Login

LAUMOLI: E leai ni ova taimi a leoleo e maua

ausage@samoanews.com
Leseiau Laumoli [ata: AF]

Na te’ena e le Sui Komesina o le Matagaluega o Leoleo, tu’uaiga mai ni isi o leoleo o le Toese i Tafuna e fa’apea, ua leva ona tatau ona maua ova taimi a leoleo, peita’i o ia o lo o mafua ai le fa’aletonu, ona o lo o musu e saini le fa’amaoniga mo le totogia o ova taimi.

Saunoa le tofa ia Leseiau Laumoli ina ua fesiligia e le Samoa News i le aoauli ananafi, e leai ni ova taimi a leoleo uma lava a le matagaluega e maua, ona e le gafatia e le tupe a le matagaluega o lo o i ai ona tau fa’asoasoa ova taimi e pei ona taua.

Sa ia taua, o le mataupu lenei ua mae’a ona fa’amanino i vaega uma lava o le matagaluega o leoleo, peita’i e foliga mai o lea lava e taumafai e una’i ma fesiligia tulaga o latou ova taimi.

“E le na o leoleo o le falepuipui o lo o a’afia, o lo’o aofia uma ai lava isi vaega o le matagaluega e pei o le lala i Tafuna, Fagaitua atoa ai ma Fagatogo nei,” o le saunoaga lea a Laumoli.

“O le mea moni lava, e leai ni ova taimi e maua, e le gafatia e tupe a le matagaluega ona fa’atupe itula sa galulue ova taimi ai leoleo.”

Saunoa Laumoli, o le mataupu i ova taimi na afua mai ina ua le lava tagata faigaluega, ma galulue ai loa isi sifi o le Ofisa o leoleo ta’i 12 itula i le sifi e tasi, peita’i ina ua mae’a le fa’auuga o leoleo fou ia na faia i ni nai masina e le’i mamao atu, na mafai ai loa ona toe fa’aopoopo tagata faigaluega i le matagaluega, ma toe fa’afo’i ai loa sifi a vaega eseese o le matagaluega i le aofa’i e tolu sa i ai muamua.

“O le taimi nei la, e le toe mana’omia nisi e galulue ova taimi aua o lea ua toe atoa le aofa’i o sifi ma ua feololo nai tagata faigaluega ua i ai ina ua fa’au’u mai leoleo fou i totonu o le matagaluega,” o le saunoaga lea a Laumoli.

Na taua e se tagata faigaluega mai le toese i Tafuna na valaau atu i le Samoa News, o le ripoti lea ua o’o atu ia te i latou, e na o leoleo lava o le toese e agava’a i le totogiina o latou ova taimi, peita’i ua tuai ona maua ona e le o mana’o le Sui Komesina e saini le pepa e fa’amaonia ai.

Na taua fo’i e le molimau, o le masina o Me na amata galulue ova taimi mai ai i latou seia o’o mai i le taimi na fa’au’u ai leoleo fou, o iina lea na fai ai loa le fa’aiuga e toe fo’i sifi a le matagaluega i le aofa’i e tolu sa i ai, ma taofia ai loa le toe galulue ova taimi o leoleo uma lava mai le ta’i 12 itula, ae o le a toe fo’i lava i le ta’i 8 itula e galulue ai.

O le mataupu fo’i lenei na tofu atu i luga o le polokalame a le ali’i kovana i se tasi o aso To’ona’i, ina ua fesiligia e le to’alua o se ali’i leoleo le afioga Togiola Tulafono, i le mafuaaga ua ala ai ona galulue ta’i 12 itula leoleo ae o lea e na o le ta’i 8 itula o lo’o totogi.

Na fesiligia fo’i e le to’oto’o lea le ali’i kovana, pe i ai se tulafono a le feterale e fa’ataga ai ona galulue ova taimi tagata faigaluega i le maualuga e o’o atu i le ta’i 12 itula, lea na tali ai le ali’i kovana, e mafai lava ona galulue fa’apena tagatafaigaluega, pe afai o se manaoga e mafua mai i le le lava lea o tagata faigaluega.

Na fa’amaonia fo’i e le kovana i lana polokalame lea, o le a ia fesiligia fa’atonu o matagaluega i le mafuaaga ua ala ai ona galulue ova taimi leoleo, atoa ai ma lana fautuaga, o le a ia fautuaina fo’i le teutupe ina ia totogi ova taimi o tagata faigaluega.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.