Login

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea ua fa’atumulia ai luga o le uafu tele i le taulaga i le malo o Initia i sui o le malo, fa’apea ai aiga o fitafita na o i le osofa’iga, i le fa’ataliina o le toe fo’i mai o fuava’a ia ua iloa atu, atoa ai ma le tele o le mau manatu felanulanua’i i nei mau fu’a ‘ese’ese o lo o sisi mai i vaega ‘ese’ese o le va’a.]

Na lilo i fuava’a a le malo o Initia o lea ua tuliloa atu i latou e fuava’a fa’apitoa a le tama o Iasoni ma le fa’anaunauga, ia aua lava ne’i tulau’ele’ele le tama’ita’i o Lorina i lona malo ina ne’i fasiotia o ia e ta’ita’i ‘au o lo o fa’afoeina le ta’ita’iina o le malo i le taimi lea, aua o lea ua maliliu lona tama ma lona tuagane sa fai ma fa’amoemoega o le malo. O le osofa’iga lea ua alu atu nei, e na o fitafita fa’apitoa lava a le tama o lo o malaga ai, ae o Iasoni, o lo o i ai pea o ia i le malo mo le tau fa’apepeina o ona manu’a, ae maise ai o lea ua tau toe fa’aleleia le tele o vaega o le malo sa fa’aletonu i osofa’iga a ‘au a le fili.

Se’i o tatou liliu atu lava i luga o le uafu i totonu o le malo o Initia ma le tulaga naunau o tagata e fa’atali le taunu’u atu o latou aiga. E le’i pipi’i lelei le fuava’a i le uafu ae ua alalaga tagata e fa’ailoa ai lo latou lagona manumalo, ina ua latou va’ai e tele atu fu’a papa’e ia o lo o tautau mai solo i vaega ‘ese’ese o le va’a nai lo fu’a uli. Na sao le motu o tagata ina ua latou va’aia le savali filemu mai i lalo o le ali’i ta’ita’i ‘au sa fa’auluulu i ai le osofa’iga, ma aga’i sa’o atu lava i le vaega o le a fai ai lana saunoaga mo le fa’alauiloaina o le fa’ai’uga o le osofa’iga, a’o tagata i le taimi lea ua leai ma se isi e toe gase pe toe gagana, ae ua lologo uma i le fia fa’alogologo pe sa tua ma ni a le osofa’iga lea ua toe fo’i mai.

“Momoli atu le fa’amalosi i lo tatou atunu’u mo la outou tapua’iga, fa’afetai, ae o lea ua toe fo’i mai le fa’amoemoe sa alo atu i ai se vaega o fitafita o lou malo, e ui e le o atoatoa tulaga fiafia o le fa’amoemoe, ae o le itu taua o lea ua mafai ona ‘ausia se isi fo’i vaega. O le tasi vaetolu o fitafita na malaga ua le mafai ona toe fo’i mai, fa’atasi ai ma le aloali’i o le malo.....” na gata ai i’ina le fa’amatalaga a le ta’ita’i ‘au ina ua le toe mafai ona toe lagona se mea i le pisapisao o tagata ma fe’ei, o ni isi ua latou tau’ai le ali’i ta’ita’i ‘au ae o isi ua matua le toe fia fa’alogo atu lava i se isi tala e toe fai mai.

“Ae o le isi itu ua manuia ai le fa’amoemoe sa alo atu i ai lou malo, o lea ua matou toe mauaina mai le tama’ita’i purinisese o le malo o Initia na ‘ave fa’atagata o taua e le ‘au uso mai Asuria, o lo o manuia ma maloloina o ia i totonu o le va’a, pau le suiga ua i ai, ua tauaso ona mata.” Na ona mae’a lava o le saunoaga lea a le ta’ita’i ‘au, fuli mai loa lona tua ma toe savali aga’i atu i totonu o le va’a, a’o tagata i le taimi lea ua le malolo le faitio, fe’ei atoa ai ma le tau’ai atu o ma’a ma fagu aga’i i le va’a.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.