Login

E ma’ini le Fia Fai Susu Fa’apipi’i!

Iti loa a to’atele tama’ita’i o Venezuela e manumalo i tauvaga o tama’ita’i lalelei ile lalolagi, aua o lea, ua fa’ailoa mai, ua toe ofoina mai nei e lea malo, le toe faia fua o ta’otoga e toe ‘ave’esea ai susu fa’apipi’i mai tama’ita’i uma lava ua manatu e toe ‘ave’esea latou susu sa ta’o’oto ai.

O le fesili, pe aisea? Ua iloga mai nei i sailiga ma su’esu’ega, o le to’atele o nei tama’ita’i lalelei ma o i latou fo’i ua mae’a ta’o’oto latou susu, ua a’afia ma maliliu ai isi i le Kanesa o le Susu.

E moni lelei lava le tala, “E sili le manu ua ia ou lima nai lo le lua o tata’a i le vaomatua.” Lea ua manana’o e fa’atetele susu ae le iloa, ua faia ma matagofie le suiga, ae i ai lona! Ua toe ofo mai nei la lea tautua e le Malo, aua ua iloga mai, o le malo lea e gasolo i ai le vaega fia tama’ita’i tele lava, ae maise tama’ita’i ua amata ona matutua ma ua fa’asolo ina le matagofie mai nei itutino tau tama’ita’i, ma faia ai latou ta’otoga.

O le lamatia o soifua o nei tama’ita’i ua fai si leva o fa’afiafia i le lapopo’a ma le matagofie o latou susu fa’aopoopo, ona a umi tele le taimi o i ai nei fa’aopoopoga i o latou tino, ua tauau la e papa ma sao mai i fafo le jelly lea e fa’aaoga, e matua o’ona lava, e afua ai loa ona a’afia le soifua o nei tina ma ali’i fo’i ua fia tama’ita’i, i le fa’ama’i lea o le Kanesa.

Ua fa’ailoa mai e na’o le vaega lea e ‘ave’esea le faaopoopoga e totogi e le Malo, ae o le toe fa’aopoopo o se isi jelly fou mo lou susu, ua le totogia la lea vaega a le malo o Venezuela. O se fa’aaliga taua lava lea mai le ali’i Minisita o le Soifua Maloloina a lea malo.

Ua fa’ailoa mai fo’i e le ali’i minisita lea, o le tele o ta’otoga o susu  na faia e le Poly Implant Prothese[PIP] o se kamupani mai Falani lea e fa’atautaia ana taotoga i totonu o Venezuela, o lo’o aumaia a latou oloa nei e fa’alapopo’a ai susu, i ala e le tusa ma le tulafono.

Ua fa’ailoa mai e le Malo o Falani, ua latou fa’amamafa mai, e le o i ai se so’otaga o le jelly lea e fa’aaoga i nei ta’otoga, ma le maua o nei tama’ita’i ua a’afia i le Kanesa o latou susu, o le a latou totogia le pili. O nei ituaiga o ta’otoga, ua mae’a fa’asaina lava i le tele o isi atunu’u o le lalolagi i le tausaga ua tuana’i, ina ua mae’a fa’amaonia mai su’esu’ega auiliili o lo’o i ai le elemeni e fa’aigoaina o le silicone i totonu o lea lava jelly e fa’aaoga e fa’alapopo’a ai susu i nei ta’otoga. O le silicone lea e i ai i le jelly lea, e afua ai ona toe pa le jelly pe a umi ona i ai i totonu o le susu.

Ua fa’ailoa mai, ua faia fo’i e le malo o Falani le su’esu’ega i le Kamupani sa oka mai ai e i latou nei jelly fa’apitoa mo ta’otoga nei, ma e o’o lava ina maua se ‘auga lelei e fa’afiafiaina ai lea malo, ona sa tele na’ua se fa’atuatuaga na i le Malo o Falani, e le o fa’aletonu le gaosia mai o jelly fa’apitoa nei mo susu.

Ua fa’ailoa mai, e tusa lava pe ete iloa e le o afaina oe, ae afai sa faia sou taotoga i le 2008-2010 ua tatau lava ona e o’o ane e faia sou siakiga, ma e toemafaufau toto’a lava oe, pe mata e sili atu pe a toe taoto e ave’esea nei fa’aopoopoga o ou susu.

O mea e iloga ai le lamatia o le Soifua maloloina o tagata o fa’aaogaina nei ta’otoga i o latou susu e aofia ai: O le silikone lea i ai i totonu o le momi lea, e i ai lava i le taimi e fa’aaoga ai mo le gaosiga o le fa’amalu, ae le o se elemeni e tatau ona fa’aaogaina i itutino o tagata soifua.

E le’i mafaia la e su’esu’ega o lo’o fa’aauau pea i le taimi nei, ona fa’ailoa mai sona tulaga o’ona mo le soifua nai lo le fa’aaogaina o nisi lava ituaiga o momi lea ua le toe fa’aaogaina.

Peita’i, o le i i le silikone i lea momi, ua fa’amautuina lava, e afua ai ona vave toe papa nei moni ma e a’afia ai loa le soifua o le tina sa faia lona taotoga.

Pe afai e papa nei momi e mafai loa ona avea ma se a’afiaga o le soifua maloloina o le tina, ma afai ae le vave ave’esea mai le tino, e vave tele ona o’o atu i isi totoga ma fa’aleagaina ai, ae maise lava le mageso tele.

E le o le susu la e a’afia i le Kanesa, ae o le Kanesa e ta’ua o le ALCL, o le Kanesa e afua mai le palasitika ua mageso ma a’afia ai sela o susu. O lo ua fa’amaonia mai la i sailiiliga a foma’i ma saeanisi, i Amerika fa’apea fo’i Falani, ua fa’ateleina le aofaiga o tina ua a’afia o latou susu i lea ituaiga o Kanesa ae ua na’o tina lava ua mae’a faia latou taotoga o susu e fa’alapopo’a o lo ua maliliu vave ai.

I fa’amaumauga ua maua mai nei i le minisita o le soifua maloloina, ua silia ma le 300,000 i latou ua mae’a faia latou nei ta’otoga maia atunu’u e 65, ae silia i le afa o i latou nei na faia taotoga i Venezuela.

I le malo o Brazil, o le isi lea malo e tele fo’i nei ituaiga o ta’otoga sa faia ai, e tusa ma le 25,000 ua mae’a tao’oto i le susu lava. Mai le Malo o Argentina, ua amata tu’ufa’atasia ai e le fa’alapotopotoga a tina o lea Malo se latou tagi e fa’aulu fa’asaga i le PIP ma latou taotoga ua mae’a faia, ua mae’a sainia lea tagi e le to’a 50+ o tama’ita’i ua mae’a feoa’i ma latou susu ua mae’a fa’ata’otolia.

Ua fa’ailoa mai fo’i o Europa i sisifo i malo e pei o Spain, Italy, Germany ma Ukraine o isi ia malo ua mae’a faia taotoga o le susu o latou tama’ita’i, ma ua tele fo’i taga moni a le PIP o lo’o alumia ai iina.

Ua fa’ailoa mai e tusa ma le 40,000 o tama’ita’i peretania ua mae’a faia latou taotoga nei. Ua tula’i mai lava, e matagofie i le maimoa, ae ua e sopo tapula’a fo’i i le gaosiga o oe e lou Atua.

Aumai: AP; saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.