Login

Alofa: Fa'avae ai Aiga

toasavili@yahoo.com

Na tu a’e nei i luga le toeaina o Pule, ma savali atu i le itu o lo’o i ai Tagiilima fa’atasi ai ma si ona tina ua taoto mai ai. “Tagiilima, Tagiilima, ia e loto tele, va’ai o lo’o alaala le mamalu o le aiga, a e alofa mai ia te a’u lou tama, ia e fa’amalosi mai i lo’u loto. Tagiilima, alofa mai si o’u afafine, a e loto tele, ona ou loto tele ai lea, ma va’ai i nai ou tuagane ma si ou uso, ia e onosa’i, ona i’u lea i le manuia le aso o si ou tina.”

Na a’apa ane nei le teine ma fusi atu lona tama, ma ua amata ai ona maua le mapu o lona loto. Ua ta’ita’i e Pule lona afafine ma fa’anofo i talane o lona to’alua o Lameko. Na va’aia e tagata o le aiga le maligi ifo o loimata o Lameko ina ua fa’alogologo atu i le tagi talatala a lona to’alua o Tagiilima. Ua iloa lelei e Lameko le mafua’aga ua tupu ai le fa’alavelave i le lo’omatua. Na toe manatua vave e le teine le tuafafine o lona tama, le lo’omatua o Naomi, o lea na ia toe tu a’e ai i luga ma savali loa i le itu o lo’o nofo mai ai Naomi.

Ua le mafai e le lo’omatua ona fai ane se tala i a Tagiilima, pau le upu na lafo e Naomi, “Tagiilima, ia o tatou loto tetele fa’atasi, ua alu lava Silia e leai se tala e fai mai  ia te a’u.” Ua fusi mai e Tagiilima le tuafafine o lona tama ma amata ai le lauega. “E talofa e, I a Silia, le lo’omatua a fa’alogo mai o fai sa’u tala i a Pule, ua oso mai ia te a’u…e ta le lava ae, ma’imau lenei olaga pe ana le seanoa le oti, ma’imau lenei olaga pe ana leai le tu’ugamau….e talofa e…i a Silia.”

Na fa’ate’ia le fale atoa ina ua fai mai le tautalaga a le toeaina o Pule i lona tuafafine. “Naomi, sa i ai lo’u manatu o oe e te loto tele, a’o lea ua ou va’ai atu e leai, ia e onosa’i a malolosi o tatou loto, tatou te maua fo’i le mapusaga, ae a fa’apena mai oulua ma Tagiilima, o le a le mea o le a lelei ona fai. Ia o tatou sauni mo le aso a taeao, a ma’ea ona tatou toe fa’atasi lea, ae alo mai e fa’asavali le polokalama mo le aso o si lo’omatua, ua vave le taimi.”

Ua na o le nonofo nei o le aiga, ua nofo fo’i le tagata ma ona manatu, o le tagata fo’i ma ona fa’alogona, ua sao le fale atoa. Ina ua taunu’u i tua le malaga a Tagiilima ma Lameko, ua ma’ea ona teu le fale afolau tele o le aiga, lea e masani ona potopoto ai ma fai ai a latou fa’alavelave. O le fale afolau fo’i lea na api ai Lameko ma lana aufaigaluega.

O le afiafi na uma ai le ola o Silia, o le afiafi lava lea na fai ai e Naomi ma Pule le tonu, e teu le fale atoa, ona ua leai se taimi e toe fa’atalitali ai. Ua finagalo autasi i ai le aiga atoa ma na alo loa tina mo le teuteuina o le laoa tele lea a le aiga o Puleimeauma, e taoto ai Silia mo ona leoleoga i lea lava po.

O na vaitaimi, sa leai ni maota maliu e pei ona i ai nei, o fale ia e mafai ona taoto ai le maliu a se aiga, pe a i le tasi i le lua vaiaso, a’o fa’atalitali le tagi mai ala o fanau ma aiga. O ia fo’i maota maliu, e totogi le tupe e taoto ai le maliu, o mea na ua o tatou maua i nei ona po, a’o aso la, sa leai se tigaina o aiga. O le mea lava ua maua, o le na e fa’atino ai fuafuaga a le aiga mo se fa’alavelave.

O le tulaga lea ua finagalo autasi i ai le mamalu o le aiga potopoto o Puleimeauma, ma ua mafai ai fo’i ona o latou maua le agaga o le galulue fa’atasi. Ua mou ‘ese atu aso lelei ma aso fiafia na alo i ai le aiga, e pei ona i ai le fa’apioipoga a Tagiilima, a’o lenei ua feagai ma le fa’alavelave ua sili ona ogaoga. E moni lava le upu, e mua mai ni lelei, ae muli mai ni masei, a tu’u fo’i i se isi itu, e mua mai masei, ae muli mai ni lelei.

Ua amata le talatalanoaga a le aiga o Pule, ma e le i umi se taimi, ona ua au tasi o latou manatu, o mea lava ua maua o mea na e fai ai le maliu o Silia. Na tau ane nei i le mafaufau o Pule, e tatau ona logo le aiga o Silia ma o le tulaga lava lea e tatau ona fai.
 
O le aiga o le lo’omatua e fai si mamao o le ala, ma se’i iloga o le pasi fa’atoa vave lea ona taunu’u i ai, o lea na tonu ai i le mafaufau o Lameko, e tatau ona alu le ta’avale, ina ia mafai ona toe fo’i vave mai Filipo mo le fa’amautuina o tonu a le aiga. Ua alu le feau ina ia logo le aiga o Silia e tusa ai ma le fa’alavelave ua tupu mai.

O le itula e fa i le vaveao, na amata ai ona o’o atu leleoga mo le tina i a Silia, o ekalesia ma tagata lotu, o nisi fo’i ekalesia o lo’o i totonu o le nu’u na o’o atu mo a latou leoleoga mo toe taimi o Silia.

E faia pea!



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.