Login

Faalauiloa ID palota fou mo tagata palota atunuu

ausage@samoanews.com

Ua ausia e le Ofisa o Palotaga a le atunuu se tasi o a latou faamoemoe autu, i ni ID palota mautu e mafai ona malupuipuia mai le ono faia i ai o ni faiga faasolitulafono, e pei ona i ai le le ID palota fou lea ua faamoemoe e faalauiloa i le aso 15 Tesema, e pei ona faamaonia mai e le afioga i le Komesina o Palota, le afioga i le Maopu ia Soliai Tuipine.

O ID palota lea ua faamoemoe e amata lolomiina i le vaiaso fou e mo i latou ua maea le aoga o latou ID palota tuai, faapea ai ma tagata palota fou o le a laiseneina.

I se pepa o faamatalaga na tuuina mai e Soliai i le vaiaso nei, o lo o ia taua ai le tuuina atu o lenei ID palota mo le taimi muamua i tagata palota, e aunoa ma se totogi, ma o lenei foi ID palota o le a aoga mo le 2 tausaga, ona o le faatupulaia o le tau e faagaioi ai lenei ituaiga ID palota fou.

O le suiga fou e pei ona saunoa Soliai, o loo faatupe mai lea i lalo o se vaega tupe fesoasoani mai le feterale, i lalo o le tulafono mo palotaga a Amerika (Vote America Act), ma o le tau aofai o loo fuafua e faatupe ai lenei suiga e le o mafai ona faamautuina mai i le taimi nei.

“O le ID palota fou lea ua faalauiloa atu i le atunuu, e faapitoa lava mo i latou ua maea le aoga o latou ID palota tuai, atoa ia ma tagata palota fou o le a lesitalaina mo le palota tele o loo lumanai nei,” o le saunoaga lea a Soliai.

“Afai la e lei maea le aoga o lou ID palota tuai, faamolemole, e le manaomia oe i le aso 15 Tesema lea o le a amataina ai ona lolomi ID palota fou ia ua faalauiloa atu e le matou ofisa,” o le saunoaga lea a Soliai e lapataia ai le atunuu mo lenei suiga.

Sa ia taua foi le sauni o le latou ofisa e siaki faamaumauga uma a i latou e agai atui le latou ofisa, ina ia mautinoa e leai se vaega e nunumi i le aufaigaluega.

Saunoa foi Soliai, e fai lava si maualuga o le totogi mo le ituaiga ID palota fou lea ua faailoa mai, peitai ua a’e se manatu ia te ia, o le a le totogiina e le atunuu se tupe mo le ID fou, ina ia mafai ona maua e tagata uma le avanoa e lesitala ai ma faatino le aia e palota ai i le taimi o le palota i le tausaga fou.

O ID palota fou nei, na uluai faalauiloa e Soliai i luma o le Fono Faitulafono, ina ua molimau i le taimi na tuuina atu ai lona suafa mo le faamaoniaina e le Fono, e tusa ai o le toe tofiaina lea o ia e le kovana sili, na te toe tauaveina le tofiga o le Komesina o Palota.

Na faailoa e Soliai i luma o le Fono, o le ituaiga ID palota fou lea ua maua mai, e faigata ona sui e se tagata faamaumauga o loo i ai, ma o se taumafaiga ina ia faaitiitia ai faiga faasolitulafono o loo faia e nisi i ID palota o loo i ai nei.

Sa toe faaluaina e le alii kovana i luga o lana polokalame i le faaiuga o le vaiaso na tea nei le mataupu e uiga i le ID palota fou lenei.

Saunoa Togiola Tulafono, o le ID palota fou lea ua sauni le ofisa o palota e tuuina mai i le atunuu, e tulaga ese lava ona foliga, ma e le mafai ona toe fai i ai ni taumafaiga faasolitulafono e sui le ata poo le igoa o loo i ai, ona ua matua mautu ma mausali lona faiga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.