Archive - Feb 9, 2012 - Le Lali / Linking Samoans / Our Troops

LBJ taeao nei

Na fefiloi finagalo o nisi o tagata faigaluega a le falemai o le LBJ i se latou fonotaga sa faia i le aoauli ananafi, pe tatau ona fa'ataunu'u le latou solo tete’e lea ua faamoemoe e faia i le taeao nei, ae na fa'ai'u le fonotaga ina ua tasi le filiga, o le a fa'ataunu lava lea faamoemoe.

O le aso a taeao lea ua fuafua le pulega a le falemai o le LBJ e amata ai ona faamalolo tagata faigaluega mai a latou galuega, i le mae’a ai lea ona tuuina atu i ai e le pulega o ni tusi faaali e faailoa i ai lea fuafuaga.

I se ripoti na maua e le Samoa News na taua ai le ova atu i le toa 200 tagata faigaluega ua fuafua e faamalolo mai a latou galuega, lea e aofia ai ni foma’i pe tusa ma le to’a 23 (physicians, silia i le to’a 60 tama’ita’i foma’i (nurses).

MICHAEL LEATIGAGA & JOE LEOTA

O le Aso Gafua na te’a nei na tutulai ai i luma o le Fa’amasinoga Fa’aitumalo ia Joe Leota ma Michael Leatigaga, lea o lo o tu’ua’ia i lo la ave fa’agaoia o ni pusa wahoo mai i le fale teu’oloa a le kamupani i’a, o le StarKist, i le masina o Aokuso 2011.

O Leota ua molia i moliaga e lua o le talepe fale ma le gaoi, ae o Leatigaga ua tu’ua’ia i le gaoi ma lona taliaina o ni oloa sa ave fa’agaoi.

O le fesiligia ai e le Fono Faitulafono o totogi o lo o maua e fa’auluuluga o le LBJ, na afua ai ona tu’uina atu e Senatoa Alo Dr. Paul Stevenson le tatau ona fai o se su’esu’ega mae’ae’a a le Fono, i le fa’asoasoaina o tupe a le falemai, ona e i ai le talitonuga e i ai le vaega o lo o mafua mai ai tulaga faaletonu tau tupe.

Se vaaiga i nisi o turisi na malaga mai i le vaa meli o le Costa Deliziosa ao fiafia ai i le taelega i Utulei i le taeao ananafi, i le aso e tasi o le  latou malaga mai i le atunuu. O le aso Faraile lea ua faamoemoe e toe afea ai foi le atunuu i le isi vaa meli.
 

TELE FALE MA FA’ATO’AGA FA’ALEAGA I LE AFA O JASMINE

Na fa’amaonia mai e se sui o le Ofisa o Fa’alavelave Fa’afuasei i totonu o Vanuatu e fa’apea, e ui ina ua tele fale ma fa’ato’aga ua fa’aleaga ona o le afa o Jasmine, ae peita’i, e leai se ripoti o ni tagata maliliu ua maua atu.

O lo o fa’aauau pea ona fa’asalalau lapata’iga o le sou o le sami ma le maualuluga o galu.

E TATAU ONA OU TOE TULA’I - OBAMA

I se saunoaga a le afioga le Peresetene o Amerika, Barrack Obama, ua ia fa’aalia ai, “E tatau lava ona ou toe tula’i mai o le Peresetene i le isi fa’ai’uga o le Palota ua alofaiva nei i ai le Iunaite Setete o Amerika.”

Fa’aaoga i le Gagana Samoa:

O lenei taumafaiga ina ia mafai ona fa’aopoopo nisi upu i le tatou gagana samoa, ina ia mafai ona fa’afaigofie ma fa’apu’upu’u le taumafaiga e fa’aliliu mai tala fa’aperetania i le gagana samoa!

Ia fa’ao’o mai lou lagona e ala i se tusi e fa’ao’o mai i le Fa’atonu, po’o le Imeli to’asavili@yahoo.comtatou te feutaga’i ai i nei galuega lelei mo i tatou uma lava!