Login

Le totogia e le malo tupe, liliu LBJ i le atunu’u

ausage@samoanews.com

GERSTENBERGER:  LEAI SEISI AUALA

Na fa’amaonia e le alii pule o le falemai o le LBJ, i le iloiloga lea sa faia i le Aso Gafua na te’a nei, o a latou si’itaga ia ua fuafua e amata i le aso 24 o le masina nei, ina ia maua ai tupe ia ua le mafai e le falema’i ona maua i le Tausaga Fa’aletupe lenei, e aofia ai ma aitalafu a le malo e le’i totogia.

Na ta’ua e le pule o le LBJ, o Michael Gerstenberger, le taua tele o le tupe lea e tatau ona maua mai i le malo i masina ta’itasi, e faafetaui ai tupe feterale o lo o auala mai i le Medicaid.

Na folasia e le pulega a le falema’i i luma o le mamalu o le atunu’u na auai i lenei iloiloga e fa’apea, o le 11% o le paketi a le falema’i mo le tausaga tupe 2012, e sau mai i le malo.  O isi  vaega tupe e maua mai i le Medicaid, Ofisa o le Initeria, e i ai ma se vaega tupe mai i le feterale, o tupe maua mai i pili o lo o totogi e le mamalu lautele, fa’apea ma ni isi tupe fesoasoani.

Na fa’amanino mai fo’i e Gerstenberger e fa’apea, o le vaega tele o le paketi a le falema’i, e alu i le totogia o a latou tagata faigaluega, ona soso’o ai lea ma vaegatupe o lo o fa’aalu mo le totogia o sapalai fa’apea vaila’au, atoa ai ma isi tautua e pei ona i ai mea taumafa mo fale’aiga, ae o sina vaega la’ititi, pe a ma le 1% e fa’aaoga e fa’atupe ai femalagaaiga mo le falema’i.

Ae peita’i, na fa’alauiloa e le falema’i e fa’apea, e lima masina e le’i toe totogia atu e le malo se tupe i le falema’i.  O ni isi taimi na maua ai e le falema’i ia tupe mai i le malo, e le atoatoa le aofa’iga e tatau ona totogi.

Ma ua taofi ai le falema’i, o le mafua’aga lea ua le mafai ai e le falema’i ona fa’afetaui tupe feterale ia e auala mai i le Medicaid, ma toe se’i ai e le malo feterale a latou tupe.

E $15,569,148 le tupe lea ua faalauiloa mai e le LBJ o le a fa’aitiitia ai a latou tupe mo le tausaga tupe lenei, ma o le tupe lea o lo o latou fa’amoemoe e tatau ona maua mai i le atunu’u pe afai ae aloa’ia a latou siitaga i le vaiaso nei.

“O le taimi nei, e matua leai lava se isi auala matou te sulu i ai ua na o le si’i lava o totogi o a matou tautua, e le gata ua leai se tupe i le faletupe, ae e le o i ai foi se tupe e totogi ai tagata faigaluega i le masina o Ianuari, e oo foi i se tupe e faatau mai ai sapalai ma vailaau mo le falemai,” o le saunoaga lea a Gerstenberger ina ua fesiligia e nisi o le atunuu.

O le isi fa’afitauli na taua e Gerstenberger e le o mafai ai ona faatino e le LBJ le tautua saoloto mo le atunuu, e le o mafai ona fa’atusatusa tupe o lo o fesoasoani ai Amerika mo le tausiga o le soifua o le tagata e toatasi i le $7,681, pe a faatusatusa ia Amerika Samoa e na o le $461.

O le laititi o le tupe o lo o tu’u atu e le malo e fesoasoani ai i le falemai, o le isi lea mafua’aga na taua e Gerstenberger ua mafua ai ona tulai mai le fa’afitauli tau tupe, pe a fa’atusatusa i le tele o isi falemai i totonu o le malo tele e aofia ai ma ona teritori, lea e ova atu i le tai $200,000 o lo o tu’u atu e le malo i masina taitasi e fa’atupe ai galuega a le falemai, pe a fa’atusatusa i le LBJ e le atoa se $50,000.

I le tausaga tupe 2011, e tusa ma le $2.8 miliona sa tatau ona maua e le falemai mai tautua sa latou ofoina atu i tagata, peitai e na o le 22% o lea tupe ua mafai ona aoina mai i le taimi nei, ae o le isi vaega tele o loo taumafai pea e ao mai.

Na taua e nisi sa i ai i le iloiloga, o le isi lea mafuaaga o le faaletonu o le itu tau tupe ma vaila’au a le falemai, o le tele o vaega tupe e le o totogia e tagata, ae o lea ua uma ona ofo atu i ai tautua ma vaila’au.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.