Archive - Dec 2, 2011 - Le Lali / Linking Samoans / Our Troops

O le fa’aiuga o le masina na te’a nei na tu’u aloaia mai ai se fa’aiuga mai le Fa’amasinoga o Fanua ma Suafa, e te’ena ai le talosaga na faila e Leautu Segila Vaeao, ina ia toe iloilo le fa’aiuga lea na tu’uina mai i le aso 3 Oketopa 2011, ina ia lesitala le suafa Le’i mai Ofu i Manu’a i lalo o le suafa o Sonny Thompson.

I le fa’aiuga a le fa’amasinoga o lo o taua ai, o le aso 4 o Oketopa 2011 na lesitala ai i le Ofisa o Lesitala le suafa Le’i ia Thompson, ina ua tuana’i le fa’aiuga na tu’uina atu e le fa’amasinoga i le aso 3 Oketopa.

Ua i ai le fa’amoemoega o le Ta’ita’ifono o le Komiti Fa’agaioinga o le malo a le maota o sui, e tatau ona o’o atu i le masina o Ianuari o le tausaga fou, ua i ai se fautuaga e tu’uina atu e lana komiti i luma o le maota, i le tulaga tonu e ao ona taoto ai le mataupu e uiga i le Faitau Aofa’i o le atunu’u lea na fa’ataunu’uina i le 2010.

O le ali’i pagota lea na to’afa i ai pagota na sosola ese mai i le toese i le aso 22 Ianuari 2011, ma latou osofaia le leoleopo o le faletupe o le ANZ i Tafuna, ua fa’atulaga le lauina o lona fa’asalaga i le aso 13 o Ianuari 2012, ina ua ta’usalaina o ia i le moliaga mamafa o le fa’ao’olima i le tulaga muamua, i lalo o se maliliega sa latou sainia ma le malo.

E muamua ona ou faatulou atu ile paia male mamalu o lo’u atunu’u Samoa i ona tulaga faalupeina.  Faatulou atu foi ile mamalu ole aufaitau nusipepa, Ae ole’a fana tonu pea le malama ile komiti ua tofia mole Samoa Bowl o e oloo gafa male piki ina ole auvolipolo a teine a’oga.

E 22 tausaga o le tama’ita’i ua saisaitia ma ua molia i le taumafai e fa’ao’o se gaoiga, ina ua mae’a ona ia fanaina mata o le kesia i lana spray aoao.

O le Kesia, o le tagata faigaluega a le Western Unioin Money Transfer i le Maota o Samoa i Tuana’imato. O lenei mea na tupu i le aso Lua na te’a nei ma ua saunoa mai le ali’i Sui Komesina Le’aupepe Fatu Pula, o Fialeleli Ene Siaosi na ulufale atu lava i le Ofisa o le Western Union, fana loa ma mata o le Kesia lea i le spray aoao, ma mana’o loa lava e taua’ao ane ia te ia le tupe.

O lenei taumafaiga ina ia mafai ona fa’aopoopo nisi upu i le tatou gagana samoa, ina ia mafai ona fa’afaigofie ma fa’apu’upu’u le taumafaiga e fa’aliliu mai tala fa’aperetania i le gagana samoa!

Ia fa’ao’o mai lou lagona e ala i se tusi e fa’ao’o mai i le Fa’atonu, po’o le Imeli to’asavili@yahoo.com tatou te feutaga’i ai i nei galuega lelei mo i tatou uma lava!

Upu - CASHIER : TALATUPE

Upu Fou Fa’asamoa: KESIA: Fa’aaoga pea i tusitusiga le fa’asamoa o i luga, ae fa’aalia mai sou finagalo e talia gofie ai o tatou taofi. Fa’ailoa mai, tatou feutaga’i ma le fa’aaloalo lava!

Na savali mai nei lana tama teine o Malia, ua ta’ita’i atu lona tina i totonu o le fale. Na iloa lelei e le teine le mea o lo’o tupu i lona tina, na amata lava i le aso na alu ‘ese ai Tagiilima mai i lo latou aiga, ua le toe tutusa le malosi o lo latou tina. Ua va’aia e le fanau suiga ogaoga ua i ai nei le lo’omatua, ua avea lea ma mafua’aga na pei ai ua mimilo loto o tama, ma ua o’o ai i a i latou se manatu e fa’apea, e fai tama fa’apito lo latou tina i a Tagiilima, ae ua tu’ulafoai i latou.

O lo o ua galulue punoua’i ia ta’ita’i o le malo feterale ma le malo lotoifale, fa’atasi ma le malo o Vietnam, ina ia mafai ona toe fa’afo’i mai i le malo o Amerika Samoa, se tinoitupe e $1.2 na ave’esea mai i se teugatupe a le malo o Amerika Samoa i le Faletupe o Hawaii, ma tu’uina atu i totonu o le faletupe a le Vietnam International Bank (VIB), i ni auala pi’opi’o ma le gaoi.

O lenei mata’upu o lo o ua galulue ai nei le vaega a le FBI (Federal Bureau of Investigation)-lea ua auina so latou sui i Hanoi-ma le vaega su’esu’e o le Interpol, i Vietnam, fa’apea ma le malo o Vietnam.

Ua le mafai ona fa’atali le atunu’u i le fia va’ai i luga o masini pamu kesi ma suau’u, ua fa’amaonia mai ai le pa’u o le latou tau o le kesi ma le suau’u mo le masina lenei o Tesema, e pei ona fa’aalia e le to’atele o le aufai ta’avale afi na fesiligia e le Samoa News i le aso ananafi.

Na fa’aalia ma le fiafia e ni isi o le aufai ta’avale afi na mafai ona fesiligia e le Samoa News i le aso ananafi, lo latou fiafia tele ona o le tala ua maua mai i le pa’u o le tau o le kesi ma le suau’u mo a latou ta’avale.

O le aso 5 o Ianuari, 2012, ua fa’atulaga ai e le Fa’amasinoga Maualuga le ulua’i iloiloga mo Taligalu Ah Sui ina ua ia te’ena moliaga a le malo fa’asaga ia te ia i le taeao ananafi.

Na molia Ah Sui i lona ulufale fa’amalosi i totonu o le fale a se aiga i Vaitogi, ma ia fa’aaogaina se “monitor” o se komipiuta e sasa ai foliga o se ali’i, a’o moe, atoa ai ma lona taumafai e ta tui lea ali’i i le seleulu.