Archive - Dec 23, 2011 - Le Lali / Linking Samoans / Our Troops

O se vaaiga lena i nisi o totino o le Autalavou EFKAS mai Fagatogo ao sauni atu mo le latou pesepesega i le porokalama kerisimasi a le Arts Council i le Aso Sa ua mavae atu.
 

O le vaiaso nei na faailoa aloaia mai ai le mae’a aloaia o le galuega sa fitaituga i ai le afioga i le Agai o Tupu ma le Falefa o le Aiga Salemalama, i le fausiaina lea o le Maota Samoa o le malo, i le malae o le Su’igaula o le Atuvasa i Utulei, lea na amata mai i le masina o Iulai na tea nei.

O le galuega na taualuga i le asiga mai le itumalo o le Maoputasi, i lalo o le taitaiga a le afioga i le Maoputasi ia Senatoa Mauga Tasi Asuega atoa ai ma taitai o le itumalo.

O le faalavelave lea na osofaia ai e ni alii se toalua mai le afioaga o Pago Pago se alii e nofo i luga o lona vaa faila i le masina o Oketopa na te’a nei, na mafua ai loa ona faia se faaiuga a le afioaga i sana fonotaga i le masina nei, ma tamau ai loa nisi o ana faaiuga e malupuipuia ai le toe tulai mai o faalavelave nei i le lumanai.

Ua sauni se tasi o faalapotopotoga tumaoti i le atunuu, le Pualele Foundation e tuuina atu nisi o ana fautuaga i le Fono Faitulafono, e fesoasoani ai i ana faaiuga fai ao fefaloa’i ai ta’ita’i o le atunuu ona o le mataupu e pei ona tulai mai i siitaga a le Falemai o le LBJ, lea ua fuafuaina i le po o le kerisimasi o le vaiaso nei.

TO’A LAITI NA TAOFIA I LE ULUA’I ASO O POLOKA A LEOLEO

Na to’a filemu le amataina o poloka masani a le Matagaluega o Leoleo i le po o le aso Lulu na te’a nei, i le tau leai lea o nisi na taofia ma tuuaia i le faatupu vevesi i nofoaga faitele ma tua i aiga ma nu’u, atoa ai ma i latou e tagofia le ava malosi ma faafoe a latou taavale, e pei ona molimauina i le taeao ananafi i luma o le Faamasinoga Faaitumalo, lea na o le toa 3 i latou na taofia mai e leoleo.

I le alo atu ai o le kamupani i’a mo lana malologa e lua vaiaso mo aso fiafia o lenei tausaga, ua faaalia ai e le pulega a le kamupani i’a o le StarKist Co le faafiafiaina o i latou i le faaiuga o le palota lea na faia e le Senate a le Konekeresi i le aso Faraile na tea nei, e faateletelegese ai le toe faia o se isi siitaga i totogi amata mo Amerika Samoa.

MAGALO PAGOTA E 13 A SAMOA

Ua taliaina e le komiti fa’afoe Palola a Samoa, lea o lo o fa’afoea e le Fa’amasino Sili, ia le tatalaina i tua o ni pagota e 13, lea ua mae’a ona tuli le silia ma le afa, o a latou fa’asalaga.

O nei pagota o lo o aofia ai ma le susuga Tuiasau Uelese Petaia, lea ua 18 masina talu ona nofosala i le falepuipui, ina ua ta’usala i moliaga o le gaoi.

Ua latalata i le 20 tausga talu ona maliliu matua o lea aiga, ae le’i tanumia lava pe fa’aliu lefulefu, ma ua toe maua ane nei, o lo’o fa’availa’au lava i totonu o le Maota Maliu i le a’ai o Edingburg i Peretania. Ua fa’ailoa mai, na maliu muamua le tina i le tausaga e 1987, ae fa’ato’a maliu ai le tama i le tausaga e 1994, ae o lea lava e tu’ufa’atasia o la’ua tino i totonu o lea maota maliu.

Fa’aaoga i le Gagana Samoa:

O lenei taumafaiga ina ia mafai ona fa’aopoopo nisi upu i le tatou gagana samoa, ina ia mafai ona fa’afaigofie ma fa’apu’upu’u le taumafaiga e fa’aliliu mai tala fa’aperetania i le gagana samoa!

Ia fa’ao’o mai lou lagona e ala i se tusi e fa’ao’o mai i le Fa’atonu, po’o le Imeli to’asavili@yahoo.comtatou te feutaga’i ai i nei galuega lelei mo i tatou uma lava!