Login

“O ta’ita’i lava o le malo o loo mafua ai faafitauli i le Falema’i”

ausage@samoanews.com
Le tina ia Saili Samoa (ata AF)

E talitonu nisi o le atunuu e mafua ona tutupu fa’afitauli tau tupe ma a’afia ai gaioiga a le falemai o le LBJ, e le o faia e ta’ita’i o le malo o latou tiute ina ia tusa ai ma le tulafono.

O le finagalo lea o le tina o Saili Samoa na fa’aalia i le iloiloga fa’alaua’itele a le Fa’alapotopotoga Tumaoti a le Pualele Foundation i le aso Faraile na te’a nei, lea foi na toe saunoa i ai nisi na mafai ona fesiligia e le Samoa News i le tonu o le kerisimasi na tea nei i le nofoaga o le LBJ i Faga’alu.

“Ou te talitonu lava a’u ia e mafua ona tutupu faaletonu tau tupe i le falemai, e le o totogi atu e le malo tupe ua maea ona fa’atulafono e fa’atupe ai fuafuaga a le falemai,” o le saunoaga lea a le tina o Anita Laumatia, ina ua fesiligia e le Samoa i le aso le kerisimasi na tea nei, ao faatali le la talavai ma lona alii i le falemai i Faga’alu.

“Ana taunu’u si’itaga fa’apenei ma te le o mai i le aso lenei i le falemai, ae ou te fa’afetai ai i le pulega a le falema’i ona o le manatu mai i le atunu’u, aemaise ai foi maua nei e le lava se tupe e totogi ai a latou pili,” o le isi saunoaga lea a Laumatia.

Ae na taua e le faletua o Saili Samoa o le Pualele Foundation, e mafua ona tulai fa’afitauli tau tupe i le falema’i o taitai o le malo, e le o fa’atinoina o latou tiute na tofia ai i latou.

Sa ia taua i lana saunoaga, afai e toe foi Amerika Samoa i le auala na amata mai ai le fa’avae o lona atunu’u, atonu o le a le toe tulai mai nei fa’afitauli.

I le faaiuga o lana saunoaga sa ia fautuaina ai foi tagata palota ina ia silasila toto’a i sui o loo latou palota i ai mo le tofi faipule i le Fono Faitulafono, ina ia palota i le sui e talitonu e mafai ona fesoasoani mai i le atunuu aemaise lava pe afai e tulai mai faafitauli e pei ona tulai mai i le falemai i le taimi nei.

Na maua foi le avanoa e fesiligia ai se ulugalii o loo tausi ma’i i se tasi o la alo na taofia mai i le falemai i le aso Faraile na tea nei. Na taua e le tama o le aiga ia Fetuao Sione, sa popole lava lona loto ina nei taunuu siitaga a le falema’i i le aso kerisimasi na tea nei.

“Na ou te’i ina ua ma fesili atu ma lo’u to’alua i le teine foma’i pe amata i le aso (aso Sa na te’a nei) si’itaga o a latou pili, ae na tali mai le teine foma’i ua taofi se’i i ai se taimi, o se lagona fiafia lea mo maua aua o lea ua aga’i atu i le lona 3 o aso talu ona taofia le ma tama i le falema’i, o lona uiga e le iloa e ma’ua po o fea e aumai ai se tupe e totogi ai lenei pili,” o le saunoaga lea a Sione.

Sa to’a filemu lava vaega ‘ese’ese o le falema’i i le aso Sa na te’a nei, e tau leai ni gasegase na aga’i atu i le falema’i.

Na pau itu sa tau feololo tagata na va’aia ai, o le itu o lo’o i ai gasegase o loo taofia atoa ai ma le potu failele. E ‘ese mai i vaega ia, sa feololo foi nisi o le atunu’u na aga’i atu i le fale talavai i le taeao o le aso kerisimasi.

O nisi na mumusu e fa’aali ni o latou finagalo i le Samoa News ina ua fesiligia e uiga i le toe tolopo ai o siitaga a le falema’i, ae o nisi sa fiafia e fa’ailoa lo latou agaga fa’afetai ona o le tofa ua a’e i le pulega ma le komiti fa’afoe a le falema’i.

Na taua e tina ia na fananau mai a laua pepe i le aso o le kerisimasi, o se tala fiafia mo i laua ina ua taofia si’itaga a le falemai, se manu e le iloa poo fea e saili mai ai le $200 e totogi ai le pili o le potu fanau, atoa ai ma le $100 mo le potu taofia pe ana fa’apea e taunu’u si’itaga sa fuafuaina.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.