Archive - Apr 2012 - Le Lali / Linking Samoans / Our Troops

Ua fa’amoemoe sui tauva ia Lutena Kovana Faoa Aitofele Sunia ma Taufete’e John Faumuina, e fa’alauaitele i se taimi e le o toe mamao, le atoatoaga o le sini o lenei faamoemoe o le a alo atu ai i laua mo kemipeni o lenei tausaga palota, aua le tofi kovana ma le lutena kovana.

O siitaga foi i pili a le falemai o le LBJ lea ua toe faalauiloa mai, ua toe  faalogoina ai foi le gugulu o nisi o le atunuu, ae mafuli lava i tagata mai fafo o loo aumau i totonu o le teritori, ona e foliga mai o le mamafa o siitaga i pili nei o le a pau atu lea i tagata e le o taua o ni tagata ua nonofo  mau i le teritori.

PE UA AUSIA TULAGA AGAVA’A O AOGA A LE MALO TELE

O le vaiaso ua mavae na taunu’u mai ai i Amerika Samoa ia totino o le Asosi o Aoga ma Kolisi mai i le malo tele o Amerika, mo le iloiloina o le a’oga maualuga a Tafuna, pe ua mafai ona ausia e lea a’oga tulaga agava’a mo a’oga a le malo tele. 

KILISITINA SEIGAFO

Ua faamalumalu le tuliga e le tamaitai o Kilisitina Seigafo o lona faasalaga faafalepuipui e tasi le tausaga mai le Faamasinoga Maualuga, ae ua faanofovaavaaia nei o ia mo le lua tausaga i lalo o poloaiga a le faamasinoga, ina ua ia ioeina le moliaga o le gaoi e pei ona tuuaia ai o ia e le malo.

O loo maitauina pea le o faatasi o galuega mo le faaleleia lea o atina’e mo le manuia o le atunuu ma lona tagata i le taimi nei, aemaise ai foi o le unaia lea e le malo o tulaga tau taaloga ia lelei ma tino mai.

O le ata manino o lea tulaga, ua faalauiloa ai e le afioga i le alii kovana ia Togiola Tulafono lona sainia o se lisi e 3.1 eka lona tele mai fanua a le malo, e faatinoina ai galuega ma le atina’eina o le Ofisa o loo gafa ma fuafuaga o taaloga a le Olimipeka (American Samoa National Olympic Committee).

Ua i ai se fuafuaga a le Fa’atonusili o le Matagaluega o Fa’atoaga, o le tauaofiaga lona fa a le Fono Faitulafono lea o le a toe nofoia ia Iulai o le tausaga nei, o le a toe faaulu ai le pili e talosagaina ai le toe faamatu’u mai o le vaega tupe lea sa fesoasoani atu ai le malo i le Aufai Faatoaga, mo le faaleleia o la latou pito laau i tulaga tau faatoaga.

Na fa'ai’u puta le mulugaveve a se ulugali’i i le fa'ai'uga o le vaiaso na te’a nei, ina ua uma ane le vevesi ae loka ai ma le tamaloa i le falepuipui e fa'atali ai le aso e tula'i ai i luma o le fa'amasinoga fa'aitumalo, ina ua tu'ua'ia o ia i lona fasiina lea o si ona to’alua e mafua mai i le tupe o le lafoga.

E afua mai ia Aperila 24 se’ia o’o ia Aperila 28, 2012 na fa’atautaia ai e le Vasega o A’oa’oga Fa’atausima’i a le Kolisi Tu’ufa’atasi a latou fa’aa’oa’oga ina ia mafai ona fa’amautu atili a’oa’oga ua mae’a a’otauina ai le fanau o lo ’o tau’avea nei mata'upu i totonu o potu a’oga.

O le aso Lulu na te’a nei Aperila 25, 2012, na faia ai se sauniga pu’upu’u ma le matagofie i le LDS i Mesepa e taualoa ai le fa’amae’aina e le to’a 15 o tina ua mae’a a’otauina i le matata o le su’isu’i.  O lo latou soifua taumafai, ua fa’aeaina ma ua fa’amau fa’ailogaina fo’i i le taua’aoina i ai o latou Tusi Pasi i lea matata ma sa latou saunia fa’apitoa fo’i se ‘aiga tele ma le matagofie lava, e sami ai lea matati’a ua ausia e i latou uma nei.

Ona o lo ua lata mai fo’i le vaiaso e fa’ataua ai e le vasega o fanau a’oga ma o latou matua, le vasega o Faia’oga ma la latou fo’i matafaioi tau’ave i aso ta’itasi, o lea ua fiafia ai le tama’ita’i sa pale i le tofi “Faia’oga o le Tausaga mo Amerika Samoa 2011-12, LitaMarie Timoteo, e fa’ailoa mai ni isi o mea sa fa’amatamata ai o ia, a’o i ai i lana malaga ta’amilo e tusa o le fa’aeaga sa ia maua mai lea tauvaga i la tatou nei teritori.