Le Lali

FALEPUIPUI MO LE 10 ASO I LE GAOIA O LE PUSA PIA
 
O se ali’i e 19 tausaga le matua lea na ia gaoia se pusa pia mai se faleoloa i le po o le aso 15 o Me 2012 i Pago Pago, ua faasala i aso e 10 i le toese i Tafuna ma le totogia o le $100, o ni isi ia tuutuuga o lona nofovaavaaia e 24 masina, ina ua ta’usala o ia i moliaga mama e lua o le gaoi ma le inupia ae le’i atoa le 21 tausaga.
 

I se tusi ua tuuina atu e le alii loia ia Fiti Sunia i le tofa i le tootoo ia Le’i Sonny Thompson na taua ai e Sunia le leai o se malosi o le pulega a ali’i ma faipule a Ofu latou te talanoaina ai fua le mataupu faasaga ia Malae Tau Malae.
 
Na taua foi e Sunia i le Faatonusili o le Matagaluega o Tagata Faigaluega a le malo, “Afai o le amio a Malae lea ua mafua ai ona faasala o ia, e tatau fo’i ona faia se suesuega i amio a ni isi o le pulega a alii ma faipule o le nuu e aofia ai ma oe”.
 

E to’alima ni tamå na fai aso Sa o Tama i le toese i Tafuna i le faaiuga o le vaiaso na te’a nei, ona o tuuaiga i lo latou faia lea o ni gaioiga e lepeti ai le nonofo filemu o tagata lautele.
 
O i latou e toalima e aofia ai Reggie Vaavale, Amuia Foma’i ma Fanolua Fanolua Jr o lo o tuuaia i moliaga mama o le faatupu vevesi i nofoaga faitele, ma le isi to’alua o lo o tuuaia i le faatupuina lea o le vevesi i totonu o le lotoifale o la aiga, e ala i le faaoolima i la taitoalua.
 

SILIA 50 FANAU AOGA AUAI POLOKALAME ARTS COUNCIL MO LE SUMMER
 
E silia i le to’a 50 tama ma teine aoga na auai i le tatala aloaiaina o le Polokalame a le Ofisa a le Arts Council mo le Summer, lea na tatalaina i le taeao ananafi mo le umi e 4 vaiaso.