Login

Fa’aleo Sanitoa tete’e Itumalo Tualauta i le fuafuaga a le NOAA

ausage@samoanews.com

I se tusi na tuuina atu e le alii faipule o le itumalo o Tualauta, afioga Larry Sanitoa i le pule o le NOAA ia Dr. Jane Lubchenco, i le aso 5 Ianuari 2012, o loo ia faaleoina ai le finagalo o lona itumalo e tete’e ai i le fuafuaga lea ua uma ona faalauiloa e le Pulega a le NOAA, ina ia toe faaopooopo isi vaega o ogasami i Amerika Samoa, e tuu atu i isi ogasami lea ua maea ona i lalo o le latou puipuiga.

E pei ona silafia, o le aso Faraile na tea nei na faamuta ai le taliaina e le Vaega a le NOAA o fautuaga mai tagatanuu o Amerika Samoa, ina ia faailoa atu ai ni o latou finagalo e uiga i le latou fuafuaga, e toe faalautele ogasami e i lalo o le faasao a le Fagatele Bay National Marine Sanctuary (FBNMS).

Na taua e Sanitoa i lana tusi e faapea, i se fonotaga sa faia i Auasi i le masina o Novema na tea nei, sa ia faaleoina ai atugaluga ma le tete’e i le komiti a le NOAA ma le FBMNS, ma fesiligia ai aia faaletulafono ua manatu ai le NOAA e faagaioi lana fuafuaga ua faalauiloa.

Na siitia e Sanitoa se vaega o le Tulafono Toe Teuteuina a Amerika Samoa i le Ulutala 24, Mataupu 3 o le Vaega 24.0304, lea o loo tuu atu ai le malosiaga i le Matagaluega o le Puipuiga o le Vaomatua ma le Gataifale (DMWR) le malosi latou te pulea, puipui, faasao ma faatumau le tulaga lelei o le ola o meaola ma le siosiomaga i le teritori.

Saunoa Sanitoa, o le fuafuaga e faalautele ogasami i lalo o le vaavaaiga a le FBMNS ua fete’ena’i i le Ulutala  24, Mataupu 3 o le Tulafono Toe Teuteu a Amerika Samoa.

Fai mai Sanitoa, o le Ulutala lea 24 o le Tulafono o loo manino mai ai le le faatumauina pea o le puipuia o taiala atoa ai ma le faamalosia o tulafono a le feterale, ae maise ai foi, o lea fuafuaga o le a taofia ai le aia tatau o le malo o Amerika Samoa e pei ona i ai le ituaiga faigamalo o loo i ai, ma o se fuafuaga fou o le a maimau ai ni tupe se tele.

Sa ia taua le tauaaoina lea e le DMWR o le faitau miliona ma miliona o vaega tupe fesoasoani e fesoasoani ai i le puleaina ma le  puipuia o nofoaga o loo ola ma soifua ai meaola i lona gataifale, lea foi e pei ona i ai ni faamaumauga sa faasoa mai e le Faatonu o lea Matagaluega ia Ufagafa Ray Tulafono i se iloiloga  o le tupe faasoasoa i le tausaga ua te’a.

I ia faamaumauga e pei ona taua i ripoti ma faamaumauga na tuu faatasia e tagata saienitisi o loo suesueina meaola o le sami, o loo taua ai le faaopoopo lea ma le faatoateleina o auaiga o i’a o loo nonofo i lalo o amu talu mai le 6 tausaga talu ai.

O lona uiga o lea ripoti e pei ona saunoa Sanitoa, o loo manino mai ai le tulaga lea, e le o ova le fagotaina e tagata o i’a o loo ola i le ‘aau, o loo tulaga lelei foi le ola ma le maloloina o ‘aau i ogasami a le atunuu.

O le aso Lulu o le vaiaso nei ua fuafua le tofa Faleomavaega Eni e faataunuu ai sana iloiloga faalauaitele mo le atunuu, i le Fale Samoa a le Fono Faitulafono, ina ia maua ai le avanoa o le atunuu e faaleo ai o latou finagalo e uiga i lenei mataupu, lea foi o loo faaauau i ai suesuega a lona ofisa i Uosigitone.

Na taua Faleomavaega i se tasi o ana polokalame e lei mamao atu, ua maea ona ia feiloai i le pule o le Ofisa a le NOAA i Uosigitione, lona tete’e foi o ia i lenei mataupu ona o nisi o mafuaaga sa ia faailoa i ai.

Ae i le saunoaga a le kovana sili ia Togiola Tulafono ina ua amata alia’e mai faasea ma muimuiga a le atunuu e uiga i lenei mataupu, sa ia fautuaina ai le atunuu ina ia faitau muamua ma le toto’a le ripoti a le NOAA, ona faatoa faaleo ai loa o ni a latou finagalo.

Saunoa Togiole, e le o manatu le NOAA na te puleaina uma ogasami o le atunuu, ae o le agaga, ia mafai ona faasao nisi i’a mai nisi o ogasami o loo tuufua ai nei meaola, ina ia  aua nei motusia ae ia tele pea mo tupulaga o le lumanai.

Na taua e nisi o le atunuu, o le gaioiga a le NOAA lea ua faalauiloa mai, e le o se fuafuaga e talafeagai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.