Login

Fa’aulu Siamupini Kickboxing Ray Sefo – “Masters Hall of Fame”

O se va’aiga i le ali’i Siamupini fa’aono i le Kikimafusu, Karate & MMA - Ray Sefo. [courtesy photo]

O se alo o Samoa o lo o tauva i le fa’agatama o le Kiki & Fusu [kickboxing], Ray Sefo, ua 'iloga ona ia tau’avea le siamupini i le lalolagi i lea lava fa’agatama, ae o se mea silisili ua ia mauaina, o le a fa’aulu lona igoa i le “Lisi o Siamupini  Ta’uta’ua i le Kikimafusu.”

E 'ese mai lea, e matua tele na’ua fusi ma ona fa’amau fa’a'iloga i le tulaga 'ese fo’i o lana taumafaiga i lea fo’i fa’agatama, ae silisili 'ese ai lava, e le’i i ai se tasi o i ai se faitauga, o lo o tauva ma siamupini fa’aono se tasi o alo o Samoa i lea fa’agatama.

Mai le to’atele o ni isi sa tauva i le fa’agatama, o lo o solisoli tapoleni mai fo’i se tasi alo o Samoa o lo o tauva mo Ausetalia i lea lava fa’agatama e tasi, le ali’i MMA & Kikimafusu mata’utia o Mark Hunt. O le tala moni, sa i’u ina fetaui le to’alua lea e toe sa'ilia ai le siamupini, ae na manumalo a'ia'i Ray Sefo, lea e masani ona fa’aigoa e tagata fa’asalalau o Sugar Ray Sefo.

Ona ua fa’aono lelei ona maua ma umia e Ray Sefo le fusi o le lalolagi i pi’iga i le Xtreme Couture, UFC ma sa ia mua’i maua ona fa’ailoga i le Muai Thai, fusu, ma le kikimafusu. Peita’i o le tusi na fa’ailoa mai ai ia te ia o le a fa’aulu lona igoa i le Lisi o Siamupini Ta’uta’ua i le Kikimafusu i le Lalolagi, lea e fa’ato’a faia ia Iuni 19, 2012.

Na taua’aoina ia te ia lea tusi i Las Vegas, o se mea na fa’ate’ia ai Ray Sefo, aua e le’i i ai sona mafaufauga e tupu ia te ia lea fa’aeaga fa’apea! Ua fa’ailoa mai, ua atoa le 39 tausaga o Ray Sefo ma e le o se tagata tautala so’o pe va’aia ai ni uiga e mimita i se taimi e manumalo ai.

Peita’i, ua fa’aalia e Michael Schiavello, le ali’i fa’asalalau o pi’iga, MMA ma Kikimafusu, “E matua 'ese’ese lava uiga va’aia ia Ray i totonu o le Maea ma fafo i le taimi e avea ai o ia o se faia’oga i le fanau.”

Ua atoa le 80 o Fetauiga a Ray i le maea i lona olaga tauva ai i le Kikimafusu, ma ua maua ai fa’ai'uga o ana taumafaiga i le Kikimafusu, Muai Thai ma le MMA e 69 manumalo, 18 tutusa ma le faia’ina e 1, ae 54 Tu’i Oti[KO]. Afai o le a fa’auluina aloa’ia lea suafa o le alo o Samoa i le lisi o i latou e ta’uta’ua a latou taumafaiga i ta’aloga o tauva ai, ua tali tutusa lea taumafaiga ma i latou na muamua fo’i ona fa’aulu e i ai le ali’i o Randy Couture mai le UFC Hall, po o le ali’i Jiu Jitsu o Helio Gracie ma le ali’i Peresetene o le UFC Dana White.

Ona o Ray Sefo o se ali’i faia’oga i le Kikimafusu, o lea e to’atele i latou ae maise le fanau o lo o ia a’oa’oina, e matua alofagia ai lava Sefo ma fa’ailoa mai e i latou, o se tagata agava’a ma e lelei tele lana a’oa’oina o fanau i lea fo’i fa’agatama, ae maise o le koleniga o i latou ina ia avea ma tama kikimafusu lelei ma agava’a.

E tusa ma le lima tausaga talu mai ona aumau o ia i le a’ai tele o Las Vegas, ae o le tolu ai lea o tausaga talu mai ona a'oa'oina e ia le fanau i le Xtreme Couture lea e na te a’oa’oina ai le fanau i ona tomai fa’apitoa i le Kikimafusu ma le Muai Thai.

Ona ua atoa le 20+ tausaga o lona tomai fa’akikimafusu, ma ua 'iloga fo’i ana taumafaiga ‘ese’ese ua fa’amauina i le tele o ana fusu’aga ua manumalo ai. Ua 'iloga le lelei o le vave amata mai ona a’oa’oina i so o se ta’aloga, aua o ia e 12 ona tausaga ae ua amata ona kikimafusu ona o lona fiafia tele i ata tifaga o le tama o Bruce Lee ma Jackie Chan. Ona o le vave ona si’itia o lona olaga talavou i Aukilani i Niu Sila, ma e fiafia fo’i lona aiga atoa i fusu’aga ma le Karate, o mea ia na atili ai ona tulimata’i e ia lea fa’agatama e tauva ai.

I le gasologa mai o lona soifuaga, i ona tupu’aga o le tama o le tama o lona tama sa fusu, soso’o mai ai ma le tama o lona tama, soso’o mai ai ma lona tama, o uso o lona tama ma latou fanau, e fusu uma lava, o le 'aufusu le aiga lea, ae le vevesi fa’apena i latou, e matua i ai i o latou toto le fusu, o se fa’agatama e tauva uma ai le 'Auaiga o Sa Sefo.

Peita’i, ina ua amata ona a’oa’oina Ray Sefo i ona tomai i le Karate ma le Kikimafusu, sa fesiligia o ia e lona tama i lana fa’ai’uga ua faia, o lana tali lea, “Aisea e fa’aaoga ai na’o lima, e tatau ona fa’aaoga uma isi itutino o lo’u tino e puipuia ai a’u.”

Peita’i, sa va’aia e lona tama le tulaga 'ese mai lava o lona fa’anaunauta’iga, atoa ai ma le tula’i mai fo’i o ana taumafaiga ua a’e ma ua atili ona aga’i i luma, sa le fa’avaivai ai le agaga o Sugar Ray Sefo i lona filiga ia sili lava lana taumafaiga 'ese mai lea mai lona aiga, ma ia tu matilatila fo’i! Fa’afetai i le Atua sa fa’ananau lona loto, ma ua tali mai, lea ua lomia lona igoa i le lisi o Tagata Ta’alo ta’uta’ua i le lalolagi i le Kikimafusu, Karate, Muai Thai, Jiu-Jitsu ma le MMA.

E 'ese le mea na o’o i ai le olaga taumafai o Sefo, sa le manatu lava o ia e tauva i ni ta’amilosaga tetele o le lalalagi i le ta’aloga Kikimafusu, Karate ma le MMA, peita’i, ona ua fa’aletonu le soifua maloloina o se tasi o ona faia’oga i le vaitausaga 1980, na le mafai ai ona tauva, ae suia loa e Sefo ma amata ai loa ona tauva o ia i le mama.

Ua amata atu ana taumafaiga i le mama, ma ua manumalo, ua le maua lava se tasi e la te fetaui e faia’ina ai, ma ua saga faia ai lava ana paga ma ua o’o ai ina atoa le 80 o ana ta’amilosaga fa’apolofesa i lea fa’agatama Kikimafusu, MMA & Karate. O le paga fo’i lea na amata ai lona olaga tauva i le mama, sa togi mai le solo ua TKO e Sefo i le ta’amilosaga 2.

Ina ua pasi le vaitausaga 1980, e le’i palapala lava le lisi o manumalo o Sefo i ana paga kikimafusu & Karate. O’o mai loa i le 1990, fa’apolofesa loa le tauva a Ray Sefo ma ua atili ai ona ta’uta’ua le tama i le tausaga 1996 lea na tauva ai loa o ia i le 'au Kikimafusu a Iapani lea e fa’aigoa o le K-1. I le fusu’aga lona tolu a Ray Sefo i le K-1 a Iapani, sa ia fa’ato’elea ai le ali’i ta’uta’ua o Jerome Lebanner, o se tasi sa logologoa mai lona tala’ave talu mai ona a’oa’oina ma tauva i le mama i le Kikimafusu & Karate.

O LeBanner sa pei o le Tama Miliona a Amerika i Fusu’aga ma Roger Federer i le tenisi, ae na to’ele lava i le tama amo popo a Samoa. O le tama mai, e na’o Sugar Ray Sefo lava na fa’apalapalaina le papatua o si na ali’i ma le toe tula’i mai ai lava, aua na TKO lea fetauiga.

I le vaitausaga e 2007 - 2008, na amata ai ona fa’aletonu le taumafaiga a Ray Sefo, ona ua i ai fa’aletonu i lona soifua maloloina, ae maise ai na po’ia ai lona tama i ma’i faigata, ona o ia o se tasi e fusu lona olaga. I le taimi e na’o  faia’ina lava ana fetauiga fa’apolofesa e ono sa faia ai.

Ina ua matua tu’u 'ese e Ray Sefo mea mamafa i lona mafaufau, ae toe fa’asaga ane e koleni i le tausaga atoa e 2009, na ia amata ai loa i le Xtreme Couture i Las Vegas. O lea le vaega o lona olaga ua toe fa’afouina ai lona taumafai i lana fa’agatama e fiafia i ai, Kikimafusu, Karate ma le MMA.

O sana fa’amatalaga ua ia fa’aalia ai, “Ua atoa le lua tausaga ua ou le toe ma’i, ma ua kolenia nei a’u e se tasi ua fetaui lelei lona agava’a ma ituaiga mana’omia o lo o ia te a’u. O lo’u faia’oga faufautua o Jake Bonacci, o ia lea na te a’oina fa’apitoa a’u i ituaiga o metotia e mana’omia ona ou iloa ou te tauva ai, a’o ua o’o mai fo’i le matua i le tino, ae maise o le a’oina o le mafaufau ina ia fetaui ma le ituaiga metotia lea e fa’aaogaina e te manumalo ai i au fetauiga.” O lana tala mai, “E le’i i ai muamua lava so’u faia’oga fa’apea talu mai ona amata ona ou fetaui i le mama.”

“O i latou nei ua a’oina fa’apitoa lo’u nei sui, ua ala ai ona toe atoatoa le malosi ma le mafaufau, e fa’ato’ilalo ai a’u paga i le vaitau lenei ua sau fo’i le matua latou o le tino.” O le ali’i e ona le falea’oga lea o le Xtreme Coutures i Las Vegas, Randy, lea sa ia fa’ailoa ia Sefo, “O lou matua i le mafaufau, o le tele na o metotia e mafai ona e fa’ailoa i lou tino e fa’atino ai le fusu’aga i le mama!”
Ua atoa le 46 tausaga o Randy ae o lo o tauva pea, ma ua fa’ailoa fo’i e Sefo, “Afai e mafaia e Randy ona manumalo i ana paga, e mafaia fo’i e a’u, aua ou te la’ititi ia te ia!”

saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.