Login

AMATA I LE ‘FACEBOOK' AE FAAI'U I LE FALEPUIPUI

ausage@samoanews.com

O tama'ita'i e to'atolu mai Fatu ma Futi lea na tu'uaia i lo latou fa'ao'olima lea i se isi fo'i tama'ita'i, ona o ni fefa'aaliga o manatu i luga o le facebook, ua taofia nei i le to'ese i Tafuna e le fa'amasinoga, se'i vagana ua totogi le ta'i $18,000 ona fa'atoa mafai lea ona tatala i latou i tua, e fa'atalitali ai taimi ma aso ia ua fa'atulaga e fofogaina ai a latou mata'upu i luma o le Fa'amasinoga Fa'aitumalo.

O se fa'alavelave na tula'i mai i le Aso Faafetai na te'a nei, ina ua fa'ao'olima i latou nei e to'afa i se tama'ita'i sa ta'e'ele ma ni isi o lona aiga i le sami, na mafua ai loa ona molia i latou e le malo i le moliaga mama o le fa'atupu vevesi i nofoaga faitele, ma le fa'amoemoe o se taimi mulimuli ane o le a faila ai e le malo moliaga fa'aopoopo fa'asaga ia i latou nei.

O le taeao la ananafi na fa'atoa faila ai loa e le malo moliaga fa'aopoopo fa'asaga ia Serrah Mauga, Le'alai Mauga, Evelyn Mauga ma Simaima Mila, lea ua molia ai nei i latou i le moliaga mamafa o le fa'ao'olima i le tulaga muamua, taofia fa'apagota o se tagata i se 'auala fa'asolitulafono, fa'apea ai ma le fa'atupu vevesi i nofoaga faitele.

I fa'amaumauga a le fa'amasinoga na ta'ua ai, ao ta'ele le tama'ita'i na a'afia i le sami, sa ia va'aia Le'alai ma Simaima o lo o tilotilo atu ia te ia. Na va'aia e le tama'ita'i na a'afia le aga'i atu o Simaima ma 'aumai Serrah ma aga'i atu loa i le vaega o lo o ta'ele ai, ona tau vala'au atu loa lea o le to'atolu lea ia te ia e fa'atope mai i luga.

Fai mai fa'amaumauga a le fa'amasinoga, a'o le'i o'o mai le tama'ita'i na a'afia i luga o le oneone, o Simaima lava na aga'i atu i le sami ma toso mai o ia i uta e ui sa musu, ae sa una'i lava e Simaima o ia i uta, ma o i'ina na muamua ai loa tu'i e Simaima o ia, e pei ona ta'ua i fa'amaumauga a le fa'amasinoga.

Na ona mae'a lava ona tu'i e Simaima le tama'ita'i na a'afia, oso atu loa ma Serrah ua ta tu'i ona foliga, ma fa'apea ai fo'i ona fesoasoani atu i ai ma Le'alai ma Simaima ua fa'aauau le fasiga o ia.

Na ta'ua fo'i le aga'i atu o se tasi o i latou nei ua molia ma 'aumai se pate kirikiti mai lona fale ma le fa'amoemoe e sasa ai le na a'afia, peita'i na taofi e se leoleo. Na ta'ua fo'i le laga atu o i latou nei ma tatu'i le na a'afia, a'o savali aga'i atu i la latou ta'avale.

O le aso Lua o le vaiaso fou lea ua toe fa'atulaga i ai le iloiloga a i latou nei e to'afa ma le fa'amoemoe, o le a iloilo ai loa pe tofia e le fa'amasinoga ni loia tua e fautuaina i latou e tusa ai o lenei mata'upu, pe mafai lava e le Ofisa Loia Fautua ona tau'aveina uma a latou mata'upu.

E $25,000 le tupe sa fa'atulaga e le fa'amasinoga e tatala ai i latou nei i tua mai le to'ese, peita'i ina ua mae'a ona talosaga le ali'i loia o Mike White o lo o tula'i mo i latou nei i le fa'amasinoga, na toe fa'aitiitia ai loa i le $18,000 le tupe e tatala, ona fa'atoa mafai lea ona tatala i latou nei i tua mai le to'ese.

Afai e mafai ona tatala i latou i tua, ua poloaina i latou e le fa'amasinoga ina ia tu'uina atu a latou pepa malaga i le malo e taofia ai, ma ia aua fo'i nei o latou taumafai e tu'ua le atunu'u.

Ua fa'asa e le fa'amasinoga ona latou toe taumafai e fa'afeso'ota'i le tama'ita'i na a'afia i lenei mata'upu i so o se 'auala.

Na ta'ua e le tama'ita'i leoleo sa gafa ma le su'esu'eina o lenei mata'upu, e le o se taimi muamua lea ua tula'i mai ai le fa'alavelave lenei i le va o i latou ua molia ma le tama'ita'i Tonga o lo o a'afia, ma o lenei vevesi na afua mai i ni tusitusiga sa faia i luga o le ‘facebook.'



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.