Archive - Dec 13, 2011 - Le Lali / Linking Samoans / Our Troops

O le vaiaso nei lea ua faamoemoe e toe feiloai ai le afioga i le kovana sili o le malo ma taitai o le Fono Faitulafono, mo le tuu faatasia o ni a latou fautuaga e tusa ai o le fa’aiuga ua tu’uina mai e le Komiti Fa’afoe ma le Pulega a le falemai o le LBJ, i le fa’amamaluina o a latou si’itaga i pili i le po o le kerisimasi o lo o lumanai nei.

E 41 aso ua fa’asala ai e le fa’amasinoga ia le ali’i 19 tausaga o Jack Banse, i le falepuipui, ona o lona fa’afoe o se ta’avale e le i fa’ataga ona fealua’i i luga o le alatele, a’o fa’asuaava, ma lavea ai le ta’avale ma manunu’a ai ni isi.

Sa saunoa le alii faamasino o John Ward II, na ave’ese e Banse se laisene o le isi taavale ma fa’apipi’i i se ta’avale e lei fa’ataga ona fealua’i i luga o le alatele, ona alu ai lea ma piki ana uo mo se tietiega, a’o ia tagofia le ava malosi.

TO’ATOLU MALILIU I FA’ALAVELAVE I LE VAIASO E TASI

O se turisi mai i Siamani, na maliu i le vaiaso ua mavae, ina ua alu sana savalivaliga i luga o matafaga i Lalomanu. Na maua atu le tina matua e 71 tausaga, ua maliu i luga o matafaga i tafatafa o le Litia Sini Beach Resort, i le Aso Faraile o le vaiaso, e pei ona fa’amaonia e le sui Komesina o Leoleo, le susuga Le’aupepe Fatu Pula.

O le po o le Aso Faraile o le vaiaso ua mavae, na faia ai se sa’iliga Tausala ma Manaia a le vasega fa’ai’uaso a le a’oga maualuga a Kanana Fou, ma sa fa’atumulia ai le fale ta’alo a le a’oga, i aiga, uo, ta’ita’i o le ekalesia EFKAS, ta’ita’i o le a’oga, faiaoga ma fanau a’oga, mo le sapasapaia o lenei fuafuaga a le fanau. O se va’aiga lenei i tausala ma manaia a le vasega 9, 10 ma le 11.

O le vaa fagota lea na taofia i le teritori i le masina o Iulai na tea nei, ua maea nei ona faila e le feterale ni moliaga se fitu faasaga i le kamupani o loo pulea lea vaa fagota i Niu Sila, ona o tuuaiga i lo latou soliina lea o tulafono tau i le puipuiga o ogasami mai le lafoai i ai o lapisi.

LT. RAYMOND NOA

Ua ta’oto atu nei i se faaiuga a le faamasinoga maualuga le talosaga na faaulu e le loia a le alii leoleo o Lt. Raymond Noa, e talosagaina ai le faamasinoga ina ia toe faia se faamasinoga iloilo fou a le ua molia.

O le Aso Faraile na te’a nei na fofogaina ai lenei mata’upu i luma o le fa’amasinoga, i le mae’a ai lea ona ta’usalaina e se vaega iloilo iuga o Lt. Noa i le masina o Aokuso na te’a nei i le moliaga o le faaoolima i le tulaga lua, faaleaga meatotino i le tulaga lua, ma le faatupu vevesi i nofoaga faitele.

Talutaluga fou o le olaga
A’oa’oga a Loimataoapaula

Fa’aaoga i le Gagana Samoa:

O lenei taumafaiga ina ia mafai ona fa’aopoopo nisi upu i le tatou gagana samoa, ina ia mafai ona fa’afaigofie ma fa’apu’upu’u le taumafaiga e fa’aliliu mai tala fa’aperetania i le gagana samoa!

Ia fa’ao’o mai lou lagona e ala i se tusi e fa’ao’o mai i le Fa’atonu, po’o le Imeli to’asavili@yahoo.com tatou te feutaga’i ai i nei galuega lelei mo i tatou uma lava!