Login

Alofa: Fa'avae ai Aiga— Vaega 71

toasavili@yahoo.com

Ua geno ane i ai Lameko e tala feagai le taimi lea, ma ua malilie fa’atasi ai nei Maselina ma Lameko fa’apea ma Tagiilima i le tonu ua o latou faia.

“Tina, o lea ua vela le mea’ai, e laulau atu loa e fai ai la outou meatausami?” O le fesili ane lea a le tuagane o Loimata, lea ua pisi nei i le gao’oina o le mea ‘ai i le afiafi. “Lameko ma Tagiilima, fa’afetai le fa’aaloalo, o le a ou toe tu’umuli a’u, se i o’u toe alu e toe tala’i le talanoaga a le tatou aiga, se manu o tau maua sina malamalama, ae fa’afetai lava.” Ua fa’apea lava ona fai, ua tula’i nei Maselina ma ua alu ‘ese loa. E le i o’o le lo’omatua i le auala tele, ae agi loa ma le matagi fuli fao a Tagiilima i lona to’alua o Lameko.

“Lameko, ua e va’ai la i ai i tagata o lou aiga, se leaga tagata se e fai mea vale, e le iloa fai ni fa’alavelave. Taga’i oe, o le mea tonu lava lea na ou le faia ai se tali i a Maselina, ona ua ou iloa lelei le tulaga e tatau ona fai. Sa tatau fo’i ia te ia ona tautala i matai ia na faia le tonu, ae e le mafai, aua fo’i e palai loto, na o le muimui muimui pau na o tala e iloa e tagata o lou aiga fai, a’o se upu i ni tala e lelei ai mea o le aiga, e fefefe e tautatala ai.”

Ua na o le punou o Lameko ua le tautala. Ua mafaufau le toeaina, afai e pisa Tagiilima, e sa’o lelei lava, ua fia ni mea e fai o lona aiga, o si lo’omatua lava e faia mea uma. E fai o le fa’atoaga a’o mea fafaga, o mea ia o lo’o tua i ai lona aiga i fa’alavelave, e le mafai ona fa’atamala ai Tagiilima. A sala fai la tala a Tagiilima e uiga i tagata o lona aiga, ua tatau ai.

Ua tu a’e nei i luga le teine o Loimata ma savali mai i luma i le potu malolo tele  lea o lo’o i ai nei ona matua i lea taimi. Na saofa’i ifo nei i talane o lona tama, ma a’apa atu ua u’u mai le lima o lona tama. Na iloa lelei mai e le lo’omatua i lea taimi, e le mana’o lava le lo’omatua e fa’apelepele le faiga o Loimata.

“Oi siaula, o le a e sau e te nofonofo mai, alu i tua i le umukuka e fai mai mea’ai la. Ua uma ona fa’asino oe i mea e ao ona fai, ae le uma le valea o lou mafaufau. Va’ai oe Loimata, e ‘ese lava le atamai i le a’oga fa’apapalagi, ‘ese le atamai o le mafaufau o le tamaititi i totonu o lona aiga, fai fa’alelei mai au faiga. Va’ai fo’i oe i i’u atu i ai lo’u fa’ali’i e, fai fa’alelei mai, teu mai le ta va fealoa’i, ona sologa lelei lea o si ou olaga.”

Na punou ifo nei le teine ma sogi atu i lona tama, ma savali loa aga’i i tua. Na fetaui lelei le tomumu a Loimata ma le iloa ane e lona tuagane o Eteuati. Ua lulu ane i ai le ulu o Eteuati, e sili ona tu’u lana tomumu ae fai le fa’atonuga ua fai mai ai lo la tina.

“Tautala so’o, tautala so’o, e le mafai ona lelei le tatou tina leaga e fai mai lava ia o ia e faia mea uma, o ia e lima malosi, o ia e lava i le aganu’u.”

“Loimata, e sili ona tu’u lau tomumu, e sa sa ona ou toe fa’alogo atu o e gutu oso, a fai mai le fa’atonuga, ona fai lea, ae ‘aua le fai mai le fa’atonuga ae e liuliu fa’ali’i. Na o si o’u alofa atu lava ia te oe pe a lagona mai e le lo’omatua.”
Ua tu nei le teine ma tilotilo ane i lona tuagane ma lona loto le malie i lea taimi, “E Eteuati, e a o oe fo’i le isi e faia so’oa le tulaga lea.” Ua ‘ata Eteuati ma savali aga’i i luma i le potu malolo lea o lo’o i ai ona matua.

O le va’ai ma le fa’alogo a tagata i le faiga e Tagiilima o lana tama teine e to’atasi, o le matua’i saua lava, a’o totonu o le loto o le lo’omatua, e sili atu lona auau i lana tama teine na i lo lana fanau tama,  ai ona o le fa’apea e to’atasi lava ia.

O lona alofa i lana tama teine e to’atasi, ua natia i totonu o lona loto, ae ua fa’aaliali a’oa’oga lelei, ma tima’iga aoga, ina ia atamai ai Loimata. E le gata i lea, ia iloa ai e Loimata ona ava ma fa’aaloalo i a la’ua ae maise o le va ma isi tagata. O le manatu fo’i o le lo’omatua, ia ‘aua ne’i i ai se manatu o lana tama teine ua na o ia, ona tafili saunoa ai lea i a la’ua fa’apea ona tuagane. O le fa’ata’imuaga a Tagiilima, ia iloa e Loimata le va fealoa’i ma la’ua, fa’apea ma ona tuagane.



Related