Le Lali

O le itula e 6:00 i le taeao ananafi na amata aloaia ai le poloka faapitoa a le Matagaluega o le Puipuiga o le Saogalemu Lautele mo le lua vaiaso e faamalosia tulafono i luga o le alatele e pei o le fusi o le fusipa’u; nofoa mo le saogalemu o fanau laiti i totonu o le taavale; ave taavale ‘ona atoa ai ma le ave taavale saoasaoa.
 
O le poloka o lo o faatautaia e le Vaega o le Traffic Division a le Ofisa o Leoleo, i lalo o le taitaiga a Captain Muagututia John Cendrowski, lea na amata ananafa ae mae’a i le aso 2 o Iuni, 2013.
 

NOFOVAAVAAIA JESS POGIA MO LE 5 TAUSAGA
 
O le alii lea na tausala e le Faamasinoga Maualuga i lona gaoia o ni oloa mai totonu o se fale sa ia osofaia i le masina o Aokuso o le tausaga na te’a nei, ua faanofovaavaaia mo le lima tausaga, ae ua lava le tolu ma le afa masina na taofia ai o ia i le falepuipui e fai ma ona faasalaga i lenei mataupu.
 

Vaega: 59
 
Fa’atalofa atu i lou alafa’i mai i fanuga lelei i lenei taeao fou i le alofa ma le agalelei o le Atua Soifua. E ia i pea le fa’amoemoe maualuga o lo’o maua pea e le mamalu o le atunu’u le soifua maunia ma le lagi e mama i le alofa o le Atua. Ae alo maia o le toe fa’aauauina fo’i lenei o la tatou tala fa’asolo e pei ona masani ai, Alofa, se ia tiga.
 

TOE FAAAUAU MATAUPU VA PAGO PAGO MA LE FALETUPE ANZ BANK
 
O le vaiaso na te’a nei na toe faaauau ai le faamasinoga o lo o faagasolo i luma o le Faamasinoga Maualuga, i le va o le Pulega a Alii ma Faipule o le afioaga o Pago Pago ma le pulega o le Faletupe o le ANZ, ona o se tagi na faaulu e le faletupe i luma o le faamasinoga faasaga i le pulega a alii ma faipule o le afioaga ona o se vaega tupe e $558,6745 sa nono e le afioaga mai le faletupe i le 2006, a’o lea ua faaletonu le toe totogia atu.