Login

Alofa: Fa'avae ai Aiga— Vaega 88

toasavili@yahoo.com

Au mai fa’amanuiaga e tolu mo Loimataoapaula

Ua va’aia ataata o le aso fou, ua fa’alogoina fo’i le tausagi o manulele i le vaveao ua iloa ai le alofa ma le agalelei o le Atua, ina ua alafa’i mai i le manuia le aiga i lea taeao. E le i malamalama lelei le taeao, ae ua ala usu le tama o Eteuati e sauni le ti aua ona matua, ae maise ai o le laugatogi a lona tuafafine o Loimata lea o le faia i lea aso.

E le i maua se malologa lelei a Loimata i le po atoa, ona ua lagona le popole o lona loto, ua avea lea ma ala ua le mautonu ai lona mafaufau. E fai o lona fefe i lona tina, ae o lona manatu i tausuaga a ona tuagane lea na fai nei ia te ia i le po.

Ina ua ma’ea le tapenaina o le malu taeao, na savali atu nei Eteuati ma tu’itu’i le faitoto’a o le potu moe o lona tuafafine, “Loimata, Loimata ia o le a le na, o le a e saga moe lava, nofo mai i luga e sauni ua vave le taimi. A iloa ea e le tagata e uli va’a ma le maua sana fa’ailoga, ona tau ala vave lea i luga.”

Na tau pulapula a’e nei mata o le teine ma toso ‘ese le ie o le fa’amalama lea e i talane o lona moega. Na tau muamua lana va’ai i le matagofie o fugala’au o le togala’au a lona tina lea e i luma tonu lava o le fa’amalama o lona potu moe ma iloa ai, ua va’aia le tau’ata’ata mai o ave o le la i le taeao.

Ua tu a’e nei i luga ma savali loa i fafo, ona o lona fia iloa, po’o ai nisi o lona aiga ua maleifua mai i fanuga lelei o le aso fou. Na tau fai si fa’aletonu o le mafaufau o le teine, ona ua ia manatua nei e muamua fai le le malutaeao a ona matua ona o ai lea. Na tau soloi nei ona mata ma savali atu i le potu malolo, e le i saofa’i lelei Loimata i luga o le nofoa, ae vala’au ane i ai lona tuagane o Eteuati.

“Loimata, oi oi, se ala lou mafaufau, o lea ua uma ona ou saunia le malu taeao a Tama ma Tina, ua pei oe e le o se teine, alu e sauni ua vave le taimi.” Na o’o lava i luga o le nofoa le nofoi o Loimata e le i toe fa’atali. Na iloa mai nei e Eteuati, na ona savali mai lava o Eteuati toso fa’atata i luga, ma ta’ita’i loa i le faleta’ele.

“Alu se i e o’o i le vai, ma fufulu ou somo, fa’avave, ua toeitiiti feala mai i luga le lo’omatua ma le toeaina e te le i sauni lava. Na o si o’u alofa atu lava i a te oe pe a ala mai le lo’omatua o e nofonofo.”  Na la’a nei i totonu o le fale ta’ele ma ua amata loa ona ta’ele. Ua toe manatua ane e le teine, e leai sona solo na avatua i le taimi na savali ane ai i le potu malolo ma ua taumanuo nei lona tuagane e alu ane e avane lona solo.

“Eteuati, Eteuati, fa’amolemole alu i totonu o lo’u potu e au mai lo’u solo, ua galo ia te a’u ona au mai.” E mulimuli vala’au mai Loimata, ae ua leva ona i totonu o le potu Eteuati e tau su’e mai le solo o lona tuafafine, fa’atasi ai ma le matatioata a Loimata lea sa ia va’ai i ai o fa’aaoga e le teine.

Na fetaui le matala mai o le faitoto’a o le potu moe o Loimata, ma le oli oli atu o le tu’itu’i a le toeaina o Lameko, ua pei e oso i se niu le toeaina, i le matala mai o le faitoto’a, ae va’ai i foliga o lona atali’i. E le i toe fa’atali le toeaina i lea taimi.

“Eteuati, o le a lau mea lea e fai i totonu o le potu o lou tuafafine, ua uma ona ou tautala atu ia te oe, e sa sa ona e toe solia le potu o Loimata, tautala mai nei ae e le i o’o atu lo’u lima ia te oe.”

Na va’aia e Eteuati i lea taimi le le malie o lona tama ia te ia “Tama, malie lou finagalo, na ou sau e su’e atu le solo o Loimata, ua uma ona ou fafagu e nofo i luga ua ao ma alu e sauni, na ou toso fa’amalosia i totonu o le faleta’ele, a’o lea ua ou sau e su’e atu lona solo.” Ua fa’amalaulau uma nei e Eteuati ana mea na fai, ina ia malamalama ai lona tama i le mafua’aga ua alu ai i le potu moe o lona tuafafine, fa’atasi ai ma si ana fa’aopoopo ina ia ‘aua ai ne i sasaina ia, pe ta’u fo’i e lona tama i lona tina.

Ua le tautala le toeaina o Lameko i lea taimi, ua toe mafaufau i uiga o lona atali’i, o Eteuati, e le gata i lea itu, ae ua toe manatua vave e le toeaina le la talatalanoaga ma le lo’omatua e uiga i le la tama lea o Eteuati. Afai o le a o’o i ai lona lima, o lona uiga, o le a sasi ai ia. O lea fo’i ua fa’alogologo atu, o Eteuati lea e sau i le potu e su’e atu le solo o Loimata. Ua na o le tu nei o le toeaina, “Alu e ave le solo o le teine, ai o fa’atali mai, fa’avave.”

Ua fa’amimini nei tau ‘au o Eteuati ma tau fa’aofiofi mai i fafo i le faitoto’a. Na lagona le fefe aua ua iloa lelei , e lelei lelei lava lona  tama, ae a o’o loa ina ita, e le toe mafai e le latou tina ona taofiofi. Na fa’apea nei mafaufuaga o le toeaina, e sa’o lava, o lo’u atali’i lenei e i’u lava ina fa’afafine ma ona uiga, ua leai se ‘ese’esega ma Lipine.Ua lulu le ulu o Lameko ma savali atu i le potu malolo e fa’atalitali ai le ta’elega a Loimataoapaula.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.