Login

Alofa: Fa'avae ai Aiga— Vaega 84

toasavili@yahoo.com

Ua alu nei le tali e a tamaiti ma tilotilo ane i lo latou tina. Na tu’u ane nei e le toeaina ia lisiti ma le tupe o lo’o i ai pea i totonu, o le mea muamua lava lea na su’e e le lo’omatua, po’o mafanafana ai i totonu le vaega oa lea se manu e goto atu. “Tama, so so mai, se i fai atu la’u tala ia te oe.” Na punou ifo nei le toeaina, ma ua a’apa ane le lima o le lo’omatua ma toso atu i lalo lona ua ma sogi i lona alafau.

“Tama, o oe lava o le tama ua silisili ona lelei, ou te alofa ia te oe.” Ua leai se tasi o le fanau na toe pisa i lea taimi, ua na o le tilotilo ane i o latou matua i lea taimi, ua lagona le fiafia o o latou loto. “Tina, se o lou poto ia e taufa’apili ia te a’u, se’i iloga lava o tupe fa’atoa e fia sogi mai ia te a’u.” Ua mao le ata a Loimata, ua galo ia te ia o lo’o i ai uma i latou i totonu o le fale. Ua tu’u nei Lameko, ae liliu ane le lo’omatua i lana tama teine.

“Loimata, o le a le uiga o lau ‘ata a, na o le teine e tauvala’au tane e ‘ata sasae fa’apena, e ta fefe Loimata i au aga. Ne i e fa’apea lava e fo’i le la’au ia te oe, ua e fa’alogo mai.” Na toe liliu nei le lo’omatua ma toe faitau tupe ia na maua mai i pusa talo ma pusa fa’i na fa’atau.

“Lolesio, sau e va’ai mea ia, ave ‘ese muamua le peleti a le faifeau, ave’ese ma le tupe o totogi o tagata faigaluega a’o le tupe e totoe ai, ia fa’ata’atia mai ia te a’u, o lea fo’i e loma le fa’alavelave o le aiga o le tou tama, ua alu atu lava le vaega oa latou. E leai se tagata e maumea pea i lenei olaga. E sa’o ai le tala a le toeaina o si o matou aiga i tua, “E lo ta malosi e, ua alu atu.”

Ua talie tamaiti ma tilotilo ane i si o latou tina. O uiga ia o le lo’omatua o Tagiilima e le mafai ona galo i lona to’alua ma lana fanau. E i ai tala a nisi o tagata o le nu’u, o le lo’omatua e ‘ese le fulufulu lele, e fia tele, e fia tagata, e fia mauoloa, ae a nofo  le tagata ma maufaufau loloto i uiga o Tagiilima, o se tina e loto alofa ma e tutusa tagata uma i lana va’ai. O lona lima foa’i ma lona tausi i Fa’afeagaiga o le nu’u, fa’apea ona tuaoi e le mafai ona galo ona uiga lelei ia.

O a lava nisi uiga o le lo’omatua, e fa’amuamua pea ia Tagiilima lona alofa i so’o se tasi. O le a se mea e alu ane ai se tagata pe a mo’omia se fesoasoani, e le mafai ona fo’i fua, ua le gata i aiga o Lameko ma ona aiga i tua, ae ua fa’asalafa le alofa o le Tagiilima i tagata o le nu’u ma le afio’aga lea o lo’o nonofo ai.

O le fa’asiliga malosi o le lo’omatua e tu’u atu lea i Fa’afeagaiga Taulagi a le afio’aga, i ona fata faitaulaga e fia o lo’o punonou ma no no manu, aua se manuia o le afio’aga ma ona tagata. O ona uiga ia e fa’agalo gata ia Lameko talu ona amata le la mafutaga. Po’o ai fo’i nisi tama’ita’i sa va’ai i ai le toeaina i na vaitaimi o le tau totoga a’e o taumafaiga o si o la aiga, ae sa pele ma fa’ananau pea lona loto ma lona agaga i a Tagiilima.

  O taimi e ta’oto’oto ai i luga o le la moega, e talatalanoa pea ma toe fa’amanatu tulaga na o la savalia a’o alo atu mo le tau fa’amautuina o le la aiga, ona e le galo aso o tiga ma faigata sa feagai ma i la’ua i le taumafaiga o mea uma, o lea ua maua ai le tamaoaiga ma le fa’amanuiaga e ala i si a la fanau, fa’apea fa’atoaga o lo’o tua i ai. E ui ina ua so’oula pea aso lelei o le olaga, peita’i, e le mafai ona galo aso faigata o le soifuaga sa ola ma soifua mai ai.

Na fa’apea ane nei Tagiilima i lona to’alua, “Lameko, e le mafai ona galo le amataga o le ta aiga, fa’atasi ai ma lo’u loto fa’afetai i le Atua Soifua, ona o lona alofa ma lona agalelei mo i taua i mea uma lava.” Ua le tautala le toeaina ua toe fa’asolosolo ona mafaufauga i le tulaga sa i ai, ua a’apa ane lona lima ma u’u le lima o le lo’omatua. “Ioe, Tagiilima, e fa’afo’i pea le vi’iga ma le fa’amanu i le Atua, ona o mea uma ua ta maua, ae maise ai Ana fa’amanuiaga e ala i si a ta fanau.” Na alu alu lava le talanoaga, ua lagona e le lo’omatua le fia malolo ona ua alu le aso o feagai ma galuega i le fa’atoaga.

Na fa’atofa nei Tagiilima i a Lameko ma liliu loa i le isi itu, “Meko, va’ai lou lima lea ua o’o mai i lo’u tua, se mafaufau i le Ali’i ae le o lou mafaufau i na tulaga fa’apena, ua matutua, fai sau malologa o taeao fo’i e usu i lau galuega.” Ua ‘ata’ata le toeaina ma liliu i le isi itu, ua le sao si ana pomu atomika lea na tau tatao. “Tofa Tagi, manuia le po, fai sau miti malie.”  E le o iloa e le toeaina le ‘ata’ata a le lo’omatua ma tali mai, “Ioe, Meko, manuia le po, e sa le moe fiti.”

 



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.