Archive - 2012 - Le Lali / Linking Samoans / Our Troops

E 18 moliaga mamafa ua faila e le malo faasaga ia Fiapapalagi Letuli, e afua mai i se faalavelave lea o lo o tuuaia ai o ia i lona gaoia o le silia i le $7,000, e ala i lona tala o ni siaki se valu sa tusia ai le igoa o se isi tagata faigaluega a le malo.

O le taeao nei ua faamoemoe e toe faaauauina ai le mataupu a Letuli i luma o le Fa’amasinoga Faaitumalo.

Na faaiu le saunoaga fa’ata’ita’i a le afioga i le kovana sili ia Togiola Tulafono, ina ua tatala aloaia le Polokalama Faaletausaga lona 35 o Pesepesega o le Kerisimasi a le “Arts Council” i le po o le Aso Sa na te’a nei, i le tula’i faaaloalo e manatua ai soifua o nai fanau na maliliu i Amerika i se faalavelave matuia, faapea ai ma nai fanau na maliliu i Samoa ona o le afå o Evan i le vaiaso na te’a nei.

E to’a 44 Fuimu fou a le Matagaluega o le Puipuiga o le Saogalemu Lautele, na faatauto i le taeao ananafi, i se sauniga faapitoa sa faia i le Fale Laumei i Utulei, lea na molimauina e le afioga i le kovana sili, sui o le malo, faapea ai le mamalu o matua, uo ma aiga.

O le Faauuga lona lua lea a lenei vaega o le Matagaluega o Leoleo, talu mai le ulua’i faauuga sa faia i le 2002.  O le afioga i le alii faamasino lagolago ia Mamea Sala Jr na faatautoina le au faauu.

I le lotoa a le a’oga a Peteli Academy i Ottoville, Tafuna, sa manatua ai e le vasega o le Pulega, Faia’oga, Aufaigaluega ae maise le fanau a’oga uma lagona o’otia ma le agaga fa’anoanoa ua o’o i matua, faia’oga, ma le aufaigaluega ae maise le setete o Colorado ma Amerika atoa, ina ua maliliu fasia le fanauiti e to’a 20, ma faia’oga e to’a 6 ona o le mata’utia o auupega malosi ma le loto le pulea o se talavou e to’atasi.

Ua fa’aalia e ni isi o le atunuu lo latou lagolagoina o le fuafuaga ua faataoto e lekovana sili ia Togiola Tulafono, mo le faatuina o se isi faletupe i le atunuu, pe afai ae tulai ese le faletupe o Hawaii i le tausaga fou.

Na ta’ua e ni isi, “o se fuafuaga e poto, atamai ma alofa i tagata uma” lenei fuafuaga.

ULUA’I EMEPASA O TONGA - NOFOMAU I IAPANI

Ua fa’ailoa mai i tala i le nusipepa a le Matangi Tonga, o le aso 11 Tesema, 2012 na fa’ato’a nofoia ai e le tama’ita’i Emepasa o Tonga HE Ms. Tania Tupou, lona fale fa’apitoa i le Malo o Iapani ua avea nei ma Ofisa Autu o le Emepasa o Tonga i totonu o Tokyo, le Laumua o Iapani.

O le toatele o tagata ia na malaga i le Lady Naomi mo Apia i le faaiuga o le vaiaso na te’a nei, e tasi lava le autu o le malaga atu i Samoa, o le fia fesoasoani lea i nai aiga ua pagatia ma mafatia ona o le afa o Evan na afatia ai le atunuu i le vaiaso na te’a nei.

E ui o tafaoga o le kerisimasi ma le tausaga fou sa autu i ai faigamalaga a ni isi o i latou nei, peitai ina ua tulai mai le faalavelave faalenatura lea ua aafia ai Samoa, na o latou taua ai loa i le Samoa News e faapea, o le a ave lava le faamuamua i le faia o galuega fesoasoani mo aiga ua pagatia.

O le Aso Sa na te’a nei (taimi Samoa) na taunuu ai i laufanua o Samoa le ulua’i uta o faamomoli mai Amerika Samoa, e fesoasoani ai i nai aiga ua pagatia ona o aafiaga  matautia e mafua mai o le afa o Evan, lea na taia ai Samoa i le aso Lulu na te’a nei.

O le feiloaiga a le Itumalo a le Maoputasi i le malae i Gagamoe i le faaiuga o le vaiaso na te’a nei, na faamaonia ai ana tofi Senatoa e lua ma le Faalupega mo le nofoaiga fou o le a sosoo ai, sei vagana ai le isi tofi Senatoa e tasi e le’i maua i ai se tasi.

O le afioga i le Maoputasi ia Mauga Tasi Asuega, o ia lea ua faamaonia o le a avea ma Senatoa o le afioaga o Pago Pago, a’o le afioga i le Tapunuu ia Fa’agata Mano Fa’agata o le a fai ma Senatoa o Fagatogo, Utulei ma Fagaalu.

TOE MOLIA STERLIN FUGA

O le Aso Tofi na te’a nei na toe taofia ai e leoleo le alii o Sterlin Fuga mai Leone, ona o tuuaiga i lona faia o ni gaioiga e save’u ai le nonofo filemu o tagata.

I faamaumauga a le faamasinoga sa taua ai e faapea, o le uso o matua o Fuga na faafesootaia le Ofisa o Leoleo mo se fesoasoani, ina ua amata ona faatupu vevesi Fuga, ma i’u ai i lona alu ma faatutu taavale o lo o feoai i luga o le auala ae palauvale i ave taavale.