Archive - Feb 6, 2012 - Le Lali / Linking Samoans / Our Troops

800+ "OVASITEIA"

O fa'amaumauga mai le Ofisa o Femalaga'iga a le malo lea na tu'uina atu i luma o le Senate i le aso ananafi, na manino ai le o'o atu o le aofa'i o tagata mai fafo ua ova aso o lo o nonofo ai i le teritori, i le va o le 800 ma le 1,000 e ui o lo o fa'aitiitia lava i tausaga ta'itasi.

O le saunoaga a kovana Togiola Tulafono i le faaiuga o le vaiaso na te’a nei, ua faamuta ai le tele o tala salatua e faatatau lea i le avea ai o ia ma se tasi o sui tauva mo le tofi faipule i le fono o le Konekeresi a le malo tele.

Na faaaoga e le alii kovana lana polokalame i luga o le alaleo faasalalau a le leitio o Uaga o Faamanuiaga e faalaua’itele mai ai sana saunoaga, e faamanino ai le mataupu ua toatele tagata ua latou fesiligia ma fautuaina ai o ia, pe tauva mo le tofi i Uosigitone.

SAUNI TOGIOLA E TE’ENA PILI TUPE UA PASIA FONO

O ni fa’amatalaga tau fa’afefe na faia e le kovana e ala i lona tu’uina atu o se pili i le Fono Faitulafono e toe fa’afoi ai le fa’atautaiga o le falemai o le LBJ i lalo o le malo, pe afai e taunu’u lava la latou fuafuaga i si’itaga, ma lona sauni e te’ena pili tupe a le fono ia ua pasia e fesoasoani ai i le falemai.

Na toe osofaia foi e le alii kovana e ala i ni ana saunoaga i luga o lana polokalama i le fa’ai’uga o le vaiaso na te’a nei, fa’asalalauga o lo o faia e le ‘au tusitala i luga o nusipepa ma leitio i le atunuu, ma ia taua ai le fiafia tele o leitio ma nusipepa e fa’asalalau manatu o tagata fa’atu’iese, aua, e na o le pau ia o mea e fia fa’alogologo ma faitau ma fa’alogologo ai tagata i luga o le leitio ma nusipepa, o manatu o tagata ta’u faasese.

O se saunoaga fa’alemanino a le afioga i le Senatoa ia Tulifua Tini Lam Yuen i le senate, o mea uma e fia pasia e tatau ona ui atu i le fono, atoa ai ma le malo – ae o tua atu, o lo o mamanu i ni masalosaloga, ia palota mo uo ma aiga, o se mata’upu taua i le vaitau lenei o faiga palota o le 2012.  

PASIA SENATE PILI FAASA AI SUIGA MOLI TAAVALE

Ua pasia e le Senate sa latou pili tau faaofi e faasa ai le toe faia o nisi suiga i moli taavale, e ala i le faapipiiina lea o nisi moli faaopoopo i moli na aumai ai le taavale mai lona tino na fausia mai ai.

O lenei tulafono taufaaofi ua lagolagoina ai le tele o faasea mai le atunuu e aofia ai foi ma nisi o taitai, i le tele lea o ituaiga moli taavale eseese ua maitauina i luga o le alatele i le taimi nei, aemaise lava i le taimi o le po.

SAISAITIA I KANO, NIGERIA: TAGATA TETE’E ISIlAMI

FA’AAOGA I lE GAGANA SAMOA:

O lenei taumafaiga ina ia mafai ona fa’aopoopo nisi upu i le tatou gagana samoa, ina ia mafai ona fa’afaigofie ma fa’apu’upu’u le taumafaiga e fa’aliliu mai tala fa’aperetania i le gagana samoa! Ia fa’ao’o mai lou lagona e ala i se tusi e fa’ao’o mai i le Fa’atonu, po’o le Imeli toasavili@yahoo.com tatou te feutaga’i ai i nei galuega lelei mo i tatou uma lava!

Upu: RHINO [MANU]

FA’ASAMOA: TANIMO

Ua malie i le fa’alogologo le talatalanoaga lea ua fai nei, e le i umi lava, ae fa’alogologo mai Tagiilima ma Lolesio, ua taletale Malia ma saofa’i a’e i luga. “Oe, o le a le mea ua oulua le momoe ai, o lenei ua ao, a’o le na e fai lava lua talanoaga ua pe i oulua o ni aitu i le po.”