Login

Fa’ate’a 28 Seila -fuala’au fa’asaina “SPICE”

frostlehualani@yahoo.com

Mai le a’ai o San Diego ua fa’ailoa mai ai le to’a 28 o Seila a le Navy ua tete’e mai a latou galuega i luga o le USS Ronald Reagan, le va’a lea e tulaueleele i ai va’alele a le fuava’a a le Militeri, ona ua latou gaosia le isi ituaiga o fuala’au fa’asaina e igoa o le “SPICE” ma e tali tutusa lava ma le marijuana lona malosi, ma fa’aaogaina. O se tasi o tulafono ma’oti a le militeri, e sa ona fa’aaogaina e ana fitafita tau o so’o se ituaiga o fuala’au fa’asaina.

O lenei fa’asalalauga, ua fa’ailoa mai, ae tusa ma le masina ua te’a, sa fa’ailoa mai ai e le Navy, o le a latou fa’atula’ia le tusa ma le 64 o ana fitafita seila, o le to’atele o i latou e auva’a i le USS Carl Vinson, mo le latou fa’aaogaina lava o le “SPICE”.

“O le tulafono a le NAVY e matua manino lava, e matua le i ai lava se avanoa e mafai ai ona latou toe fa’afaigaluegaina ai se tasi ua maua o fa’aaogaina fuala’au fa’asaina, ma na amata mai lava lo latou avea ma seila o le Fuava’a, ua iloa patino lea tulafono.” O le tala lea a Lutena Beth Teach, le fofoga o le US Navy Fuava’a lona 3.

“O le fa’aaoga e Seila o Fuala’au fa’asaina, e tu’u ai le ola o tagata uma i luga o le laina, ma e le mataalia ai fo’i i latou i o latou tiute e ao ina fa’atino i taimi tatau ai.” Ua le fa’aalia mai e i latou pe to’afia ua tulia nei ona o nei uiga, ae pe na fa’apefea fo’i ona maua i latou uma nei ua fa’atula’ia.

Ua fa’ailoa mai e le ali’i o Teach, e le’i taitai ona mae’a le sailiga a le Navy i nei mea uma, ae o le a fa’ailoa mai nisi tali i fa’afesili a le au tusitala, pe afai o la e mautu mai se fa’aaliga i le fa’auluuluga e tusa ai o lenei to’atele o seila a le Navy ua fa’atula’i esea mai le fuava’a.

O le va’a a le USS Ronald Reagan e tusa ma le 1,092 futu le umi ua toe fo’i atu nei i San Diego, le uafu lea e fa’amautu i ai i ana faigamalaga uma, ma e fa’ato’a o’o ia Setema i lea uafu, talu mai le 6 masina o femalaga’i i ana galuega fa’atulaga i luga o le sami.

Na malaga mai mo le itu i sisifo o le pasefika, soso’o lea ma le malaga aga’i i le Ava i Alapi, lea sa avea ai ma malaeva’alele e fa’aaoga mo le au tau a Amerika i Iraq. I le masina o Mati o lenei tausaga, sa taula ai i le Uafu tele i Iapani ina ia fesoasoani i le malo i le taimi tonu o le Tsunami tele sa a’afia ai lea atunu’u.

I so’o se taimi e fa’ate’a ai se tasi mai le Navy, e tusa ma le ono masina o taumafai le pulega a le Fuava’a e tu’ufa’atasia uma o latou pepa ina ia mautu ai lona fa’ate’aga mai lona avea ma fitafita seila a le Fuava’a.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.