Login

E LE GALO LE 2011 MA MEA NA TUTUPU AI

ausage@samoanews.com

A’o tatou aga’i atu ai mo le fa'amavae atu i le tausaga tuai 2011 i le toe aso lenei ae tatou sauni e ulufale atu i le tausaga fou 2012, e toe manatua ai ni isi o mea na tutupu i lo tatou atunu'u i lenei tausaga, e le gata o ni atina’e ma itu lelei mo le manuia o tagata lautele, malo, aiga ma ekalesia, ae o ni isi fo'i o fa'alavelave matuia na a'afia ai soifua o ni isi o le atunu'u.

ATINA’E MA TULAGA PAGATIA MO LE ATUNU'U MA LE MALO

O ni isi o atina’e mo le malo na fa'atautaia i lenei tausaga e aofia ai le masina o Aperila lea na fa'apaiaina ai le galuega mo le fausiaina o le Fale Samoa i le Su’igaula a le Atuvasa i Utulei, lea na fa'atupe mai e le Ofisa o le Initeria i se vaega tupe e $200,000, ma o le vaiaso nei na fa'alauiloa aloa'ia mai ai le mae'a o lea galuega.

O lenei maota tele, ua fa'amoeome e avea ma taulaiga o fuafuaga a le malo, atoa ai ma le naunau ina ia fa'atosina atili mai ai turisi i le atunu'u.

O le isi tulaga pagatia o lo o feagai pea ma le atunu'u, o le tulaga maualuga ua i ai le tau o le soifuaga, si'i pili a le ASPA atoa ai ma si'itaga a le falema'i sa fuafuaina i le po ao lumana'i le kerisimasi, peita'i o lea ua toe tolopo e le falema'i lea fuafuaga.

O le mea moni, o lo o feagai pea le atunu'u ma tulaga pagatia i le tau fa'asoasoaina lea o le tamaoa'iga, ona o ni isi o aiga e le o i ai ni galuega i le taimi nei.

O ni isi o tulaga a'afia i le malo ma le atunu'u e aofia ai le tu'ua o le malo e ni isi o ta'ita'i o le atunu'u, e pei o le afioga i le Failautusi o Mata'upu Tau Samoa ia Tufele Li'amatua, atoa ai ma le afioga i le ali'i Senatoa ia Amituana'i Eteuati, o ni isi ia o ta'ita'i sa fai ma va'aiga a le atunu'u atoa.

FA'ALAVELAVE MATUIA

O ni isi o fa'alavelave matuia na aafia ai le atunuu i le amataga o le tausaga nei, o le fa'aitiitia lea o itula faigaluega o ni isi o tagata faigaluega a le malo, ina ua fa'alauiloa e kovana Togiola Tulafono le feagai o le malo ma fa'afitauli tau tupe, ina ua fa'aitiitia tupe maua fa'alotoifale.

Na soso'o ai lea fa'afitauli ma le tu'uina atu e le kovana o pili tupe e 5 i le Fono Faitulafono mo sana fa'ai'uga, ina ia maua ai se isi alagatupe mo le malo, ma o ni isi o ia pili e aofia ai lafoga e fa'aopoopo i totogi o laisene pisinisi, lafoga e fa'aopoopo i vaiinu, 'ava malosi ma sikaleti.

E na o le tasi le pili tupe na pasia e le Fono ae o isi pili tupe e fa o lo o ta'oto ai lava i le Fono e lei faia i ai sa latou fa'ai'uga.

O ni isi o fa'afitauli tau solitulafono e aofia ai le fa'atupu laia o fanau a'oga e a'afia i solitulafono, ona o vevesi e tula'i mai i taimi o ta'aloga ma tau'ai ai pasi a'oga ma ta'avale a le lautele o le atunu'u.

O ni isi o fanau a'oga ua a'afia i solitulafono mamafa e pei o le talepe fale ma le gaoi, e o'o lava fo'i i le tagofia o le 'ava malosi ua a'afia ai ni isi o fanau laiti.

O le masina o Iuni o le tausaga nei na taofia ai e leoleo ni ali'i se to'atolu ona o tu'uaiga i lo latou fa'ao'o lea o le oti i se isi ali'i i Malaeimi. O lo o taofia pea i latou nei i le to'ese e fa'atali ai taualumaga o la latou mata'upu.

O le isi fa'alavelave matuia na tula'i mai i Pago Pago i le masina o Oketopa, ina ua osofa'i e ni ali'i se to'alua se ali'i sa i totonu o lona va'a faila, e ala i le sasaina o lona ulu i se mea malo ma titina lona ua i se uaea e aunoa ma se mafua'aga.

Na tau fa'aola lenei ali'i i le falema'i ma ua toe manuia o ia i le taimi nei, ae o lo o taofia pea i le to'ese i Tafuna ali'i e to'alua o lo o tu'uaia i lenei mata'upu, e fa'atali ai le aso lea o le a toe tutula'i ai i luma o le fa'amasinoga.

TA'ALOGA

E pei ona silafia o le vaiaso nei o lo o fa'agasolo ai ta'aloga a le  Samoa Bowl IX ma le fa'amoemoe o le aso e faia ai loa le ta'aloga football i le va o le 'au mai Hawai'i ma le 'au filifilia a tama a'oga mai Amerika Samoa nei, e sa'ilia ai le siamupini o lenei tausaga.

E pei ona silafia, o le 'autu o lenei ta'amilosaga e pei ona fa'agasolo mai ai mo le 9 lenei o tausaga, ia mafai ona toe fo'i mai fanau o lo o ola i fafo i le atunu'u, i 'ele'ele ma aiga na tupuga atu ai o latou tua'a.

O ni isi o tulaga mataina i ta'aloga i le atunu'u e aofia ai le toe manumalo o le 'au lakapi mai le afio'aga o Vailele i le ta'amilosaga ta'ito'a 7 o le sisiga fu’a, lea na fa'amanatuina i le masina o Aperila o le tausaga nei.

O le si'itia o le tulaga maualuga ma le lelei ua i ai le 'au ta'ito'a 7 a Amerika Samoa, le Talavalu na mafai ai ona tausinio i le ulua'i ta'amilosaga fa'avaomalo a le IRB i Apia, ma latou mauaina ai le tulaga 5 mo le fa'asologa o 'au i totonu o atumotu o le Pasefika, o lo o i lalo o le fa'amalu a le IRB.

O le masina na te’a nei o Novema na molimauina ai e Amerika Samoa se isi tulaga maualuga i lana 'au soka, ina ua fa'amauina i le tala fa'asolopito o le ta'aloga soka le ulua’i manumalo o le 'au a le atunu'u mai le tele o tausaga, ina ua faiaina ai le 'au a Tonga i le ta'amilosaga lea na faia i Apia, e sa'ilia ai ni 'au e ofi atu i le isi la'asaga o le sa'iliga o 'au mo le Ipu o le Lalolagi i le ta'aloga soka, lea o le a fai ai Brazil.

E 2-1 ai na manumalo ai Amerika Samoa ia Tonga, tutusa ma Atu Kuki e tai 1-1, ae faiaina ia Samoa e 1-0.

O le taimi nei, ua suia le tulaga o Amerika Samoa i le fa'atulagaina o 'au soka i le lalolagi, mai le tulaga 204 sa i ai i le 186 lea ua i ai nei, tusa lea ua 18 sitepu ua la'asia e Amerika Samoa.

O se tasi o fa'alavelave matuia na tula'i mai i le tala fa'asolopito o le ta'aloga lakapi i le atunu'u, o le fa'alavelave lea na fasi ai e ni isi o le 'au lakapi a le afio'aga o Nu'uuli le ali'i laufali o Ponifaso Vasa mai Samoa, ao fa'afoe e le ali'i laufali le ta'aloga o le talita i le va o Nu'uuli ma Avele Old Boys.

O le fa'ai'uga o lea ta'aloga na tili le laufali i le falema'i ae loka e leoleo ali'i e to'alima mai le kalapu lakapi a Nu'uuli. O le taimi nei ua tatala i tua le isi to'atasi ina ua fa'amaonia e le fa'amasinoga lana solitulafono, ae o lo o loka pea le isi to'afa e fa'atali ai a latou fa'amasinoga.

Ua faia fo'i le fa'ai'uga a le Iuni Lakapi a le atunu'u e fa'asala ai le kalapu lakapi a Nu'uuli mo le 5 tausaga, ae fa'asala ali'i ia o lo o tu'uaia i le fasiga o le laufali mo le olaga atoa, e le toe ta'aalo lakapi.

E pei fo'i ona silafia e le atunu'u le Ipu o le lalolagi na fa'ataunu'uinai Niu Sila, lea na tausinio ai le 'au a le Manu Samoa, lea fo'i na tele ai tusitusiga i totonu o le atunu'u e uiga i le fa'aaogaina o fu’a i luga o ta'avale.

E lei manuia le taumafaiga a le Manu Samoa mo 'au e 8 pito i luga, ina ua malolo i le 'au a Aferika i Saute ma Uelese i ni ta'aloga mataina ma le finau.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.