Login

E ono solo tete’e faiaoga ASCC pe a le totogia i latou?

ausage@samoanews.com

Na fa’ailoa e le afioga i le alii faipule mai le itumalo o Tualauta ia Tapumaia Galu Satele Jr i luma o le maota o sui i le aso ananafi, se fa’aaliga mai i ni isi o faiaoga o le Kolisi Tuufaatasi a Amerika Samoa (ASCC) ua o’o atu i lona Ofisa, i le ono faia o se latou solo tete’e po o le tula’i ese foi mai galuega, pe afai e fa’aauau pea ona le totogia i latou.

O lea fa’aletonu, e pei ona saunoa le alii faipule, sa ia fa’atusatusa i le fa’aletonu tau tupe o lo o tulai mai i le falemai i Fagaalu.

Na saunoa Tapumaia, o le fonotaga a le ASCC lea na fai i le Aso Gafua na te’a nei, na manino mai ai le i ai o ni isi o faiaoga o le a le mafai ona maua totogi. E le gata i lea, e toa 15 isi faiaoga ua mumusu e tu’uina atu togi a latou vasega i totonu, sei vagana ua totogi muamua i latou.

Na fa’aalia le atugalu o le ali’i Faipule, ona o lo o loma nei le asiasiga a le Komiti mai Amerika e pasia Kolisi ma Iunivesite a le malo tele.

Na taua foi e le alii faipule, o nisi o ripoti ua o’o atu i lona Ofisa, e aofia ai se fuafuaga e fa’amalolo nisi o faiaoga ona o tulaga le lava o tupe e totogi ai, peitai ua folafola e nisi e fa’apea, afai e tupu lea tulaga, o le a fai se solo tete’e po o le o ese foi ma le aoga.

“E taua tele lo tatou taumafai e saili se fofo mo le faafitauli lea ua tulai mai foi i le kolisi tuufaatasi, e manaomia ai foi le faia o se iloiloga a le tatou maota sei fesiligia ai le pulega a le kolisi e uiga i lenei faafitauli,” o le talosaga lea a Tapumanaia na tu’uina atu i luma o le maota.

Na fa’aalia e le afioga i le alii faipule ia Faimealelei A. Allen, o le fa’afitauli lava foi lea o lo o tulai mai i totonu o aoga eseese e aofia ai ma le aoga tulaga lua a lona nu’u i Aua.

Saunoa Faimealelei, e o’o mai lava i le taimi nei o lo o fa’atali pea le aoga mo nisi faiaoga se to’afa latou te faatumuina avanoa o lo o i ai mo le vasega 2, 7 ma le 8.

Sa ia taua foi, o le mataupu lenei sa ia lagaina ina ua fa’atoa amata le tausaga a’oga i le tausaga na tea nei, peitai o lea o le a mae’a le tausaga aoga ae lei maua mai lava se tali mai le Ofisa o Aoga.

O le isi faafitauli o lo o feagai ma le aoga a Aua e pei ona saunoa Faimealelei,  o le tulaga i kesi ma nofoa mo fanau aoga.

Saunoa Simei Pulu, e le tatau ona tau fa’atalitali pulea’oga ma pule lagolago i ni faiaoga pe afai e tula’i mai se manaoga, ae o le taimi tonu lea o i latou e tulai ai e fa’atino le tautua mo fanau.

Fai mai Pulu, e leai se aoga i le atunu’u e le o tulai mai ai lenei faafitauli, e le gata i le le lava o faiaoga ae o tulaga faaletonu foi i kesi ma nofoa mo fanau, peitai e manaomia foi le galulue fa’atasi o tagata uma ina ia vave foia le faafitauli, nai lo le tau faatalitali i se fesoasoani mai le Ofisa o Aoga.

I le maea ai o saunoaga mai alii faipule, na fautuaina ai loa e le Fofoga Fetalai le taitaifono o le komiti o Aoga a le maota ina ia faatulaga se iloiloga sei fesiligia ai faaletonu e pei ona saunoa i ai sui mamalu.

Saunoa  Savali Talavou Ale, e le o se taimi muamua lenei ua tulai mai ai faafitauli nei, e ui o le taimi muamua lea ua tulai faatasi mai ai ni tulaga matuia faapea, ae tatau ona saili se fofo ina nei aafia ai le tulaga manuia o aoaoga a le fanau.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.