samoa News.

O le toatolu o i latou ia e aofia ai se tamaititi aoga e 14 tausaga le matua lea na manu’a lona lima, o se tama’ita’i na manu’a lona vae ma lona lima, ma le tama matua lea o loo i ai pea i le potu tigaina ona o le matuia o manu’a o loo a’afia ai o ia, e pei ona faamaonia mai e se molimau i le Samoa News.

Na asia e le Samoa News le falemai i le afiafi lea tulai mai ai le faalavelave, ma vaaia ai le faatumulia o le potu lea e taunuu atu ai gasegase tigaina i aiga o i latou na manunu’a i lea faalavelave.

Na mafai ona talanoa le Samoa News i se tasi o tina talavou, o le aiga lea o se tasi o le pasese na lavea i le faalavelave, ma taua ai e le tina lea le faateia o le latou aiga ina ua ta’u atu le tala e uiga i le faalavelave, ma latou faanatinati atu ai loa i le falemai.

Na taua e se molimau i le Samoa News, e tusa ai o le faamatalaga a le ave pasi, o le faalavelave na tulai mai ina ua motu le feouli o le pasi ina ua oso i luga o se omo le pa’u, ma mafua ai loa ona tifa le alu a le pasi ma i’u ina tofu atu ai i le sami.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.